Лыд 34 - Коми Библия 2023

Ханаан мудор

¹ Господь тшӧктіс Мӧисейлы

² висьтавны Израиль пиянлы: «Кор ті пыранныд Ханаан муӧ, сійӧ лоӧ тіян. Мудорыс нюжӧдчас тадзи.

³ Лунвыв мудорыс мунас Цин овтӧминсянь Эдом му бокті. Асыввылын сійӧ заводитчас Сола саридз лунвывладорсянь,

⁴ бергӧдчас Акравим ыблань да мунас Цин овтӧминӧд, кытшовтас лунвывсянь Кадеш-Варни, сэсянь мунас Хацар-Аддарӧ да водзӧ Ацмонӧ.

⁵ Ацмонсянь мудорыс нюжӧдчас Египет мудорса шорті саридз дорӧдз.

⁶ Рытыввыв мудорнас лоӧ Ыджыд саридз.

⁷ Войвыв мудорыс заводитчас Ыджыд саридз дорсянь да мунас Ор керӧсӧдз,

⁸ а Ор керӧссянь – Лево-Хаматӧ да водзӧ Цедадӧдз.

⁹ Сэтысянь мудорыс нюжӧдчас Зифронӧдз да воас Хацар-Энанӧдз. Тайӧ лоӧ тіян войвыв мудорныд.

¹⁰ Асыввыв мудорныд мед лоӧ Хацар-Энансянь Шефамӧдз,

¹¹ Шефамсянь сійӧ лэччас Ривлаӧдз, Айнсянь асыввылӧ, и сэсся водзӧ мунас Киннерет ты дорӧдз сылӧн асыввывладорсяньыс.

¹² Водзӧ мудорыс нюжӧдчас Йӧрдан ю пӧлӧн Сола саридз дорӧдз. Тайӧ тіян муныд да мудоръясныд».

¹³ Мӧисей тшӧктіс Израиль пиянлы: «Тайӧ мусӧ юклӧй пудъясьӧмӧн. Господь тшӧктіс сетны сійӧс ӧкмыс чужанкотырлы да [Манассейлӧн] джын чужанкотырлы.

¹⁴ Ӧд Рувим да Гад чужанкотыръяс да Манассейлӧн джын чужанкотырыс босьтісны нин ассьыныс пайсӧ.

¹⁵ Найӧ босьтісны мунысӧ Йӧрдан ю да Ерикон кар асыввылысь».

¹⁶ Господь шуис Мӧисейлы:

¹⁷ «Элазар поп да Навлӧн Исус пиыс кутасны юклыны тіян костын тайӧ мусӧ.

¹⁸ Нӧшта быд чужанкотырысь сувтӧдӧй ӧти юралысьӧс юклыны му:

¹⁹ Иуда чужанкотырысь Ефуннилысь Калев писӧ,

²⁰ Симеон чужанкотырысь Аммиудлысь Самуил писӧ,

²¹ Венямин чужанкотырысь Кислонлысь Элидад писӧ,

²² Дан чужанкотырысь Иоглилысь Букки писӧ,

²³ Ӧсипсянь чужысьясысь Манассей чужанкотырысь Эфодлысь Ханниэл писӧ,

²⁴ Ефрем чужанкотырысь Шифтанлысь Кемуэл писӧ,

²⁵ Завулон чужанкотырысь Парнаклысь Элицафан писӧ,

²⁶ Иссакар чужанкотырысь Аззанлысь Палтиэл писӧ,

²⁷ Асир чужанкотырысь Шеломилысь Ахиуд писӧ,

²⁸ Неффалим чужанкотырысь Аммиудлысь Педаэл писӧ».

²⁹ Тайӧ юралысьяслы Господь тшӧктіс юклыны Ханаан мусӧ Израиль пиян костын.