Лыд 2 - Коми Библия 2023

Чужанкотыръяс серти чомъяс сувтӧдалӧм

¹ Господь шуис Мӧисейлы да Ааронлы:

² «Израиль пиян пӧвстысь быдӧн мед сувтӧдас чомсӧ аслас чужанкотырлӧн дӧрапас улӧ да аслас рӧдыслӧн пас улӧ. Чомъяснас мед паськӧдчасны вежа чом гӧгӧрыс.

³ Вежа чомсянь асыввылӧ аслас дӧрапас улӧ чомъяссӧ мед паськӧдас Иуда чужанкотыр аслас тышкайӧзнас. Иуда чужанкотырлӧн юралысьыс – Аминадавлӧн Наашон пиыс.

⁴ Сылӧн вӧлі сизимдас нёль сюрс квайтсё тышкаморт.

⁵ Иуда чужанкотыркӧд орччӧн чомъяссӧ мед паськӧдас Иссакар чужанкотыр. Налӧн юралысьыс – Цуарлӧн Нафанаил пиыс.

⁶ Сылӧн вӧлі ветымын нёль сюрс нёльсё тышкаморт.

⁷ Асыввылӧ чомъяссӧ мед паськӧдас тшӧтш Завулон чужанкотыр. Налӧн юралысьыс – Хелонлӧн Элиав пиыс.

⁸ Сылӧн вӧлі ветымын сизим сюрс нёльсё тышкаморт.

⁹ Ставнас Иуда чужанкотыр улын вӧлі сё кӧкъямысдас квайт сюрс нёльсё тышкаморт. Найӧ мед петасны туйӧ медводдзаясӧн.

¹⁰ Вежа чомсянь лунвылӧ аслас дӧрапас улӧ чомъяссӧ мед паськӧдас Рувим чужанкотыр аслас тышкайӧзнас. Рувим чужанкотырлӧн юралысьыс – Шедеурлӧн Элицур пиыс.

¹¹ Сылӧн вӧлі нелямын квайт сюрс витсё тышкаморт.

¹² Рувим чужанкотыркӧд орччӧн чомъяссӧ мед паськӧдас Симеон чужанкотыр. Налӧн юралысьыс – Цуришаддайлӧн Шелумиэл пиыс.

¹³ Сылӧн вӧлі ветымын ӧкмыс сюрс куимсё тышкаморт.

¹⁴ Лунвылӧ чомъяссӧ мед паськӧдас тшӧтш Гад чужанкотыр. Налӧн юралысьыс – Регуэллӧн Эльясат пиыс.

¹⁵ Сылӧн вӧлі нелямын вит сюрс квайтсё ветымын тышкаморт.

¹⁶ Ставнас Рувим чужанкотыр улын вӧлі сё ветымын ӧти сюрс нёльсё ветымын тышкаморт. Найӧ мед петасны туйӧ мӧдӧн.

¹⁷ Левитъяс асланыс котыръясӧн туйӧ петіганыс мед сувтасны чужанкотыръяс шӧракостӧ да нуасны вежа чомсӧ. Кыдзи чужанкотыръяс чомъяснас паськӧдчӧны сувтанінын, сідзи найӧ сьӧрсьӧн-бӧрсьӧн мед петасны туйӧ асланыс дӧрапас улын.

¹⁸ Вежа чомсянь рытыввылӧ аслас дӧрапас улӧ чомъяссӧ мед паськӧдас Ефрем чужанкотыр аслас тышкайӧзнас. Ефрем чужанкотырлӧн юралысьыс – Аммиудлӧн Элишам пиыс.

¹⁹ Сылӧн вӧлі нелямын сюрс витсё тышкаморт.

²⁰ Ефрем чужанкотыркӧд орччӧн чомъяссӧ мед паськӧдас Манассей чужанкотыр. Налӧн юралысьыс – Педацурлӧн Гамалиэл пиыс.

²¹ Сылӧн вӧлі комын кык сюрс кыксё тышкаморт.

²² Рытыввылӧ чомъяссӧ мед паськӧдас тшӧтш Венямин чужанкотыр. Налӧн юралысьыс – Гидеонилӧн Авидан пиыс.

²³ Сылӧн вӧлі комын вит сюрс нёльсё тышкаморт.

²⁴ Ставнас Ефрем чужанкотыр улын вӧлі сё кӧкъямыс сюрс сё тышкаморт. Найӧ мед петасны туйӧ коймӧдӧн.

²⁵ Вежа чомсянь войвылӧ аслас дӧрапас улӧ чомъяссӧ мед паськӧдас Дан чужанкотыр аслас тышкайӧзнас. Дан чужанкотырлӧн юралысьыс – Аммишаддайлӧн Ахиэзер пиыс.

²⁶ Сылӧн вӧлі квайтымын кык сюрс сизимсё тышкаморт.

²⁷ Дан чужанкотыркӧд орччӧн чомъяссӧ мед паськӧдас Асир чужанкотыр. Налӧн юралысьыс – Окранлӧн Пагиэл пиыс.

²⁸ Сылӧн вӧлі нелямын ӧти сюрс витсё тышкаморт.

²⁹ Войвылӧ чомъяссӧ мед паськӧдас тшӧтш Неффалим чужанкотыр. Налӧн юралысьыс – Энанлӧн Ахир пиыс.

³⁰ Сылӧн вӧлі ветымын куим сюрс нёльсё тышкаморт.

³¹ Ставнас Дан чужанкотыр улын вӧлі сё ветымын сизим сюрс квайтсё тышкаморт. Найӧ мед петасны туйӧ асланыс дӧрапас улын медбӧръяӧн».

³² Израиль пиянӧс вӧлі арталӧма налӧн котыр сертиныс. Став тышкайӧзыслӧн лыдыс вӧлі квайтсё куим сюрс витсё ветымын морт.

³³ Левитъясӧс Израиль пиянкӧд эз артавны, ӧд тадзи Господь тшӧктіс Мӧисейлы.

³⁴ Израиль пиян ставсӧ вӧчисны сідзи, кыдзи Господь тшӧктіс Мӧисейлы. Чомъяснысӧ найӧ сувтӧдлісны асланыс дӧрапас улӧ, а туйӧ петіганыс быдӧн муніс аслас чужанкотырыскӧд да рӧдыскӧд.