Марк 10 - Коми Библия 2023

Гӧтырӧс эновтӧм йылысь

¹ Сэтысь Исус муніс Йӧрдан ю мӧдлапӧлӧд Иудея муӧ. Сы дінӧ бара чукӧртчис уна йӧз. Сійӧ велӧдіс найӧс, кыдзи пыр вӧчліс.

² Исус дінӧ матыстчисны фарисейяс да Сійӧс кыйӧм могысь юалісны: «Позьӧ-ӧ верӧслы юксьыны гӧтырыскӧд?»

³ Исус воча шуис: «Мый тіянлы гижӧма Мӧисей?»

⁴ Найӧ вочавидзисны: «Мӧисей лэдзис верӧслы эновтны гӧтырсӧ, сӧмын верӧсыслы колӧ вӧлі сетны гӧтырыслы торйӧдчан гижӧд».

⁵ Исус шуис налы: «Чорыд сьӧлӧмныд вӧсна Мӧисей гижис тайӧ тшӧктӧмсӧ.

⁶ Му пуксьӧмсяньыс Ен вӧчис аймортӧс да аньӧс.

⁷ ”Та вӧсна морт кольӧ бать-мамсӧ да ӧтлаасьӧ гӧтырыскӧд,

⁸ и тайӧ кыкыс лоӧ ӧти вир-яй”. Сідзкӧ, найӧ абу нин кык, а ӧти вир-яй.

⁹ Мый Енмыс йитӧма, морт мед оз торйӧд».

¹⁰ Керкаӧ пырӧм бӧрын велӧдчысьяс та йылысь юалісны Исуслысь.

¹¹ Исус шуис налы: «Верӧсыс кӧ эновтӧ гӧтырсӧ да гӧтрасьӧ мӧдкӧд, сійӧ гозъякост олӧм пежалӧ.

¹² Гӧтырыс кӧ юксьӧ верӧсыскӧд да мунӧ мӧд сайӧ, сійӧ тшӧтш гозъякост олӧм пежалӧ».

Челядьӧс бурсиӧм

¹³ Исус дінӧ вайӧдісны челядьӧс, медым Сійӧ инмӧдчыліс на дінӧ. Велӧдчысьяс шуасисны вайӧдысьяс вылӧ.

¹⁴ Исус казяліс тайӧс да чорыда шуис налы: «Лэдзӧй челядьсӧ локны Ме дінӧ. Энӧ кутӧй найӧс. Енлысь Юраланінсӧ ӧд на коддьӧмлы лӧсьӧдӧма.

¹⁵ Веськыда висьтала тіянлы: коді оз сибӧд Енлысь Юралӧмсӧ кага моз, сійӧ оз пыр Енлӧн Юраланінӧ».

¹⁶ Исус кутыштліс челядьӧс да на вылӧ кисӧ пуктылӧмӧн бурсиис найӧс.

Озырлы сьӧкыд пырны Енлӧн Юраланінӧ

¹⁷ Туйӧ петігас Исус дінӧ котӧрӧн локтіс ӧти морт да Исус водзӧ пидзӧс вылас сувтӧмӧн юаліс: «Бур Велӧдысьӧй, мый меным колӧ вӧчны, мед вичмис меным помтӧм олӧм?»

¹⁸ Исус вочавидзис: «Мыйла тэ шуан Менӧ бурӧн? Некод абу бурыс, сӧмын Енмыс бур.

¹⁹ Тэ ӧд тӧдан тшӧктӧмъяссӧ: гозъякост олӧм эн пежав, эн ви, эн гусясь, эн пӧръясь, эн мырддьы мукӧдлысь, пыдди пукты ассьыд бать-мамтӧ».

²⁰ Сійӧ шуис: «Велӧдысьӧй, том кадсянь ме ола тайӧ тшӧктӧмъяс сертиыс».

²¹ Исус видзӧдліс сы вылӧ мусапырысь да шуис: «Ӧтитор оз тырмы тэныд: мун, вузав ставсӧ, мый тэнад эм, а сьӧмсӧ сет гӧльяслы. Сэки тэныд енэжын озырлуныс вичмас. Сэсся босьт кресттӧ да лок Ме бӧрся».

²² Исуслӧн кывъясыс шӧйӧвоштісны морттӧ. Сійӧ жугыля муніс, ӧд сылӧн озырлуныс вӧлі уна.

²³ Исус видзӧдліс велӧдчысьясыс вылӧ да шуис налы: «Кутшӧм сьӧкыд озырлы пырны Енлӧн Юраланінӧ!»

²⁴ Велӧдчысьяс чуймисны Сылӧн кывъясысь. Исус выльысь шуис: «Челядь, кутшӧм сьӧкыд пырны Енлӧн Юраланінӧ сылы, коді озырлун вылӧ лачаӧн олӧ!

²⁵ Озырлы Енлӧн Юраланінӧ пырӧм дорысь верблюдлы кокньыдджык пырны ем пысӧд».

²⁶ Велӧдчысьяс ёнджыка на чуймисны, юасисны ӧта-мӧдныслысь: «Коді нӧ вермас мездмынысӧ?»

