Лыд 14 - Коми Библия 2023

Израиль войтыр асныралӧ

¹ Став войтырыс кутіс гораа ырзӧмӧн бӧрдны. Найӧ войбыд бӧрдісны.

² Став Израиль войтырыс шуасис Мӧисей да Аарон вылӧ: «Бурджык, ми кӧ кулім Египетын! Бурджык, ми кӧ кулам тайӧ овтӧминас!

³ Мыйла Господь нуӧдӧ миянӧс Ханаан муӧ? Сэні ми шыпурт помысь кулам, а гӧтыръясным да ныв-пиным шедасны вӧрӧг киӧ! Гашкӧ, бурджык бӧр бергӧдчыны Египетӧ?»

⁴ Йӧзыс ӧта-мӧдныслы кутісны шуавны: «Бӧръям аслыным выль веськӧдлысьӧс да бӧр бергӧдчам Египетӧ!»

⁵ Мӧисей да Аарон кымынь уськӧдчисны муӧ став Израиль войтыр водзӧ.

⁶ Навлӧн Исус пиыс да Ефуннилӧн Калев пиыс, кодъяс мукӧдыскӧд ветлісны видзӧдлыны Ханаан му, косялісны паськӧмнысӧ

⁷ да шуисны став Израиль войтырлы: «Муыс, кытчӧ ми ветлім, бурсьыс-бур.

⁸ Ми кӧ лоам Господьлы шогманаӧсь, Сійӧ вайӧдас миянӧс сэтчӧ да сетас миянлы тайӧ мусӧ, кӧні визувтӧ йӧв да ма.

⁹ Энӧ кыпӧдчӧй Господьлы паныд! И сэтчӧс войтырысь энӧ полӧй! Няньӧс моз ми ньылыштам найӧс! Дорйысьыс налӧн абу, а миянкӧд Господь. Энӧ полӧй наысь!»

¹⁰ Войтырыс кӧсйис изъявны Исусӧс да Калевӧс, но Господьлӧн дзирдлуныс [кымӧрӧн] петкӧдчис вежа чомйын став Израиль пиянлӧн син водзын.

¹¹ Господь шуис Мӧисейлы: «Дыр-ӧ на тайӧ войтырыс нинӧмӧ пуктӧ Менӧ? Ме вӧчи уна шензьӧданатор на пӧвстын, но найӧ пыр на оз эскыны Меным.

¹² Ме мӧдӧда на вылӧ пӧрӧс висьӧм да бырӧда найӧс, а тэсянь [да батьыд рӧдсянь] сета чужны ыджыдджык да вынаджык войтырлы».

¹³ Но Мӧисей шуис Господьлы: «Та йылысь кыласны египетсаяс, кодъяс пӧвстысь Тэ Аслад вынӧн петкӧдін Ассьыд войтыртӧ.

¹⁴ Найӧ висьталасны та йылысь татчӧс олысьяслы, кодъяс кывлісны нин, мый Тэ, Господьӧй, олан Аслад войтырыд пӧвстын да аддзана ногӧн петкӧдчылан сылы. Найӧ кывлісны, мый Тэнад кымӧрыд сулалӧ войтырыд весьтын, и мый Тэ мунан сы водзвылын луннас кымӧр сюръя пытшкын, а войнас би сюръя пытшкын.

¹⁵ Тэ кӧ ӧтитӧг бырӧдан Ассьыд войтыртӧ, сэки войтыръяс, кодъяс кывлісны Тэ йылысь, шуасны:

¹⁶ ”Господь эз вермы нуӧдны Ассьыс войтырсӧ сійӧ муас, мый йылысь кыв сетіс налы. Господь бырӧдіс найӧс овтӧминын”.

¹⁷ Мед лоӧ ошкӧма Господьлысь вынсӧ! Тэ Ачыд шуин:

¹⁸ ”Ме, Господь – дыр терпитысь, буралысь [да эскана]. Ме прӧстита лёк вӧчӧм да мыж, но мыжаӧс ог коль мыждытӧг. Батьяслӧн мыж вӧсна Ме водзӧс перъя челядьныслысь коймӧд да нёльӧд чужанвужйӧдз”.

¹⁹ Господьӧй, Аслад ыджыд буралӧмыд вӧсна прӧстит тайӧ войтырыслысь мыжсӧ, кыдзи Тэ пыр прӧститлін найӧс Египетысь петӧмсянь да ӧнӧдз!»

²⁰ Господь шуис Мӧисейлы: «Ме прӧстита найӧс тэнад корӧм серти.

²¹ [Аслам пыр олысь нимӧн,] Аслам олӧмӧн да дзирдлунӧн, мыйӧн тырӧма ставнас муыс, Ме кӧсйыся,

²² мый найӧ, кодъяс аддзылісны Менсьым дзирдлунӧс да Менсьым шензьӧданаторъясӧс, мый Ме вӧчи Египетын да овтӧминын, но эз кывзысьны Менсьым да дасӧдысь нин дӧзмӧдісны Менӧ,

²³ оз аддзывны сійӧ мусӧ, мый йылысь Ме кыв сеті налӧн батьяслы. [Сійӧ мусӧ сета налӧн ныв-пиыслы, кодъяс ӧні тані Мекӧд, но оз на нинӧм вежӧртны, оз тӧдны бурсӧ ни лёксӧ.] Быдӧн, коді нинӧмӧ пуктіс Менӧ, оз аддзыв кӧсйысьӧм мусӧ.

