Лука 22 - Коми Библия 2023

Иуда вузалӧ Исусӧс

¹ Матыстчисны Шомтӧм нянь сёян лунъяс, мӧд ногӧн кӧ, Ыджыд лун.

² Аркирейяс да Индӧдӧ велӧдысьяс корсисны, кыдзи эськӧ вины Исусӧс, сӧмын полісны йӧзсьыс.

³ Сӧтана пырис Искариот Иуда пытшкӧ, сійӧ вӧлі дас кык велӧдчысьысь ӧти.

⁴ Иуда муніс аркирейяс да крам видзысьяслӧн веськӧдлысьяс дінӧ да сёрнитчис накӧд Исусӧс вузалӧм йылысь.

⁵ Найӧ нимкодьпырысь кӧсйысисны сетны сылы сьӧм.

⁶ Иуда налы кыв сетіс, сэсся пондіс корсьны лӧсялан кад, медым вузавны Исусӧс йӧз тӧдлытӧг.

Ыджыдлунся баляӧс сёйӧм

⁷ Воис Шомтӧм нянь сёян лун, кодыр колӧ вӧлі начкыны ыджыдлунся баляӧс.

⁸ Петырӧс Иоанкӧд мӧдӧдіг Исус шуис налы: «Мунӧй, лӧсьӧдӧй миянлы ыджыдлунся сёян».

⁹ Найӧ юалісны: «Кытчӧ шуан лӧсьӧднысӧ?»

¹⁰ Исус шуис: «Карас пыриганыд тіянлы паныдасяс гырничын ва нуысь морт. Мунӧй да пырӧй сы бӧрся керкаас.

¹¹ Керка кутысьыслы висьталӧй: ”Велӧдысь юасьӧ, кутшӧм вежӧсын Аслас велӧдчысьяскӧд вермас сёйны ыджыдлунся баляӧс”.

¹² Сійӧ петкӧдлас тіянлы вылыс судтасьыс вольсалӧм ыджыд вежӧс. Сэні и лӧсьӧдӧй».

¹³ Найӧ мунісны да аддзисны: ставыс лои Исуслӧн висьталӧм серти. Найӧ дасьтісны ыджыдлунся сёян.

¹⁴ Кор воис кадыс, Исус пуксис дас кыкнан апостолыскӧд сёйны.

¹⁵ Сійӧ шуис налы: «Сьӧкыдсӧ нутӧдз Ме ёна кӧсйи сёйны тіянкӧд тайӧ ыджыдлунся балясӧ.

¹⁶ Висьтала тіянлы: ог нин понды сёйны тайӧ сёянсӧ сійӧ лунӧдз, кор лоӧ ыджыдлунся гаж Енлӧн Юраланінын».

¹⁷ Исус босьтіс чаша да Енмӧс аттьӧалӧмӧн шуис: «Босьтӧй да юӧй татысь быдӧн.

¹⁸ Висьтала тіянлы: Енлӧн Юралӧмыс вотӧдз ог понды юны виноград юансӧ».

¹⁹ Сэсся Исус босьтіс нянь, Енмӧс аттьӧалӧмӧн чегъяліс няньсӧ да велӧдчысьяслы сетігас шуис: «Тайӧ Менам яй, сійӧс лоӧ сетӧма тіян вӧсна. Вӧчӧй тайӧс Менӧ казьтывлӧм могысь».

²⁰ Сёйӧм бӧрас босьтіс чаша да сійӧс сетігас шуис: «Тайӧ чашаыс – Выль Йитӧд, кӧрталӧма Менам вирӧн, сійӧ киссьӧ тіян вӧсна.

²¹ Со, Менӧ вузалысьлӧн киыс Мекӧд ӧти пызанысь судзӧдӧ.

²² Дерт, Морт Пи мунӧ водзвыв лӧсьӧдӧм туйӧд. Но курыд шог Сійӧс вузалысьлы!»

²³ Сэки велӧдчысьяс пондісны юасьны ӧта-мӧдныслысь, коді тайӧ на пиысь.

Кесъялысь ыджыдджык

²⁴ Велӧдчысьяс вензисны ас костаныс, коді на пиысь ыджыдджыкыс.

²⁵ Исус висьталіс налы: «Ӧксыяс ыджыдалӧны войтыръяс вылын, юралысьяс бур вӧчысь ним шедӧдӧны.

