Марк 13 - Коми Библия 2023

Нэм помасьӧм йылысь

¹ Кор Исус вӧлі петӧ крамсьыс, ӧти велӧдчысь шуис: «Велӧдысьӧй, видзӧдлы, кутшӧм изъясысь тэчӧма керкаяссӧ!»

² Исус шуис: «Аддзан тайӧ ыджыд керкаяссӧ? Татчӧ из вылӧ из оз коль, ставсӧ жугӧдасны».

³ Исус вӧлі пукалӧ Олив керӧсын, крамлы паныд. Кор вӧліны ас кежаныс, Петыр, Яков, Иоан да Ӧндрей юалісны Исуслысь:

⁴ «Висьтав, кор ставыс тайӧ лоас? Мый серти ми тӧдмалам сійӧ кадсӧ?»

⁵ Исус шуис: «Видзчысьӧй, мед эз ылӧдны тіянӧс.

⁶ Унаӧн Менам нимӧн локтасны да шуасны, ме пӧ Сійӧ, да унаӧс ылӧдасны.

⁷ Кор ті кыланныд тышъяс йылысь юӧр, кор кыланныд лыйсьӧм шы, энӧ полӧй. Тайӧ ставыслы колӧ лонысӧ, но тайӧ абу на пом.

⁸ Войтыр войтырлы паныд сувтас, муяс ӧта-мӧдныслы паныд кыпӧдчасны. Уналаын лоас му вӧрӧм, тшыгъялӧм да шызьӧм. Но ставыс тайӧ чужтӧм водзвывса дойяс на.

⁹ Видзӧдӧй ас бӧрсяныд. Тіянӧс кыскасны ёрдӧ да нӧйтасны синагогаясын. Ме вӧсна тіянӧс нуӧдасны юралысьяс да ӧксыяс водзӧ, медым найӧ тӧдісны Ме йылысь.

¹⁰ Помыс вотӧдз Евангелльӧсӧ колӧ висьтавны быд войтырлы.

¹¹ Кор тіянӧс нуӧдасны ёрдӧ, водзвыв энӧ майшасьӧй, мый шуны. Висьталӧй сійӧ, мый лоӧ сетӧма тіянлы сійӧ кадас. Сэки онӧ ті кутӧй сёрнитны, а Вежа Лов.

¹² Вокыс воксӧ сетас вины, батьыс – писӧ. Ныв-пиыс сувтасны бать-мамыслы паныд да виасны найӧс.

¹³ Менам ним вӧсна унаӧн мустӧмтасны тіянӧс, но сьӧкыдсӧ помӧдз нуысь мездмас».

Сьӧкыд кад йылысь

¹⁴ «Кор ті аддзанныд пеж зывӧксӧ сэтысь, кӧні сылы оз позь лоны, сэки Иудея муын олысьяс мед пышъясны керӧсъясӧ. Тайӧ пеж зывӧкыс йылысь Даниил пророк на висьтавліс – лыддьысьысь мед гӧгӧрвоӧ!

¹⁵ Коді лоас керка вылас, мед оз пыр керкаас босьтны мыйкӧ.

¹⁶ Коді лоас видз-му вылас, мед оз кос гортас паськӧмысла.

¹⁷ Сійӧ лунъясӧ ёна сьӧкыд лоӧ нӧбасьысьяслы да нёньӧдчысьяслы.

¹⁸ Кевмысьӧй, мед эз ковмы пышйынытӧ тӧлын.

¹⁹ Сійӧ лунъясӧ ыджыд шог суас йӧзсӧ, татшӧмыс Енмӧн муюгыдсӧ вӧчӧмсянь эз на вӧвлы да оз нин ло.

²⁰ Господь кӧ тайӧ кадсӧ оз дженьдӧд, ловъя морт оз коль. Но Аслас бӧрйӧмаяс вӧсна Сійӧ дженьдӧдас тайӧ кадсӧ.

²¹ Сэки шуасны кӧ тіянлы: ”Кристос тані”, либӧ шуасны: ”Кристос сэні”, энӧ эскӧй.

²² Ӧд ылӧгкристосъяс да ылӧгпророкъяс локтасны да пондасны вӧчны шензьӧданаторъяс, медым ылӧдны, позяс кӧ, весиг бӧрйӧмаясӧс.

²³ Видзчысьӧй наысь. Ме тіянлы ставсӧ водзвыв висьталі».

Морт Пилӧн локтӧм

²⁴ «Сійӧ лунъясӧ, тайӧ шог бӧрас, шондіыс пемдас, тӧлысьыс кусас,

²⁵ енэжысь кодзувъяс усясны, енэжвыв вынъяс вӧрзясны.

²⁶ Сэки аддзасны кымӧръяс вылын ыджыд вынӧн да дзирдлунӧн локтысь Морт Пиӧс.

²⁷ Сійӧ мӧдӧдас анделъяссӧ нёльнан му вежтасас да чукӧртас Ассьыс бӧрйӧмаяссӧ став му пельӧссьыс.

²⁸ Видзӧдӧй инжир пу вылӧ да гӧгӧрвоӧй: вожъясыс кӧ ловзьӧны да коръясыс потӧны, сідзкӧ, гожӧмыс матын.

²⁹ Тадзи, ставсӧ тайӧс аддзигӧн, тӧдӧй, мый сійӧ кадыс матын, ӧдзӧс дорад нин.

³⁰ Веськыда висьтала тіянлы: ставыс тайӧ лоас ӧнія олысьяс дырйи на.

³¹ Енэжыс да муыс бырас, а Менам кывъясӧй оз бырны.

³² Сійӧ лунсӧ да сійӧ кадсӧ некод оз тӧд. Анделъяс оз тӧдны, весиг Пиыс оз тӧд, сӧмын Батьыс тӧдӧ.

³³ Видзчысьӧй, мед энӧ унмовсьӧй, да пыр кевмысьӧй, ӧд онӧ тӧдӧй, кор сійӧ кадыс воас.

³⁴ Тайӧс позьӧ ӧткодявны морткӧд, коді гортсьыс мунігӧн кольӧ ассьыс керкасӧ кесйӧгъяслы да быдӧнлы сетӧ удж, а керкасӧ видзысьлы тшӧктӧ лоны дасьӧн.

³⁵ Сідзкӧ, лоӧй дасьӧсь, ӧд онӧ тӧдӧй, рытын-ӧ, войшӧрын-ӧ, петук чуксасигӧн-ӧ, асывводзын-ӧ локтас керка кутысь.

³⁶ Мед эз су тіянӧс узьӧмӧн тӧдлытӧг локтӧмнас!

³⁷ Мый висьтала тіянлы, висьтала быдӧнлы: лоӧй дасьӧсь».