Лыд 33 - Коми Библия 2023

Овтӧминын сувтланінъяс

¹ Израиль пиянлӧн вӧліны татшӧм сувтланінъяс, кор найӧ Мӧисей да Аарон веськӧдлӧм улын тышкайӧз моз петісны Египет муысь.

² Овтӧминті мунӧм дырйи Мӧисей гижаліс налысь сувтланінъяссӧ Господьлӧн тшӧктӧм серти.

³ Медводдза тӧлысьлӧн дас витӧд лунӧ, Ыджыд лун бӧрти мӧд лунӧ, Израиль пиян петісны Рамсес карысь. Египетсаяслӧн син водзын найӧ мӧдӧдчисны туйӧ Господьлӧн нуӧдӧм улын.

⁴ Египетсаяс сэки гуалісны ассьыныс медводдза чужысьяссӧ, кодъясӧс Господь виис. Татшӧм ногӧн Господь мыждіс египетса енъясӧс.

⁵ Рамсес карысь мунӧм бӧрын Израиль пиян сувтісны чомъяснаныс Суккотӧ.

⁶ Суккотсянь мӧдӧдчисны водзӧ да сувтісны Этамӧ, овтӧмин бокӧ.

⁷ Этамысь мунӧм бӧрын бергӧдчисны Пи-Хахиротлань, мый Ваал-Цефон весьтын, да сувтісны чомъяснаныс Мигдол дорӧ.

⁸ Хахиротысь петӧм бӧрын вуджисны саридз да воисны овтӧминӧ. Этам овтӧминӧд мунісны куим лун, сэсся сувтісны чомъяснаныс Мараӧ.

⁹ Мараысь мунісны Элимӧ, кӧні вӧлі дас кык юкмӧс да сизимдас финик пу, да сувтісны сэтчӧ.

¹⁰ Элимысь мунӧм бӧрын сувтісны Гӧрд саридз бокӧ.

¹¹ Гӧрд саридз дорсянь мӧдӧдчисны Син овтӧминӧ да сувтісны сэтчӧ.

¹² Син овтӧминысь мунӧм бӧрын сувтісны Дофкаӧ.

¹³ Дофкаысь мунӧм бӧрын сувтісны Алушӧ.

¹⁴ Алушысь мунӧм бӧрын сувтісны Рефидимӧ. Сэні эз вӧв войтырыслы юан ваыс.

¹⁵ Рефидимысь найӧ мунісны Синай овтӧминӧ да сувтісны сэтчӧ.

¹⁶ Синай овтӧминысь мунӧм бӧрын сувтісны Киврот-Хаттааваӧ.

¹⁷ Киврот-Хаттааваысь мунӧм бӧрын сувтісны Хацеротӧ.

¹⁸ Хацеротысь мунӧм бӧрын сувтісны Ритмаӧ.

¹⁹ Ритмаысь мунӧм бӧрын сувтісны Риммон-Паресӧ.

²⁰ Риммон-Паресысь мунӧм бӧрын сувтісны Ливнаӧ.

²¹ Ливнаысь мунӧм бӧрын сувтісны Риссаӧ.

²² Риссаысь мунӧм бӧрын сувтісны Кегелатаӧ.

²³ Кегелатаысь мунӧм бӧрын сувтісны Шефер керӧс бокӧ.

²⁴ Шефер керӧс дорысь мунӧм бӧрын сувтісны Харадаӧ.

²⁵ Харадаысь мунӧм бӧрын сувтісны Макелотӧ.

²⁶ Макелотысь мунӧм бӧрын сувтісны Тахатӧ.

²⁷ Тахатысь мунӧм бӧрын сувтісны Тарахӧ.

²⁸ Тарахысь мунӧм бӧрын сувтісны Миткаӧ.

²⁹ Миткаысь мунӧм бӧрын сувтісны Хашмонаӧ.

³⁰ Хашмонаысь мунӧм бӧрын сувтісны Мосеротӧ.

³¹ Мосеротысь мунӧм бӧрын сувтісны Бене-Яаканӧ.

³² Бене-Яаканысь мунӧм бӧрын сувтісны Хор-Хагидгадӧ.