²⁶ Но ті тадзи энӧ вӧчӧй. Тіян пиысь ыджыдыс мед лоас ичӧт. Юралысь кӧ, мед лоас кесъялысьӧн.

²⁷ Пызан сайын пукалысьыс али кесъялысьыс ыджыдджык? Абу-ӧ пызан сайын пукалысьыс? Но Ме тіян пӧвстын кесъялысь.

²⁸ Ті энӧ эновтӧй Менӧ сьӧкыдлунъяс дырйи.

²⁹ Та вӧсна Ме сета тіянлы Юралӧм, кыдзи Батьӧй сетіс Меным.

³⁰ Менам Юраланінын ті понданныд сёйны-юны Мекӧд ӧти пызан сайын да пуксянныд юралан пуклӧсӧ мыждыны израильса дас кык чужанкотырӧс».

Петырлӧн кӧсйысьӧм

³¹ Господь шуис: «Кылан, Симон! Сӧтана корис шердйыны тіянӧс шобдіӧс моз.

³² Но Ме кевмыси тэ вӧсна, медым эскӧмыд эз быр. Кор тэ бергӧдчан бӧр, ёнмӧд вокъястӧ».

³³ Петыр шуис Исуслы: «Господьӧй, Тэкӧд ме дась пуксьыны дзескыдінӧ, весиг кувны».

³⁴ Исус вочавидзис: «Петыр, тэныд шуа: талун петук чукӧсттӧдз на тэ куимысь соссян, мый тӧдан Менӧ».

Ньӧб шыпурт

³⁵ Исус юаліс велӧдчысьяслысь: «Кор Ме мӧдӧдлі тіянӧс сьӧмтӧг, ноптӧг да кӧмтӧг, тіянлы ӧмӧй эз тырмывлы мыйкӧ?» Найӧ шуисны: «Ставыс вӧлі».

³⁶ Исус шуис налы: «Ӧні мӧдарӧ. Сьӧмыд кӧ эм, босьт сійӧс сьӧрсьыд, тшӧтш ноптӧ босьт. Абу кӧ, вузав вылыс паськӧмтӧ да ньӧб шыпурт.

³⁷ Висьтала тіянлы: Ме йылысь гижӧма: ”Сійӧс пуктісны Индӧдтӧг олысьяс лыдӧ”. Тайӧ гижӧмыслы колӧ инны. Ме йылысь став шуӧмыс ӧні инӧ».

³⁸ Найӧ шуисны: «Господьӧй, тані кык шыпурт». Исус шуис: «Тырмас».

Исус кевмысьӧ Гефсиманын

³⁹ Карысь петӧм бӧрын Исус, кыдзи пыр вӧчліс, мӧдӧдчис Олив керӧсӧ. Велӧдчысьяс мунісны Сы бӧрся.

⁴⁰ Сэтчӧ воӧм бӧрын Исус шуис налы: «Кевмысьӧй, мед ыштӧдӧмыс эз вермы тіянӧс».

⁴¹ Ачыс ылыстчис наысь из шыбитӧм ылнаӧ да пидзӧс вылас сувтӧмӧн кевмысис:

⁴² «Батьӧй, кӧсъян кӧ, вешты Ме дінысь тайӧ чашасӧ. Сӧмын мед лоас Тэнад кӧсйӧм серти, а оз Менам».

⁴³ Сэки андел лэччис енэжсянь да ёнмӧдіс Сійӧс.

⁴⁴ Шогыскӧд вермасигӧн Исус ёнджыка на кевмысис. Сылӧн пӧсьыс вирӧн войталіс муӧ.

⁴⁵ Кевмысьӧм бӧрас Исус чеччис да локтіс велӧдчысьяс дінас. Сійӧ аддзис, мый найӧ шогысла унмовсьӧмаӧсь.

⁴⁶ Сэки шуис налы: «Мый ті узянныд? Чеччӧй, кевмысьӧй, мед ыштӧдӧмыс эз вермы тіянӧс».

Исусӧс локтӧны босьтны

⁴⁷ Исуслӧн сёрнитігкості сэтчӧ локтісны йӧз. Найӧс вайӧдіс Иуда, дас кык велӧдчысьысь ӧти. Иуда матыстчис Исус дінӧ, медым окыштӧмӧн чолӧмавны Сійӧс. Ӧд Иуда шуӧма локтӧмаяслы, кодӧс пӧ окышта, Сійӧ – Исус.

