Лука 2 - Коми Библия 2023

Исуслӧн му вылын чужӧм

¹ Сійӧ лунъясӧ Римын ыджыдалысь Август кесар тшӧктіс гижавны ас мусьыс став йӧзсӧ.

² Тайӧ медводдза гижалӧмыс вӧлі Сирияын Квириний веськӧдлан кадӧ.

³ Быдӧн муніс гижасьны аслас чужан карӧ.

^4-5 Ӧсип вӧлі Давид чужанвужйысь. Та вӧсна аслас Мария гӧтырпукӧд, коді вӧлі нӧбасьӧ, сійӧ муніс гижасьнысӧ Назаретысь, галилеяса карысь, Иудея муӧ, Виплием нима Давид карӧ.

⁶ Виплиемӧ воӧм мысти Мариялы воис кад чужтыны.

⁷ Сійӧ чужтіс Пи, ассьыс медводдза кагасӧ. Рузумӧ гартыштӧмӧн Мария пуктіс кагасӧ лясниӧ, ӧд туйморт керкаын налы узяніныс эз сюр.

⁸ Сэні матігӧгӧрас вӧліны ыж видзысьяс. Войнас найӧ видзисны ыжъяснысӧ видз вылын.

⁹ Виччысьтӧг на водзӧ сувтіс Господьлӧн андел. Господьлӧн дзирдлуныс югзьӧдіс ыж видзысьясӧс, да найӧ ёна повзисны.

¹⁰ Андел шуис налы: «Энӧ полӧй! Ме висьтала тіянлы нимкодьсьыс-нимкодь юӧр, тайӧ ваяс ыджыд долыдлун став войтырлы.

¹¹ Талун Давид карын тіянлы чужис Мездысь – Господь Кристос.

¹² Лясниысь ті аддзанныд рузумӧ гартыштӧм кагаӧс – тайӧ лоӧ тіянлы пасӧн».

¹³ Виччысьтӧг анделкӧд орччӧн тыдовтчис лыдтӧм-тшӧттӧм андел чукӧр. Найӧ ошкисны Енмӧс:

¹⁴ – Ошкӧм Медвылысса Енлы! Му вылын лӧнь олӧм, йӧз костын бур кӧсйӧм!

¹⁵ Анделъяслӧн енэжӧ кайӧм бӧрын ыж видзысьяс шуисны ӧта-мӧдныслы: «Мунамӧй Виплиемӧ, видзӧдлам Господьсянь миянлы юӧртӧм лоӧмторсӧ».

¹⁶ Найӧ тэрмасьӧмӧн мунісны да аддзисны сэтысь Марияӧс, Ӧсипӧс да лясниын куйлысь кагаӧс.

¹⁷ Сэсся висьталісны кага йылысь кывлӧмторсӧ.

¹⁸ Кывзысьясӧс шензьӧдіс ыж видзысьяслӧн висьталӧмыс.

¹⁹ Мария видзис тайӧ висьталӧмсӧ сьӧлӧмас да мӧвпаліс та йылысь.

²⁰ Ыж видзысьяс бӧр мунісны Енмӧс ошкӧмӧн да аттьӧалӧмӧн ставсьыс, мый кывлісны да аддзылісны. Ставыс лои анделлӧн висьталӧм серти.

Исусӧс вайӧны крамӧ

²¹ Кӧкъямыс лун мысти воис кад вундыштны кагаӧс. Сылы сетісны Исус ним, ӧд Мариялӧн нӧбасьтӧдз на тадзи нимтіс Сійӧс андел.

²² Мӧисей Индӧд серти сӧстӧммӧдчан лунъяс бӧрын Исусӧс вайисны Ерусалимӧ Господь водзӧ.

²³ Ӧд Господьлӧн Индӧд серти медводдза чужысьӧс, пи кагаӧс, колӧ вӧлі сины Господьлы.

²⁴ Господьлӧн Индӧд серти нӧшта колӧ вӧлі вайны вись: кык гулюӧс либӧ кык гулюпиӧс.

Симеонлӧн бурсиӧм

²⁵ Сэки Ерусалимын вӧлі Симеон нима вежавидзысь морт. Сійӧ оліс веськыда да виччысис Израильӧс мездӧм. Вежа Лов вӧлі сы вылын.

²⁶ Вежа Лов водзвыв висьтавліс сылы, Господьлысь Мавтыштӧмасӧ аддзывтӧдз пӧ он кув.

