Лыд 20 - Коми Библия 2023

Изкыртаысь петӧ ва

¹ Медводдза тӧлысьнас Израиль войтыр воис Цин овтӧминӧ. Найӧ сувтісны Кадешӧ. Сэні куліс Мирьям, и сійӧс дзебисны сэтчӧ.

² Войтырыслы эз вӧв ваыс. Найӧ паныд кыпӧдчисны Мӧисейлы да Ааронлы,

³ шуасисны Мӧисей вылӧ: «Бурджык эськӧ вӧлі, ми кӧ тшӧтш кулім, кор вокъясным кулісны Господь водзын!

⁴ Мыйла ті вайӧдінныд Господьлысь войтырсӧ тайӧ овтӧминас? Кӧсъянныд, медым ми да ыж-мӧсным тані кулім?

⁵ Мыйла ті петкӧдінныд миянӧс Египетысь? Ті вайӧдінныд миянӧс тайӧ шогмытӧм муас, кӧні оз быдмы нянь! Тані оз быдмы инжир, ни виноград, ни гранат пуяс. Весиг юан ваыс абу!»

⁶ Мӧисей да Аарон колисны войтырсӧ да мунісны вежа чом пыранін дорӧ. Сэні найӧ кымынь уськӧдчисны муас, и Господьлӧн дзирдлуныс петкӧдчис налы.

⁷ Господь шуис Мӧисейлы:

⁸ «Босьт вежа чомйысь бедьсӧ. Аарон вокыдкӧд чукӧртӧй войтырсӧ. Налӧн син водзын изкыртаыслы шуӧй, медым сетас ва. Изкыртаысь ыльӧбтас ва. Тадзи тэ юкталан войтырсӧ да налысь ыж-мӧссӧ».

⁹ Господьлӧн тшӧктӧм серти Мӧисей босьтіс Господь водзӧ пуктӧм бедьсӧ.

¹⁰ Сэсся Мӧисей Ааронкӧд чукӧртісны изкырта дінӧ войтырсӧ. Мӧисей шуис: «Кывзӧй, паныд кыпӧдчысьяс! Миянлы ӧмӧй тайӧ изкыртасьыс перйыны тіянлы васӧ?»

¹¹ Мӧисей кыпӧдіс кисӧ да кыкысь вачкис бедьнас изкыртаӧ, и сэтысь ыльӧбтіс ва. Войтырыс да налӧн ыж-мӧсныс пӧттӧдзныс юисны.

¹² Но Господь шуис Мӧисейлы да Ааронлы: «Ті энӧ эскӧй Меным, энӧ лыддьӧй Менӧ вежаӧн. Израиль пиян водзын ті торкинныд Менсьым шуӧмӧс. Та вӧсна тайӧ войтырсӧ ті онӧ пыртӧй сійӧ муас, мый Ме сета налы».

¹³ Ва петанінсӧ нимтісны Мериваӧн. Сэні Израиль пиян вензисны Господькӧд, и Господь петкӧдліс налы Ассьыс вежалунсӧ.

Израиль войтырлы оз лэдзны мунны Эдом муӧд

¹⁴ Кадешсянь Мӧисей ыстіс ӧткымын мортӧс эдомса ӧксы дінӧ висьтавны: «Тадзи висьталӧ тэнад Израиль вокыд. Тэ тӧдан, мыйта сьӧкыдсӧ ковмис нуны миянлы.

¹⁵ Батьясным локтісны Египетӧ, и сэні ми дыр кад олім. Египетсаяс нартитісны миянӧс да миянлысь батьяснымӧс.

¹⁶ Но кор ми шыасим Господь дінӧ, Сійӧ кыліс миянӧс да мӧдӧдіс анделсӧ, медым петкӧдны миянӧс Египетысь. Ӧні ми сулалам Кадеш карын, кысянь заводитчӧ тэнад муыд.

¹⁷ Лэдз миянӧс мунны тэнад муӧд. Ми огӧ талялӧй видз-муястӧ да виноград йӧръястӧ, огӧ юӧй юкмӧсъясысь ватӧ. Ми мунам Ӧксыяслӧн туйӧд, огӧ кежӧй сэтысь веськыдвылӧ ни шуйгавылӧ, кытчӧдз огӧ петӧй тэнад муысь».

¹⁸ Эдомсаяс вочавидзисны: «Миян муӧд ті онӧ мунӧй! Татчӧ кӧ локтанныд, ми тіянӧс шыпуртӧн паныдалам!»

¹⁹ Израиль пиян шуисны: «Ми мунам шӧр туйӧдыс. А кутам кӧ юны ватӧ да ыж-мӧснымӧс юктавны, ми мынтысям. Миянлы нинӧм оз ков, сӧмын лэдзӧй миянлы водзӧ мунны».

²⁰ Но эдомсаяс вочавидзисны: «Миян муӧд ті онӧ мунӧй!» Найӧ мӧдӧдісны уна лыда да вына тышкайӧзӧс израильсаяслы паныд.

²¹ Тадзи эдомсаяс эз лэдзны Израиль войтырлы мунны налӧн муӧд. Израильсаяс мӧдӧдчисны мӧд туйӧд.

Ааронлӧн кулӧм

²² Кадешысь мунӧм бӧрын Израиль войтыр матыстчис Ор керӧс бокӧ.

²³ Эдом му сайын, Ор керӧс бокын Господь шуис Мӧисейлы да Ааронлы:

²⁴ «Мерива ва петанінын ті энӧ кывзысьӧй Менсьым. Та вӧсна Аарон оз пыр сійӧ муас, мый Ме сета Израиль пиянлы. Сылы кад воис вуджны батьясыс дінӧ.

²⁵ Босьт аскӧдыд Аарон воктӧ да сылысь Элазар писӧ и [став войтырыс водзын] кай накӧд Ор керӧс вылӧ.

²⁶ Пӧрччӧд Ааронлысь вежа паськӧмсӧ да пасьтӧд сыӧн Элазар писӧ. Аарон кулас да вуджас батьясыс дінӧ».

²⁷ Мӧисей вӧчис Господьлӧн тшӧктӧм серти. Став войтырлӧн син водзын Мӧисей, Аарон да Элазар кайисны Ор керӧс вылӧ.

²⁸ Сэні Мӧисей пӧрччӧдіс Ааронлысь вежа паськӧмсӧ да пасьтӧдіс сылысь Элазар писӧ. Аарон куліс керӧс вылын, а Мӧисей Элазаркӧд лэччисны сэтысь.

²⁹ Ааронлӧн кулӧм йылысь тӧдмалӧм бӧрын Израиль войтыр бӧрдіс сы вӧсна комын лун чӧж.