²⁷ На вылӧ видзӧдлӧмӧн Исус шуис: «Мортлы тайӧ вермытӧмтор, но абу Енлы. Енмыслы ставыс вермана».

²⁸ Петыр шуис Исуслы: «Ми ставсӧ эновтім да мунім Тэ бӧрся».

²⁹ Исус шуис: «Веськыда висьтала тіянлы: коді Ме вӧсна да Евангелльӧ вӧсна коляс керкасӧ, чой-воксӧ, бать-мамсӧ, гӧтырсӧ, ныв-писӧ да видз-мусӧ,

³⁰ сылы тайӧ олӧмас на вӧтлӧмъяс дырйи керкаыс, чой-вокыс, мамыс, ныв-пиыс да видз-муыс сё пӧвстӧн бӧр воас, нӧшта локтан нэмас сылы помтӧм олӧм вичмас.

³¹ Воддзаясысь унаӧн лоӧны бӧръяӧн, бӧръяясысь – воддзаӧн».

Исус бара висьталӧ Аслас кулӧм йылысь

³² Ерусалимӧ кайигӧн Исус муніс водзвыланыс. Велӧдчысьяс шензисны, а мукӧдыслӧн, Исус бӧрся мунысьяслӧн, вӧлі полӧм. Исус корис Ас дінас дас кык велӧдчысьсӧ да пондіс висьтавны, мый Сійӧс виччысьӧ:

³³ «Ӧні ми мунам Ерусалимӧ. Сэні Морт Пиӧс сетасны аркирейяслы да Индӧдӧ велӧдысьяслы. Найӧ шуасны вины Сійӧс, сетасны ентӧдтӧмъяс киӧ.

³⁴ Найӧ сераласны-лёкӧдасны Сійӧс, сьӧлаласны да чорыда нӧйтасны, сэсся виасны. Но коймӧд луннас Сійӧ ловзяс».

Яковлӧн да Иоанлӧн корӧм

³⁵ Исус дінӧ матыстчисны Зеведейлӧн Яков да Иоан пияныс. Найӧ шуисны: «Велӧдысь, миян эм корӧм Тэ дінӧ».

³⁶ Исус юаліс: «Мый ті кӧсъянныд?»

³⁷ Найӧ вочавидзисны: «Пуксьӧд миянӧс Аскӧдыд Юраланінад, ӧтинымӧс – веськыдладорад, мӧднымӧс – шуйгаладорад».

³⁸ Исус шуис налы: «Онӧ тӧдӧй, мый коранныд. Верманныд-ӧ юны Менсьым чашаӧс да Менам пыртчӧмӧн пыртчыны?»

³⁹ Найӧ вочавидзисны: «Вермам». Исус шуис: «Менсьым чашаӧс понданныд юны да Менам пыртчӧмӧн понданныд пыртчыны.

⁴⁰ Но мед пуксьӧдны веськыдладорам да шуйгаладорам – тайӧ абу Ме сайын. Сэтчӧ пуксясны найӧ, кодлы лӧсьӧдӧма».

⁴¹ Яковлӧн да Иоанлӧн сёрниыс дӧзмӧдіс мукӧд дас велӧдчысьсӧ.

⁴² Исус корис велӧдчысьяссӧ да шуис: «Ті тӧданныд, мый юралысьяс ыджыдалӧны войтыръяс вылын, веськӧдлысьяс кутӧны йӧзсӧ кипод уланыс.

⁴³ Но ті тадзи энӧ вӧчӧй. Кӧсъян кӧ ыджыдӧ пуксьыны – кесъяв,

⁴⁴ кӧсъян кӧ юралысьӧ пуксьыны – ло кесйӧг туйын.

⁴⁵ Ӧд Морт Пи эз лок, медым Сылы кесъялісны. Сійӧ локтіс кесъявны да сетны Ассьыс олӧмсӧ уна вӧсна вештысьӧм могысь».

Синтӧмӧс бурдӧдӧм

⁴⁶ Исус велӧдчысьясыскӧд воис Ерикон карӧ. Карысь петіганыс накӧд вӧлі уна йӧз. Туй бокын пукаліс синтӧм корысь Вартимей, Тимейлӧн пиыс.

⁴⁷ Сійӧ кыліс, мый Назаретса Исус локтӧ, да пондіс горзыны: «Исус, Давид Пи! Ло бур сьӧлӧма ме дінӧ!»

⁴⁸ Унаӧн ӧлӧдісны сійӧс горзӧмсьыс, но сійӧ ёнджыка на пондіс горзыны: «Давид Пи, ло бур сьӧлӧма!»

⁴⁹ Исус сувтіс да шуис: «Корӧй сійӧс». Синтӧмӧс корисны, шуисны сылы: «Эн пов, чеччы. Исус корӧ тэнӧ».

⁵⁰ Сійӧ шыбитіс ассьыс вылыс паськӧмсӧ, чеччис да локтіс Исус дінӧ.

⁵¹ Исус юаліс: «Мый тэ кӧсъян?» Синтӧм вочавидзис: «Велӧдысьӧй, кӧсъя аддзыны».

⁵² Исус шуис: «Мун, эскӧмыд мездіс тэнӧ». Синтӧм дзик пыр кутіс аддзыны да муніс Исус бӧрся.