Лыд 25 - Коми Библия 2023

Израиль войтыр юрбитӧ идолъяслы

¹ Ситтим ковтысын олігӧн израильсаяс кутісны кырсавны моавса нывъяскӧд.

² Моавса нывъяс корлывлісны израильса айуловӧс сёйны асланыс енъяслы вайӧм висьяс. Найӧ сёйлісны да юрбитлісны моавсаяслӧн енъяслы.

³ Израиль войтыр сьӧлӧмнас сирасис Ваал-Пеор идол дінӧ, и Господь скӧрмис таысь на вылӧ.

⁴ Господь шуис Мӧисейлы: «Чукӧрт войтырлысь веськӧдлысьяссӧ да ставныслы аддзымӧнъя Ме водзын ӧшӧд найӧс пу вылӧ. Та бӧрын Менам скӧрлунӧй вешъяс Израиль войтыр дінысь».

⁵ Мӧисей висьталіс израильса ёрдысьяслы: «Виӧй быдӧнӧс, коді сьӧлӧмнас сирасис Ваал-Пеор идол дінӧ».

⁶ Кор Мӧисей да став Израиль войтыр бӧрдісны вежа чом пыранін водзын, найӧ аддзисны, кыдзи израильса морт локтӧ вокъясыс дінӧ мадианса анькӧд.

⁷ Сэки Пинес, Аарон поплӧн Элазар пиыслӧн пиыс, петіс войтыр чукӧрысь да босьтіс киас шы.

⁸ Пинес муніс тайӧ израильса морт бӧрсяыс, пырис сылӧн чомйӧ, сатшкис сійӧс да мадианса аньӧс кынӧмас. Та бӧрын Израиль пиянӧс бырӧдӧмыс лӧнис.

⁹ Бырӧдӧмаяслӧн лыдыс вӧлі кызь нёль сюрс морт.

¹⁰ Господь шуис Мӧисейлы:

¹¹ «Пинес, Аарон поплӧн Элазар пиыслӧн пиыс, вештіс Израиль пиян вылысь Менсьым скӧрлунӧс. Ме пыдди сійӧ водзӧс перйис, медым вежӧгтігӧн Ме эг бырӧд Израиль войтырӧс.

¹² Висьтав Пинеслы, мый Ме кӧртала сыкӧд йитӧд да сета сылы став бурсӧ.

¹³ Тайӧ йитӧд сертиыс сылы да сысянь чужысьяслы нэмъяс кежлӧ шуӧма кесъявны попъясӧн. Ӧд сійӧ петкӧдліс аслас Ен вӧсна вежӧгтӧмсӧ, и тадзи вештіс Израиль пиянлысь мыжсӧ».

¹⁴ Мадианса анькӧд виӧм израильса морт вӧлі Зимри, Симеон чужанкотырысь Салу юралысьлӧн пиыс.

¹⁵ Виӧм мадианса аньӧс шуисны Козби, сылӧн батьыс вӧлі Цур, мадианса чужанкотырлӧн юралысь.

¹⁶ Господь шуис Мӧисейлы:

¹⁷ «Уськӧдчӧй мадиансаяс вылӧ да виалӧй найӧс.

¹⁸ Ӧд вӧрӧг моз найӧ ылӧдлісны тіянӧс, наяна ышӧдісны юрбитны асланыс Пеор идоллы. Тайӧс вӧчисны мадианса юралысьлӧн Козби ныв отсӧгӧн. Пинес виис тайӧ аньсӧ, кор Пеор идоллы юрбитӧм вӧсна Израиль войтырӧс суис бырӧдӧм».