Лука 21 - Коми Библия 2023

Дӧвалӧн сьӧм сетӧм

¹ Исус видзӧдліс да аддзис, кыдзи озыръяс пуктісны сьӧм чукӧртан кудйӧ вайӧмторъяс.

² Сійӧ аддзис тшӧтш гӧль дӧваӧс, коді пуктіс кудйӧ кык ыргӧн сьӧм.

³ Исус шуис: «Збыльысь висьтала тіянлы: тайӧ гӧль дӧваыс быдӧнысь унджык пуктіс.

⁴ Ставныс унасьыс чуктӧдісны Енлы, а тайӧ дӧваыс этшасьыс сетіс ставсӧ, мый сылӧн вӧлі кынӧмпӧт вылас».

Нэм помасьӧм йылысь

⁵ Ӧткымынӧн сёрнитісны мича изъясӧн да донаторъясӧн мичмӧдӧм крам йылысь. Исус шуис:

⁶ «Воас лун, татчӧ из вылӧ из оз коль, ставсӧ жугӧдасны».

⁷ Исуслысь юалісны: «Велӧдысь, кор ставыс тайӧ лоас? Мый серти ми тӧдмалам сійӧ кадсӧ?»

⁸ Исус шуис: «Видзчысьӧй, мед эз ылӧдны тіянӧс. Унаӧн Менам нимӧн локтасны да шуасны, ме пӧ Сійӧ, кадыс пӧ воис нин. Энӧ мунӧй на бӧрся.

⁹ Кор ті кыланныд тышъяс да шызьӧмъяс йылысь, энӧ повзьӧй. Тадзи водзджык колӧ лонысӧ, но тайӧ абу на пом».

¹⁰ Сэсся Исус шуис налы: «Войтыр войтырлы паныд сувтас, муяс ӧта-мӧдныслы паныд кыпӧдчасны.

¹¹ Уналаын лоас му вӧрӧм да тшыгъялӧм, йӧзсӧ суас кулана висьӧм. Лоасны повзьӧдана петкӧдчӧмъяс да енэжсянь индысьпасъяс.

¹² Но таӧдз пондасны вӧтлысьны тіян бӧрся да дзескӧдны тіянӧс, вайӧдасны синагогаясӧ мыждыны, йӧртасны дзескыдінӧ да Менам ним вӧсна нуӧдасны ӧксыяс да юралысьяс водзӧ.

¹³ Тайӧ лоӧ, медым ті висьталінныд Ме йылысь.

¹⁴ Кутӧй тӧд выланыд: водзвыв энӧ тӧждысьӧй, мый шуны асьнытӧ дорйӧм могысь.

¹⁵ Ме сета тіянлы мывкыдлун сёрнитны. Мыжалысьяс оз вермыны паныд сувтны тіянлы да налы оз сюр воча кывйыс.

¹⁶ Бать-мамныд, вокныд, рӧдвужныд да ёртъясныд вузаласны тіянӧс, кодсюрӧӧс весиг виасны.

¹⁷ Менам ним вӧсна унаӧн мустӧмтасны тіянӧс.

¹⁸ Но тӧдӧй, весиг юрси сі оз усь юр вывсьыныд.

¹⁹ Сьӧкыдлунсӧ венӧмӧн ті мезданныд ловнытӧ».

Ерусалим кар бырӧдӧм

²⁰ «Кор ті аддзанныд, мый Ерусалимсӧ кытшалӧма, тӧдӧй: матыстчис сійӧс бырӧдӧмыс.

²¹ Сэки Иудея муын олысьяс мед пышъясны керӧсъясӧ. Коді лоӧ кар пытшкас, мед петас сэтысь; коді лоӧ кар саяс, мед оз пыр сэтчӧ.

²² Тайӧ мынтысян лунъяс, сэки став гижӧмаыс инас.

²³ Сійӧ лунъясӧ ёна сьӧкыд лоӧ нӧбасьысьяслы да нёньӧдчысьяслы. Тайӧ мусӧ ыджыд шог суас, да тайӧ войтыр вылас киссяс скӧрлуныс.

²⁴ Ӧтияс куласны шыпурт помысь, мӧдъясӧс мырдӧн нуӧдасны йӧз муӧ. Ерусалим карсӧ индӧм кадӧдз пондасны талявны ентӧдтӧмъяс».

Морт Пилӧн локтӧм

²⁵ «Шонді, тӧлысь да кодзувъяс вылын тыдовтчасны индысьпасъяс. Саридз ыджыд шыӧн гызяс, войтыръяс му вылын шызясны да шӧйӧвошасны.

²⁶ Енэжвыв вынъяс вӧрзясны, сьӧкыдлунъяс суӧмысь йӧзыс повзьӧмнысла садьсӧ воштасны.

²⁷ Сэки аддзасны кымӧр вылын ыджыд вынӧн да дзирдлунӧн локтысь Морт Пиӧс.

²⁸ Кор ставыс тайӧ пондас инны, сэки веськӧдчӧй да лэптӧй юрнытӧ, ӧд матысмӧ тіян мездмӧмныд».

²⁹ Исус висьталіс налы велӧданвисьт: «Видзӧдӧй инжир пу да мукӧд пуяс вылӧ.

³⁰ Корйыс кӧ потӧ, сідзкӧ, гожӧмыс матын.

³¹ Тадзи, ставсӧ тайӧс аддзигӧн, тӧдӧй, мый Енлӧн Юралӧмыс матын.

³² Веськыда висьтала тіянлы: ставыс тайӧ лоас ӧнія олысьяс дырйи на.

³³ Енэжыс да муыс бырас, а Менам кывъясӧй оз бырны.

³⁴ Видзчысьӧй, медым сьӧлӧмныд эз кӧртась кодалӧм-гажӧдчӧмас да олӧм тӧждас, ӧд ставыс тайӧ чорзьӧдӧ тіянлысь сьӧлӧмнытӧ. Мед сійӧ луныс оз су тіянӧс виччысьтӧг.

³⁵ Ӧд кыдзи налькйӧ шедӧны, сідзи жӧ сійӧ луныс суас став мувывса олысьсӧ.

³⁶ Лоӧй дасьӧсь да пыр кевмысьӧй, медым верминныд мынны ставсьыс, мый виччысьӧ тіянӧс, да сувтны Морт Пи водзӧ».

³⁷ Луннас Исус велӧдіс крамын, а войяссӧ колляліс Олив керӧсын.

³⁸ Йӧзыс водз асывсяньыс волісны крамӧ кывзыны Сійӧс.