Лыд 3 - Коми Библия 2023

Левитъяс йылысь

¹ Со Ааронлӧн да Мӧисейлӧн рӧдъясыс сійӧ кадас, кор Господь сёрнитіс Мӧисейкӧд Синай керӧсын.

² Аарон пиянлӧн нимъясыс: Надав, медводдза чужысьыс, сэсся Авиуд, Элазар да Итамар.

³ Найӧс вӧлі мавтыштӧма да сувтӧдӧма кесъявны попъясӧн.

⁴ Но Господь водзӧ мӧд би вайӧм вӧсна Надав да Авиуд кулісны Господь водзын Синай овтӧминын. Налӧн эз вӧв ныв-пиыс. Аарон батьныс веськӧдлӧм улын Элазар да Итамар водзӧ кесъялісны попъясӧн.

⁵ Господь шуис Мӧисейлы:

⁶ «Левийлысь чужанкотырсӧ сувтӧд Аарон поп веськӧдлӧм улӧ. Найӧ мед отсасясны сылы.

⁷ Найӧ мед кесъяласны Аарон да став войтырыс пыдди вежа чом бердын.

⁸ Найӧ мед видзасны вежаинса став дозмук-кӧлуйсӧ да кесъяласны вежа чом бердын Израиль пиян пыдди.

⁹ Левитъяс мед кесъяласны Ааронлӧн да пияныслӧн веськӧдлӧм улын, ӧд Израиль пиян пӧвстысь найӧс сувтӧдӧма отсасьны Ааронлы.

¹⁰ Ааронлы пияныскӧд тшӧкты [видзӧдны вежа чом бӧрся да] кесъявны попъясӧн. [Найӧ мед видзӧдасны ставыс бӧрся, мый эм висьпуктанін гӧгӧр да Вежаинын ӧшалысь дӧра сайын.] Но бокыса морт кӧ матыстчас вежа чом дорӧ, сійӧс лоӧ виӧма».

¹¹ Господь шуис Мӧисейлы:

¹² «Израиль пиян пӧвстысь Ме торйӧді Аслым левитъясӧс. Израильса аньяслӧн медводдза чужысь пиян пыдди левитъяс лоӧны Менам,

¹³ ӧд став медводдза чужысьыс – Менам. Сійӧ лунӧ, кор Ме бырӧді египетса став медводдза чужысьсӧ, Ме вежӧді-торйӧді Аслым Израиль войтырлысь став медводдза ай чужысьсӧ: йӧзӧс и ыж-мӧскӧс. Найӧ – Менам. Ме – Господь».

¹⁴ Синай овтӧминын Господь шуис Мӧисейлы:

¹⁵ «Гижав Левий чужанкотырысь тӧлысьысь ыджыдджык арлыда став айуловсӧ рӧд да котыр сертиныс».

¹⁶ Господьлӧн тшӧктӧм серти Мӧисей [Ааронкӧд] гижаліс найӧс.

¹⁷ Левий пиянлӧн нимъясыс: Гирсон, Кааф да Мерари.

¹⁸ Гирсонлӧн пияныс да насянь петысь рӧдъясыс: Ливни да Шимей.

¹⁹ Каафлӧн пияныс да насянь петысь рӧдъясыс: Амрам, Ицгар, Хеврон да Узиэл.

²⁰ Мерарилӧн пияныс да насянь петысь рӧдъясыс: Махли да Муши. Ставыс тайӧ – Левий чужанкотырысь рӧдъяс.

²¹ Гирсонсянь петӧны Ливнилӧн да Шимейлӧн рӧдъясыс.

²² Лыддьӧм-арталӧм бӧрын тӧлысьысь ыджыдджык арлыда айуловлӧн лыдыс вӧлі сизим сюрс витсё морт.

²³ Гирсонлӧн рӧдъяслы ассьыныс чомъяснысӧ колӧ вӧлі сувтӧдны вежа чом сайӧ рытыввылӧ.

²⁴ Гирсонсянь чужысьясӧн веськӧдліс Лаэллӧн Эльясат пиыс.

²⁵ Найӧ кывкутісны вежа чом вӧсна, сылӧн вевттьӧд да пыранінас ӧшалысь дӧра вӧсна,

²⁶ вежа чом йӧр да висьпуктанін тупкан дӧраяс вӧсна, йӧр пыранінын ӧшалысь дӧра вӧсна да дӧра йитлан гезъяс вӧсна, тӧждысисны вежа чом разялӧм-сувтӧдӧм вӧсна.

²⁷ Каафсянь петӧны Амрамлӧн, Ицгарлӧн, Хевронлӧн да Узиэллӧн рӧдъясыс.