²⁴ Но Менам Калев кесйӧг пытшкын мӧд лов, и сійӧ став сьӧлӧмсяньыс кывзысьӧ Менсьым. Та вӧсна Ме вайӧда Калевӧс сійӧ муас, кытчӧ ветліс, и сысянь чужысьяс босьтасны аслыныс кӧсйысьӧм мусӧ.

²⁵ Ковтысын олӧны амаликъяс да ханаансаяс. Аски бӧр бергӧдчӧй, мунӧй овтӧминӧ Гӧрд саридзлань».

²⁶ Господь шуис Мӧисейлы да Ааронлы:

²⁷ «Дыр-ӧ на лёкнас тырӧм тайӧ войтырыс кутас шуасьны Ме вылӧ? Ме кыла Израиль пиянлысь Ме вылӧ ропкӧмсӧ.

²⁸ Висьтав налы: Ме кыв сетӧмӧн кӧсйыся Аслам олӧмӧн, – висьталӧ Господь, – мый Ме вӧча тіянлы сійӧс, мый йылысь ті сёрнитінныд.

²⁹ Ті, Ме вылӧ ропкысьяс пӧвстысь кызь арӧса да ыджыдджык арлыда айулов, кодъясӧс вӧлі арталӧма-гижалӧма, куланныд тайӧ овтӧминас.

³⁰ Ті онӧ пырӧй сійӧ муас, кытчӧ Ме киӧс лэптӧмӧн кӧсйысьлі овмӧдны тіянӧс. Сэтчӧ пырасны сӧмын Ефуннилӧн Калев пиыс да Навлӧн Исус пиыс.

³¹ Ныв-пинытӧ, код йылысь ті шулінныд, шедасны пӧ вӧрӧг киӧ, Ме пырта сэтчӧ. Найӧ босьтасны аслыныс сійӧ мусӧ, мый ті ӧтдортінныд.

³² Ті куланныд тайӧ овтӧминас.

³³ Тіян пиянныд кутасны ыж-мӧс видзны овтӧминын нелямын во чӧж. Сыысь, мый ті эновтінныд Менӧ, налы ковмас нуны мыждӧмсӧ, кытчӧдз медбӧръяыс тіян пӧвстысь оз кув овтӧминын.

³⁴ Нелямын лун чӧж ті видзӧдалінныд мусӧ, и нелямын во чӧж ті понданныд нуны мыждӧмсӧ – ӧти лун пыдди ӧти во. Тадзи ті тӧдмаланныд, кутшӧм лоӧ олӧмныд, кор Ме эновта тіянӧс.

³⁵ Тадзи шуа Ме, Господь, и тадзи вӧча тайӧ шогмытӧм войтырыслы, Меным паныд кыпӧдчысьяслы. Тайӧ овтӧминас найӧ куласны, тані воас налы пом».

³⁶ Найӧ, кодъясӧс Мӧисей мӧдӧдліс видзӧдавны Ханаан му, локтӧм бӧраныс кыпӧдісны войтырсӧ Мӧисейлы паныд, ӧд паськӧдісны сійӧ му йывсьыс лёк сёрни.

³⁷ Та вӧсна найӧ кулісны – Господь бырӧдіс найӧс.

³⁸ На пӧвстысь, кодъяс ветлісны видзӧдавны Ханаан му, ловйӧн колины сӧмын Навлӧн Исус пиыс да Ефуннилӧн Калев пиыс.

³⁹ Мӧисей висьталіс Израиль пиянлы Господьлысь кывъяссӧ. Войтырсӧ курыд шог босьтіс.

⁴⁰ Асывводзнас найӧ мӧдӧдчисны кайны керӧсвыв муӧ. Найӧ шуалісны: «Ми мыж вӧчим, но ми мунам сэтчӧ, кытчӧ тшӧктіс миянлы Господь».

⁴¹ Мӧисей шуис: «Мыйла ті онӧ кывзысьӧй Господьлысь? Тіян нинӧм оз артмы.

⁴² Энӧ мунӧй, ӧд Господь оз ло тіянкӧд! Мунанныд кӧ, вӧрӧгныд вермас тіянӧс.

⁴³ Сэні тіянӧс виччысьӧны амаликъяс да ханаансаяс. Налӧн шыпурт помысь ті усянныд, ӧд бергӧдчинныд Господьысь, и Господь оз ло тіянкӧд».

⁴⁴ Но найӧ асныралісны да мӧдӧдчисны кайны керӧсвыв муӧ. А Мӧисей кольччис сувтанінӧ, кӧні вӧлі Господьлӧн Йитӧд кудйыс.

⁴⁵ Керӧсвыв муын олысь амаликъяс да ханаансаяс уськӧдчисны израильсаяс вылӧ, пасьвартісны найӧс да вӧтӧдісны Хормаӧдз. [Ловйӧн кольӧмаяс бӧр бергӧдчисны асланыс чомъясӧ.]