Лыд 29 - Коми Библия 2023

¹ Сизимӧд тӧлысьлӧн медводдза лунӧ тіян мед лоӧ вежа чукӧртчӧм. Некутшӧм удж сэки энӧ вӧчӧй. Сійӧ лунӧ буксӧй буксанӧн.

² Господьлы чӧскыда ӧвтысь сотан вись пыдди вайӧй дзоньвидза ӧшкӧс, межӧс да арӧса сизим баляӧс.

³ Накӧд ӧтлаын нянь вись пыдди вайӧй олив выйӧн гудралӧм шобді пызь. Ефа мында пызьсӧ юкӧй дас пельӧ, сэтысь вайӧй куимсӧ быд ӧшкӧд, кыксӧ межкӧд,

⁴ а быд балякӧд вайӧй ефалысь дасӧд юкӧнсӧ.

⁵ Мыжысь вись пыдди вайӧй ай кӧзаӧс, медым вештыны мыжнытӧ.

⁶ Ставсӧ тайӧс вайӧй Господьлы чӧскыда ӧвтан вись пыдди сотан висьысь, нянь висьысь да вина висьысь ӧтдор, мый ваянныд быд лунӧ да выль тӧлысь чужигӧн.

⁷ Сизимӧд тӧлысьлӧн дасӧд лунӧ тіян мед лоӧ вежа чукӧртчӧм. Сэки раммӧдчӧй-видзалӧй, некутшӧм удж энӧ вӧчӧй.

⁸ Господьлы чӧскыда ӧвтысь сотан вись пыдди вайӧй ӧшкӧс, межӧс да арӧса сизим баляӧс, найӧ мед вӧліны дзоньвидзаӧсь.

⁹ Накӧд ӧтлаын нянь вись пыдди вайӧй олив выйӧн гудралӧм шобді пызь. Ефа мында пызьсӧ юкӧй дас пельӧ, сэтысь вайӧй куимсӧ быд ӧшкӧд, кыксӧ межкӧд,

¹⁰ а быд балякӧд вайӧй ефалысь дасӧд юкӧнсӧ.

¹¹ Мыж вештан висьысь ӧтдор да быдлунся сотан висьысь, нянь висьысь да вина висьысь ӧтдор [мый ваянныд Господьлы чӧскыда ӧвтан вись пыдди], нӧшта вайӧй мыжысь вись пыдди ай кӧзаӧс.

¹² Сизимӧд тӧлысьлӧн дас витӧд лунӧ тіян мед лоӧ вежа чукӧртчӧм. Некутшӧм удж сэки энӧ вӧчӧй. Сизим лун чӧж пасйӧй Господьлы сиӧм гаж.

¹³ Тайӧ гажыслӧн медводдза луннас вайӧй Господьлы чӧскыда ӧвтысь сотан вись пыдди дзоньвидза дас куим ӧшкӧс, кык межӧс да арӧса дас нёль баляӧс.

¹⁴ Накӧд ӧтлаын нянь вись пыдди вайӧй олив выйӧн гудралӧм шобді пызь. Ефа мында пызьсӧ юкӧй дас пельӧ, сэтысь вайӧй куимсӧ быд ӧшкӧд, кыксӧ межкӧд,

¹⁵ а быд балякӧд вайӧй ефалысь дасӧд юкӧнсӧ.

¹⁶ Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.

¹⁷ Мӧд луннас вайӧй дзоньвидза дас кык ӧшкӧс, кык межӧс да арӧса дас нёль баляӧс.

¹⁸ Ӧш, меж да баля лыд серти накӧд ӧтлаын вайӧй колана мында нянь вись да вина вись, кыдзи тшӧктӧма.

¹⁹ Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.

²⁰ Коймӧд луннас вайӧй дзоньвидза дас ӧти ӧшкӧс, кык межӧс да арӧса дас нёль баляӧс.

²¹ Ӧш, меж да баля лыд серти накӧд ӧтлаын вайӧй колана мында нянь вись да вина вись, кыдзи тшӧктӧма.

²² Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.

²³ Нёльӧд луннас вайӧй дзоньвидза дас ӧшкӧс, кык межӧс да арӧса дас нёль баляӧс.

²⁴ Ӧш, меж да баля лыд серти накӧд ӧтлаын вайӧй колана мында нянь вись да вина вись, кыдзи тшӧктӧма.

²⁵ Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.

²⁶ Витӧд луннас вайӧй дзоньвидза ӧкмыс ӧшкӧс, кык межӧс да арӧса дас нёль баляӧс.

²⁷ Ӧш, меж да баля лыд серти накӧд ӧтлаын вайӧй колана мында нянь вись да вина вись, кыдзи тшӧктӧма.

²⁸ Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.

²⁹ Квайтӧд луннас вайӧй дзоньвидза кӧкъямыс ӧшкӧс, кык межӧс да арӧса дас нёль баляӧс.

³⁰ Ӧш, меж да баля лыд серти накӧд ӧтлаын вайӧй колана мында нянь вись да вина вись, кыдзи тшӧктӧма.

³¹ Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.

³² Сизимӧд луннас вайӧй дзоньвидза сизим ӧшкӧс, кык межӧс да арӧса дас нёль баляӧс.

³³ Ӧш, меж да баля лыд серти накӧд ӧтлаын вайӧй колана мында нянь вись да вина вись, кыдзи тшӧктӧма.

³⁴ Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.

³⁵ Кӧкъямысӧд луннас тіян мед лоӧ вежа чукӧртчӧм. Некутшӧм удж сэки энӧ вӧчӧй.

³⁶ Господьлы чӧскыда ӧвтысь сотан вись пыдди вайӧй дзоньвидза ӧшкӧс, межӧс да арӧса сизим баляӧс.

³⁷ Ӧш, меж да баля лыд серти накӧд ӧтлаын вайӧй колана мында нянь вись да вина вись, кыдзи тшӧктӧма.

³⁸ Мыжысь вись пыдди вайӧй ай кӧзаӧс. Тайӧ висьяссӧ вайӧй быдлунся сотан висьысь, нянь висьысь да вина висьысь ӧтдор.

³⁹ Тайӧ висьяссӧ вайӧй Господьлы гажӧдчан лунъясныд дырйи сыысь ӧтдор, мый ваянныд сотан вись, нянь вись, вина вись да бурасян вись пыдди, лоӧ-ӧ висьныд кыв сетан вись либӧ ас кӧсйӧм серти ваян вись».