²⁸ Лыддьӧм-арталӧм бӧрын тӧлысьысь ыджыдджык арлыда айуловлӧн лыдыс вӧлі кӧкъямыс сюрс квайтсё морт. Найӧ кывкутісны вежаин вӧсна.

²⁹ Каафлӧн рӧдъяслы ассьыныс чомъяснысӧ колӧ вӧлі сувтӧдны вежа чомсянь лунвывладорӧ.

³⁰ Каафсянь чужысьясӧн веськӧдліс Узиэллӧн Элицафан пиыс.

³¹ Найӧ кывкутісны-тӧждысисны Йитӧд куд вӧсна, пызан, бикок да висьпуктанінъяс вӧсна, кесъялан вежа дозмук-кӧлуй вӧсна да Вежаинын ӧшалысь дӧра вӧсна.

³² Левитъяслӧн веськӧдлысьяс бӧрся видзӧдіс Аарон поплӧн Элазар пиыс. Сылӧн веськӧдлӧм улын вӧліны йӧз, кодъяс кывкутісны вежаин вӧсна.

³³ Мерарисянь петӧны Махлилӧн да Мушилӧн рӧдъясыс.

³⁴ Лыддьӧм-арталӧм бӧрын тӧлысьысь ыджыдджык арлыда айуловлӧн лыдыс вӧлі квайт сюрс кыксё морт.

³⁵ Мерарисянь чужысьясӧн веськӧдліс Абихайллӧн Цуриэл пиыс. Ассьыныс чомъяснысӧ налы колӧ вӧлі сувтӧдны вежа чомсянь войвывладорӧ.

^36-37 Найӧ кывкутісны вежа чомлӧн брусъяс, потшъяс, сюръяяс, подувъяс да кӧлуй вӧсна, йӧр сюръяяс да налӧн подувъяс, майӧгъяс да гезъяс вӧсна, тӧждысисны вежа чом разялӧм-сувтӧдӧм вӧсна.

³⁸ Вежа чом водзӧ асыввылӧ сувтӧдісны чомъяссӧ Мӧисей да Аарон пияныскӧд, кодъяс Израиль пиян пыдди кывкутісны вежаин вӧсна. Вежа чом дорӧ матыстчысь бокыса мортӧс колӧ вӧлі вины.

³⁹ Господьлӧн тшӧктӧм серти Мӧисей да Аарон арталісны-гижалісны Левий чужанкотырысь тӧлысьысь ыджыдджык арлыда айуловӧс рӧдныс серти. Левитъяслӧн лыдыс вӧлі кызь кык сюрс морт.

⁴⁰ Господь тшӧктіс Мӧисейлы: «Артав-гижав Израиль войтырысь тӧлысьысь ыджыдджык арлыда медводдза чужысь айуловсӧ.

⁴¹ Торйӧд Меным левитъясӧс Израиль войтырлӧн став медводдза ай чужысьыс пыдди. Левитъяслысь ыж-мӧссӧ торйӧд Меным Израиль войтырлӧн медводдза чужысь ыж-мӧскыс пыдди. Ме – Господь».

⁴² Мӧисей арталіс-гижаліс Израиль пиян пӧвстысь став медводдза чужысьсӧ, кыдзи тшӧктіс сылы Господь.

⁴³ Тӧлысьысь ыджыдджык арлыда медводдза чужысь айуловлӧн лыдыс вӧлі кызь кык сюрс кыксё сизимдас куим морт.

⁴⁴ Господь шуис Мӧисейлы:

⁴⁵ «Торйӧд Меным левитъясӧс Израиль войтырлӧн став медводдза ай чужысьыс пыдди. Левитъяслысь ыж-мӧссӧ торйӧд Меным Израиль войтырлӧн медводдза чужысь ыж-мӧскыс пыдди. Левитъясыс мед лоасны Менам. Ме – Господь.

⁴⁶ Сы вӧсна, мый левитъяс дорысь Израиль войтырлӧн медводдза чужысьыс кыксё сизимдас куим морт вылӧ унджык, наысь колӧ мынтысьны,

⁴⁷ быдӧнысь – вит сикель эзысь вежаинса сикель серти. Ӧти сикельын – кызь гера.

⁴⁸ Тайӧ эзысьсӧ сет Ааронлы да сылӧн пияныслы».

⁴⁹ Сыысь, мый израильса медводдза чужысьясыс вӧліны левитъясысь унджык, Мӧисей чукӧртіс

⁵⁰ сюрс куимсё квайтымын вит сикель эзысь вежаинса сикель серти.

⁵¹ Мӧисей сетіс эзысьсӧ Ааронлы да сылӧн пияныслы, кыдзи тшӧктіс сылы Господь.