Малакий 3 - Коми Библия 2023

¹ Ме ыста Ассьым юӧртысьӧс, сійӧ Меным туй дасьтас. Виччысьтӧг локтас Аслас крамӧ Господь, кодӧс ті корсянныд, локтас йитӧд йылысь юӧртысь, кодӧс ті виччысянныд. Со, Сійӧ локтӧ нин, – висьталӧ Господь Саваоф. –

² Коді вермас ловйӧн кольны Сылӧн локтігӧн? Коді вермас сулавны Сылӧн петкӧдчигӧн? Зарни сывдысь моз Сійӧ весалӧ биӧн, песласьысь моз – кунваӧн.

³ Сійӧ пуксяс, медым сывдыны-весавны эзысь. Сійӧ весалас Левийлысь пиянсӧ, сывдас найӧс эзысь-зарниӧс моз, медым найӧ торкавтӧг вайисны Господьлы вись.

⁴ Сэки Иуда войтырлӧн висьясыс, Ерусалимын олысьяслӧн вайӧмторъясыс важ мозыс лоӧны шогманаӧсь Господьлы.

⁵ – Ме локта тіян дінӧ, медым мыждыны! Ме нюжмасьтӧг мыжда тунасьысьясӧс, гозъякост олӧм пежалысьясӧс, пӧръясьӧмӧн кыв сетысьясӧс, найӧс, кодъяс оз мынтысьны уджалысьлы, дзескӧдӧны дӧваӧс да батьтӧм-мамтӧмӧс, ӧтдортӧны йӧз муысь локтысьӧс – ставнысӧ, кодъяс оз повны Меысь, – висьталӧ Господь Саваоф.

Дасӧд юкӧн сетӧм

⁶ Ме – Господь, Ме ог вежлась! И ті, Яковлӧн пиян, абу вежсьӧмныд.

⁷ Батьясныдлӧн кадсянь ті бергӧдчанныд Менам тшӧктӧмъясысь, онӧ олӧй на серти. Ӧні бӧр бергӧдчӧй Ме дінӧ, и Ме бергӧдча тіян дінӧ, – висьталӧ Господь Саваоф. – Но ті юаланныд, мыйла пӧ миянлы колӧ бӧрсӧ бергӧдчыны.

⁸ Вермас-ӧ морт мыйкӧ гусявны Енмыслысь? А ті гусяланныд Менсьым. Ті юаланныд, мый пӧ ми гусялам Тэнсьыд. Ті гусяланныд дасӧд юкӧннытӧ да мукӧд вайӧмторсӧ.

⁹ Ёрӧмӧн ёрӧма тіянӧс, ӧд ті, Израиль войтыр, гусяланныд Менсьым.

¹⁰ – Став дасӧд юкӧннытӧ вайӧй видзанінъясӧ, медым Менам керкаын вӧлі сёян. Татшӧм ногӧн тӧдмалӧй Менӧ, – висьталӧ Господь Саваоф. – Ме ӧмӧй ог восьт тіянлы енэжвыв ӧшиньяссӧ, ог ӧмӧй лышкыда кисьт тіян вылӧ бурсиӧмсӧ?

¹¹ Ме ог лэдз гагъяслы сёйны быдмӧгъяснытӧ, тіян виноградныд ӧтитӧг вотӧсалас, – висьталӧ Господь Саваоф. –

¹² Сэки войтыръяс шуасны тіянӧс майбыръясӧн, ӧд тіян муын олӧмыс лоӧ вывті бур, – висьталӧ Господь Саваоф.

Веськыда олысьяс босьтасны тырдон

¹³ Ті вежавидзтӧг сёрнитанныд Меным паныд, – висьталӧ Господь Саваоф. – Ті юаланныд, мый пӧ ми сёрнитам Тэныд паныдсӧ.

¹⁴ Ті шуанныд, Енлы кесъялӧмным пӧ миян весьшӧрӧ. Мый бурыс пӧ вӧлі сыысь, мый ми кутчысим Сылӧн тшӧктӧмъясӧ да ветлім шогалӧмӧн Господь Саваоф водзын.

¹⁵ Ми пӧ аддзам мӧдтор: вылӧ кыпӧдчысьяс шудаӧсь, лёк вӧчысьяслӧн олӧмас ставыс артмӧ, найӧ дӧзмӧдӧны Енсӧ, но кольӧны мыждытӧг.

¹⁶ Господьысь полысьяс кор сёрнитӧны ӧта-мӧдныскӧд, Господь аддзӧ да кылӧ тайӧс. Сылӧн чужӧмбан водзын казьтылан небӧгӧ гижӧны на йылысь, кодъяс полӧны Господьысь, кодъяс пыдди пуктӧны Сылысь нимсӧ.

¹⁷ Менам индӧм лунӧ найӧ лоӧны Менам войтырӧн, – висьталӧ Господь Саваоф. – Ме лоа на дінӧ бур сьӧлӧма, кыдзи бать бур сьӧлӧма аслас кывзысьысь пи дінӧ.

¹⁸ Сэки ті бара аддзанныд веськыда олысь да лёк вӧчысь костын торъялӧмсӧ, аддзанныд, коді кесъяліс Енмыслы, а коді эз кесъяв.