³³ Хор-Хагидгадысь мунӧм бӧрын сувтісны Иотватаӧ.

³⁴ Иотватаысь мунӧм бӧрын сувтісны Авронаӧ.

³⁵ Авронаысь мунӧм бӧрын сувтісны Эцион-Геверӧ.

³⁶ Эцион-Геверысь мунӧм бӧрын сувтісны Цин овтӧминӧ, [сэтысь мунӧм бӧрын сувтісны Паран овтӧминӧ,] Кадешӧ.

³⁷ Кадешысь мунӧм бӧрын сувтісны Ор керӧс бокӧ, Эдом мусянь матын.

³⁸ Господьлӧн тшӧктӧм серти Аарон поп кыпӧдчис Ор керӧс вылӧ, сэні сійӧ куліс. Тайӧ вӧлі Израиль пиянлӧн Египетысь петӧмсянь нелямынӧд вонас, витӧд тӧлысьлӧн медводдза лунӧ.

³⁹ Аарон вӧлі сё кызь куим арӧса, кор сійӧ куліс Ор керӧс вылын.

⁴⁰ Арад карлӧн ханаанса ӧксыыс, коді оліс Негев муын, Ханаанын, кыліс Израиль пиянлӧн локтӧм йылысь.

⁴¹ Ор керӧс дорысь мунӧм бӧрын Израиль пиян сувтісны чомъяснаныс Салмонаӧ.

⁴² Салмонаысь мунӧм бӧрын сувтісны Пунонӧ.

⁴³ Пунонысь мунӧм бӧрын сувтісны Овотӧ.

⁴⁴ Овотысь мунӧм бӧрын сувтісны Ийе-Аваримӧ, Моав мусянь матын.

⁴⁵ Ийимысь мунӧм бӧрын сувтісны Дивон-Гадӧ.

⁴⁶ Дивон-Гадысь мунӧм бӧрын сувтісны Алмон-Дивлатаимӧ.

⁴⁷ Алмон-Дивлатаимысь мунӧм бӧрын сувтісны Аварим керӧсъяс вылӧ, Нево керӧс бокӧ.

⁴⁸ Аварим керӧсъяс вылысь мунӧм бӧрын сувтісны Моав ласта вылӧ Йӧрдан ю дорӧ, Ериконлы воча.

⁴⁹ Моав ласта вылын найӧ паськӧдчисны чомъяснаныс Йӧрдан ю пӧлӧн Бет-Ешимотсянь Авел-Ситтимӧдз.

Му босьтӧм да юклӧм йылысь

⁵⁰ Моав ласта вылын Йӧрдан ю бокын, Ериконлы воча, Господь тшӧктіс Мӧисейлы

⁵¹ висьтавны Израиль пиянлы: «Кор ті вуджанныд Йӧрдан ю вомӧн Ханаан муӧ,

⁵² вӧтлӧй сэтысь став олысьсӧ. Жуглӧй налысь серпасалӧм изъяссӧ, сывдӧмӧн вӧчӧм бӧлбанъяссӧ да вись ваян мылькъяссӧ.

⁵³ Босьтӧй сійӧ мусӧ аслыныд да овмӧдчӧй сэтчӧ, ӧд тіянлы Ме сета сійӧс.

⁵⁴ Пудъясьӧмӧн юклӧй мусӧ чужанкотыръясныдлы. Кутшӧм чужанкотырын йӧзыс унджык, сэтшӧм чужанкотырлы сетӧй ыджыдджык му, а кутшӧм чужанкотырын йӧзыс этшаджык, сэтшӧм чужанкотырлы сетӧй ичӧтджык му. Пудъясьӧм серти кодлы кытысь усьӧ муыс, сэні и лоӧ сылӧн пайыс.

⁵⁵ Сэтчӧс олысьяссӧ кӧ ті онӧ вӧтлӧй, найӧ лоӧны тіянлы синтӧ сутшкысьясӧн да боктӧ бытшкысьясӧн. Найӧ дзескӧдасны тіянӧс муын, кӧні ті кутанныд овны.

⁵⁶ И мый Ме шуи вӧчны накӧд, вӧча тіянкӧд».