⁴⁸ Исус шуис сылы: «Иуда, окыштӧмнад тай вузалан Морт Пиӧс».

⁴⁹ Исускӧд вӧлысьяс гӧгӧрвоисны, мый водзӧ лоӧ, сэки шуисны Сылы: «Господьӧй, перйыны-ӧ шыпуртнымӧс?»

⁵⁰ На пиысь ӧти керыштіс аркирей кесйӧглысь веськыд пельсӧ.

⁵¹ Исус шуис: «Тырмас! Дугдӧй!» Кесйӧглы пеляс инмӧдчылӧмӧн Исус бурдӧдіс сійӧс.

⁵² Сэсся аркирейяслы, юрнуӧдысьяслы да крам видзысьяслӧн веськӧдлысьяслы, кодъяс локтісны кутны Сійӧс, шуис: «Лёк вӧчысьӧс моз зорйӧн-шыпуртӧн локтінныд босьтны Менӧ.

⁵³ Ме быд лун вӧлі тіянкӧд крамын, но ті энӧ лэптылӧй кинытӧ Ме вылӧ. Ӧні тіян кадыс да пемыдыслӧн ыджыдалӧмыс».

Петырлӧн соссьӧм

⁵⁴ Исусӧс кутысьяс вайӧдісны Сійӧс аркирей керкаӧ. Петыр бӧрӧ кольччӧмӧн вӧтчис на бӧрся.

⁵⁵ Йӧр пытшкас ӧзтісны бипур, йӧзыс пуксялісны сы гӧгӧр. Петыр тшӧтш пуксис.

⁵⁶ Ӧти кесйӧг ань аддзис Петырӧс бипур дорысь да сы вылӧ сюся видзӧдлӧмӧн шуис: «Тайӧ мортыс тшӧтш Сыкӧд вӧлі».

⁵⁷ Петыр соссис: «Ог тӧд Сійӧс, дона аньӧй».

⁵⁸ Недыр мысти мӧд морт аддзис сійӧс да шуис: «Тэ дзик на пиысь». Петыр шуис сылы: «Абу».

⁵⁹ Час мысти нӧшта ӧти морт эскӧдӧмӧн шуис: «Тайӧ мортыс збыльысь вӧлі Сыкӧд. Сійӧ тшӧтш Галилеяысь».

⁶⁰ Петыр шуис: «Бур мортӧй, ог гӧгӧрво, мый висьталан». Тайӧс шуигӧн кыліс петуклӧн чукӧстӧм.

⁶¹ Бергӧдчылӧмӧн Господь видзӧдліс Петыр вылӧ. Сэки Петырлы тӧд вылас уси Господьлӧн шуӧмыс: «Петук чукӧсттӧдз на тэ куимысь соссян Меысь».

⁶² Петыр петіс да курыда бӧрддзис.

Исусӧс лёкӧдӧм

⁶³ Исусӧс видзысьяс сералісны-лёкӧдісны да нӧйтісны Сійӧс.

⁶⁴ Сылысь чужӧмсӧ вевттьӧмӧн найӧ кучкалісны Сылы чужӧмас да шуалісны: «Висьтав, Пророк, коді кучкис Тэнӧ?»

⁶⁵ Сэсся ёна на омӧльтісны Сійӧс.

Исус веськӧдлан котыр водзын

⁶⁶ Асывнас чукӧртчисны юрнуӧдысьяс, аркирейяс да Индӧдӧ велӧдысьяс. Исусӧс вайӧдісны веськӧдлан котыр водзӧ.

⁶⁷ Найӧ шуисны: «Висьтав миянлы, Тэ-ӧ Кристос?» Исус воча шуис: «Висьтала кӧ тіянлы, ті онӧ эскӧй.

⁶⁸ Юала кӧ, онӧ вочавидзӧй да онӧ лэдзӧй Менӧ.

⁶⁹ Ӧнісянь Морт Пи пондас пукавны Ставсӧвермысь Ен веськыдладорын».

⁷⁰ Ставӧн шуисны: «Сідзкӧ, Тэ – Ен Пи?» Исус вочавидзис: «Ті асьныд тайӧс шуанныд».

⁷¹ Сэки найӧ шуисны: «Висьталысьяс миянлы оз нин ковны, ми асьным кылім тайӧс Сы вомсянь».