Лыд 5 - Коми Библия 2023

Сӧстӧм оласног йылысь тшӧктӧмъяс

¹ Господь шуис Мӧисейлы:

² «Израиль пиянлы тшӧкты вӧтлыны сувтанінысь быдӧнӧс, коді висьмӧ проказаӧн, кодлӧн вир-яяс эм лёквиялӧм либӧ коді шой дінӧ инмӧдчылӧм вӧсна лоӧ пеж.

³ Татшӧм айловӧс либӧ аньӧс вӧтлӧй сувтанін сайӧ, медым эз пежав оланінсӧ, кӧні Ме ола тіян пӧвстын».

⁴ Израиль пиян вӧтлісны татшӧм йӧзсӧ сувтанін сайӧ. Найӧ вӧчисны сідзи, кыдзи Господь тшӧктіс Мӧисейлы.

⁵ Господь шуис Мӧисейлы:

⁶ «Висьтав Израиль пиянлы: айлов либӧ ань кӧ лёк вӧчас мӧд мортлы, и тадзи Господь водзын лоӧ мыжа.

⁷ Аслас мыж вӧчӧм йылысь сійӧ мед висьтасяс, и кодлы паныд мыжсӧ вӧчис, сылы мед вештысяс. Вештысян дон дінӧ мед содтас доныслысь витӧд пайсӧ.

⁸ Но кулӧма кӧ нин сійӧ мортыс, кодлы паныд мыжсӧ вӧчис, и сылӧн кӧ абу матысса рӧдвужыс, и та вӧсна вештысьнысӧ некодлы, сэки мед вештысьӧ Господьлы. Тайӧ вештысян доныс лоӧ поплы. Поплы тшӧтш лоӧ меж, кодӧс колӧ вайны вись пыдди. Тадзи поп вештас мыж вӧчысьлысь мыжсӧ.

⁹ Израиль пиянлӧн став вежа вайӧмторйыс лоӧ поплы.

¹⁰ Ставсӧ, мый вайӧны поплы, кольӧ сылы».

¹¹ Господь шуис Мӧисейлы:

^12-14 «Висьтав Израиль пиянлы: гӧтырыс кӧ узяс мӧд айловкӧд, и тадзи пежалас асьсӧ да гозъякост олӧмсӧ, но аддзылысь ни эрдӧдысь оз ло, и верӧсыс оз тӧдмав, пежаліс-ӧ гӧтырыс асьсӧ али эз, но кутас вежӧгтыны гӧтырсӧ,

¹⁵ сэки верӧсыс мед вайӧдас гӧтырсӧ поп дінӧ. Гӧтырыс вӧсна вись пыдди мед ваяс ид пызь – ефалысь дасӧд юкӧнсӧ. Но пызяс мед оз кисьт олив вый, оз пукты сэтчӧ ладан, ӧд тайӧ вежӧгтӧмысь вайӧм нянь вись, казьтылан вайӧмтор, мый висьталӧ индӧд торкӧм йылысь.

¹⁶ Поп мед сувтӧдас сы дінӧ вайӧдӧм аньсӧ Господь водзӧ,

¹⁷ кисьтас гырнич дозйӧ вежа ва, и ваас мед шыбитас вежа чом джоджсьыс босьтӧм мутор.

¹⁸ Господь водзӧ аньӧс сувтӧдӧм бӧрын поп мед пӧрччӧдас аньлысь юрвевттьӧдсӧ да сетас сылы киас кутны казьтылан вайӧмторсӧ – вежӧгтӧмысь вайӧм нянь висьсӧ. Поп мед босьтас киас ёрӧмсӧ вайысь курыд ва

¹⁹ да тшӧктас аньлы кыв сетны, мый сійӧ кутас збыльсӧ висьтавны. Поп шуас аньлы: ”Эз кӧ узь тэкӧд мӧд морт, и тэ эн пӧръяв верӧстӧ да асьтӧ эн пежав, ёрӧмсӧ вайысь курыд ва юӧмысь тэныд лёкыс оз ло.

²⁰ Но тэ кӧ пӧръялін верӧстӧ да пежалін асьтӧ, кор тэкӧд узис мӧд морт, –

²¹ аньлӧн кыв сетӧм бӧрын поп мед водзӧ шуас, – Господь мед вӧчас тэкӧд сідзи, мый тэ лоан ёрӧм улын аслад войтыр пӧвстын. Тэнад гырк пытшкӧсыд мед нёпмунас да кынӧмыд мед пыктас,

²² кор ёрӧмсӧ вайысь ваыс пырас пытшкӧсад”. Ань мед шуас: ”Аминь, мед лоас тадзи”.

²³ Поп мед гижас ёран кывъяссӧ да гижӧдсӧ мыськас курыд ваас.

²⁴ Та бӧрын поп мед тшӧктас аньлы юны курыд васӧ, медым ёрӧмсӧ вайысь ваыс визувтас ань пытшкӧ.

²⁵ Поп мед босьтас ань киысь вежӧгтӧмысь вайӧм нянь висьсӧ да Господь водзын пыркӧдӧмӧн нуас сійӧс висьпуктанінӧ.

²⁶ Поп мед босьтас вайӧм нянь висьысь китыр пызь да сотас сійӧс казьтылан вись пыдди висьпуктанін вылын. Та бӧрын мед юкталас аньсӧ.

²⁷ Ань кӧ пежаліс асьсӧ да пӧръяліс верӧссӧ, сэки ёрӧмсӧ вайысь курыд ваыс кутас сьӧкыда мучитны сійӧс. Аньлӧн кынӧмыс пыктас да гырк пытшкӧсыс нёпмунас. Аслас войтыр пӧвстын аньыс лоӧ ёрӧмаӧн.

²⁸ Но ань кӧ эз пежав асьсӧ, и сійӧ кӧ сӧстӧм, сыкӧд нинӧм лёкыс оз ло, и сійӧ кутас вермыны кынӧмасьнысӧ.

²⁹ Тайӧ индӧдыс вежӧгтӧм йылысь, гӧтыр кӧ узяс мӧд айловкӧд да пежалас асьсӧ,

³⁰ либӧ верӧс кӧ кутас вежӧгтыны ассьыс гӧтырсӧ. Сэки верӧсыс мед вайӧдас гӧтырсӧ Господь водзӧ, и поп ставсӧ вӧчас тайӧ индӧдыс серти.

³¹ Верӧсыс абу мыжа, гӧтырыс ачыс кывкутас аслас мыж вӧсна».