Лыд 35 - Коми Библия 2023

Левитъяслы каръяс

¹ Моав ласта вылын Йӧрдан ю бокын, Ериконлы воча, Господь шуис Мӧисейлы:

² «Тшӧкты Израиль пиянлы, медым асланыс муысь сетасны левитъяслы олан каръяс да нагӧгӧрса видзьяс.

³ Каръясас найӧ кутасны овны, а видзьясыс лоӧны налӧн ыж-мӧслы йирсянінӧн.

⁴ Левитъяслы сетан видзьясыс мед нюжӧдчасны карса стен бердсянь [кык] сюрс гырддза ылна.

⁵ Карсянь асыввылын мурталӧй кык сюрс гырддза, лунвылын – кык сюрс гырддза, рытыввылын – кык сюрс гырддза, войвылын – кык сюрс гырддза, а шӧрас мед лоӧ карыс. Тайӧ карбердса видзьясыс левитъяслы.

⁶ Левитъяслы сетан каръяс пӧвстысь квайт карыс мед лоасны каръясӧн, кытчӧ лэдзанныд морт виысьяслы пышйыны. Тайӧ каръясысь ӧтдор сетӧй левитъяслы нӧшта нелямын кык кар.

⁷ Ставнас левитъяслы сетӧй нелямын кӧкъямыс кар да нагӧгӧрса видзьяс.

⁸ Кор Израиль пиянлӧн муысь кутанныд сетны левитъяслы каръяс, сэки ыджыдджык чужанкотыръяслысь босьтӧй унджыкӧс, а ичӧтджыкъяслысь – этшаджыкӧс. Быд чужанкотыр мед сетас левитъяслы каръяс аслас мулӧн ыджда серти».

Каръяс, кытчӧ позьӧ пышйыны

⁹ Господь тшӧктіс Мӧисейлы

¹⁰ висьтавны Израиль пиянлы: «Кор ті вуджанныд Йӧрдан ю да пыранныд Ханаан муӧ,

¹¹ бӧрйӧй аслыныд каръяс, кытчӧ вермас пышйыны быдӧн, коді мӧвпышттӧг виас мортӧс.

¹² Татшӧм карас виысь вермас пышйыны водзӧс перйысь мортысь, медым войтыр водзын мыждытӧг эз вӧв виӧма.

¹³ Тіян мед лоӧ квайт кар, кытчӧ вермас пышйыны морт виысь.

¹⁴ Куимсӧ торйӧдӧй Йӧрдан ю таладорысь, а мӧд куимсӧ – Ханаан муысь.

¹⁵ Тайӧ квайтнан карас вермасны пышйыны Израиль пиян, йӧз муысь локтысьяс да тіян ордӧ овмӧдчысьяс, мӧвпышттӧг кӧ виасны мортӧс.

¹⁶ Коді вачкас мӧд мортӧс кувмӧныс кӧртысь вӧчӧмторйӧн, сійӧ лоӧ морт виысьӧн, а морт виысьӧс колӧ вины.

¹⁷ Коді вачкас мӧд мортӧс кувмӧныс изйӧн, сійӧ лоӧ морт виысьӧн, а морт виысьӧс колӧ вины.

¹⁸ Коді вачкас мӧд мортӧс кувмӧныс пуысь вӧчӧмторйӧн, сійӧ лоӧ морт виысьӧн, а морт виысьӧс колӧ вины.

¹⁹ Вир кисьтӧм вӧсна водзӧс перйысь вермас вины морт виысьӧс сыкӧд паныдасигӧн.

²⁰ Коді скӧрйывсьыс йӧткыштас мортӧс либӧ тӧдӧмӧн мыйӧнкӧ лыяс, и мӧдыс кулас,

²¹ либӧ коді скӧрпырысь кинас вачкас, и мӧдыс кулас, сійӧс колӧ вины, ӧд сійӧ морт виысь. Вир кисьтӧм вӧсна водзӧс перйысь вермас вины морт виысьӧс сыкӧд паныдасигӧн.

²² Морт кӧ мӧвпышттӧг, оз лӧгпырысь, йӧткыштас мӧд мортӧс, либӧ мыйӧнкӧ лыйигас веськалас мӧд мортлы,

²³ либӧ мӧвпышттӧг уськӧдас из мӧд морт вылӧ, и сійӧ кулас, но морт виысь кӧ эз мустӧмтлы сійӧс да эз кӧсйыв лёксӧ сылы,

²⁴ сэки морт виысь да водзӧс перйысь костын венсӧ колӧ видлавны войтыр водзын тайӧ тшӧктӧмыс серти.

²⁵ Войтырыс мед доръяс морт виысьӧс водзӧс перйысьлӧн киысь да бӧр вайӧдас карӧ, кытчӧ сійӧ коркӧ пышйыліс. Сійӧ мед олас сэні вежа выйӧн мавтыштӧм аркирейлӧн кувтӧдз.

²⁶ А морт виысь кӧ петас карсьыс, кытчӧ пышйыліс,

²⁷ и водзӧс перйысь кӧ паныдалас сійӧс кар сайын да виас, сэки водзӧс перйысь оз ло мыжа вир кисьтӧмсьыс.

²⁸ Аркирей кувтӧдз морт виысьлы колӧ овны карас, кытчӧ сійӧ коркӧ пышйыліс. Сӧмын аркирейлӧн кулӧм бӧрын морт виысьлы позьӧ бӧр локны аслас муӧ.

²⁹ Чужысьяссянь чужысьясӧдз быдлаын олӧй тайӧ индӧд-тшӧктӧмъясыс серти.

³⁰ Морт виысьӧс вины позьӧ сӧмын сэки, кор эмӧсь аддзылысь-висьталысьяс. Ӧтилӧн висьталӧмыс абу тырмана, медым вины морт виысьӧс.

³¹ Энӧ босьтӧй вештысян донсӧ морт виысьлысь, кодӧс мыждӧма, ӧд сійӧс колӧ вины.

³² Энӧ босьтӧй вештысян донсӧ морт виысьлысь, коді аркирейлӧн кувтӧдзыс кӧсйӧ петны карысь, кытчӧ пышйыліс, да бӧр мунны аслас муӧ.

³³ Энӧ пежалӧй мунытӧ, кӧні ті кутанныд овны. Вир пежалӧ мусӧ, и муыс вермӧ сӧстӧммыны сӧмын вир кисьтысьлӧн вирӧн.

³⁴ Энӧ пежалӧй мунытӧ, кӧні Ме ола. Ӧд Ме, Господь, ола тіян пӧвстын».