²⁷ Вежа Лов нуӧдӧм улын Симеон локтіс крамӧ. Кор бать-мамыс пыртісны сэтчӧ Исус кагасӧ, медым ставсӧ вӧчны Индӧд серти,

²⁸ Симеон босьтіс Сійӧс ки вылас да Енмӧс ошкигтырйи шуис:

²⁹ – Ыджыдӧй, Аслад шуӧмыд серти ӧні лэдзан Ассьыд кесйӧгтӧ лӧня мунны.

^30-31 Аслам синмӧн ме аддзылі став йӧзлы дасьтӧм мездӧмтӧ:

³² ентӧдтӧмъяслы вайӧм югыдтӧ, Тэнад Израиль войтырлы восьтӧм дзирдлунтӧ.

³³ Кага йылысь висьталӧмыс шензьӧдіс Сылысь мамсӧ да Ӧсипӧс.

³⁴ Симеон бурсиис найӧс да шуис Мариялы, Исус мамлы: «Тайӧ кагаыс понда Израильын унаӧн усясны да унаӧн сувтасны. Сійӧ – Енсянь индысьпас. Унаӧн кутасны мунны Сылы паныд,

³⁵ и тадзи воссясны налӧн гуся мӧвпъясыс. Тэнсьыд сьӧлӧмтӧ шогыс шыпуртӧн моз бытшкас».

³⁶ Сэні вӧлі Анна нима пророк, Пенуэл ныв, Асир чужанкотырысь. Тайӧ пӧрысь аньыс ныв кадсяньыс сизим во олӧма верӧсыскӧд,

³⁷ сэсся кӧкъямысдас нёль арӧсӧдз олӧма дӧваӧн. Сійӧ эз петавлы крамысь, видзалӧмӧн-кевмысьӧмӧн кесъяліс Енлы лун и вой.

³⁸ Буретш Симеонлӧн висьталігӧн сійӧ матыстчис, пондіс ошкыны Енмӧс да висьтавлыны кага йылысь ставныслы, Ерусалимын мездмӧмсӧ виччысьысьяслы.

³⁹ Господьлӧн Индӧд серти ставсӧ вӧчӧм бӧрын Ӧсип да Мария бӧр мунісны Галилеяӧ, асланыс Назарет карӧ.

⁴⁰ Кага быдмис, ловнас вынсяліс, Сылӧн мывкыдлуныс содіс. Енлӧн буралӧмыс вӧлі Сы вылын.

Дас кык арӧса Исус крамын

⁴¹ Быд во Ыджыд лун кежлӧ Исуслӧн бать-мамыс ветлісны Ерусалимӧ.

⁴² Исуслы дас кык арӧс тырӧм бӧрын найӧ мукӧд воясӧ моз бара мунісны сэтчӧ.

⁴³ Ыджыд лун бӧрын Ӧсип да Исуслӧн мамыс бӧр мӧдӧдчисны гортаныс. Зонка кольччис Ерусалимӧ. Та йылысь найӧ эз тӧдны,

⁴⁴ чайтісны, мый Сійӧ мунӧ мукӧдыскӧд. Лунтыр мунӧм бӧрын пондісны корсьны Исусӧс рӧдвуж да тӧдсаяс пӧвстысь,

⁴⁵ но эз аддзыны. Сэки бӧр косісны Ерусалимӧ корсьны Сійӧс.

⁴⁶ Куим лун мысти найӧ аддзисны Исусӧс крамысь. Сійӧ пукаліс велӧдысьяс пӧвстын, кывзіс-юасис найӧс.

⁴⁷ Сылӧн мывкыдлуныс да вочавидзӧмъясыс шензьӧдісны кывзысьясӧс.

⁴⁸ Исусӧс аддзӧм бӧрын бать-мамыс чуймисны. Мамыс шуис Сылы: «Пиӧй, мыйла нӧ Тэ тадзи вӧчин? Ми батьыдкӧд сьӧлӧм потмӧн корсим Тэнӧ».

⁴⁹ Исус шуис налы: «Мыйла ті корсинныд Менӧ? Энӧ ӧмӧй тӧдӧй, мый Меным колӧ лоны Бать керкаын?»

⁵⁰ Но Сылысь кывъяссӧ найӧ эз гӧгӧрвоны.

⁵¹ Исус бӧр локтіс бать-мамыскӧд Назаретӧ да быдторйын кывзысис налысь. Сылӧн мамыс ставсӧ тайӧс видзис сьӧлӧмас.

⁵² Исус сӧвмис, Сылӧн мывкыдлуныс содіс. Сійӧ вӧлі муса Енмыслы, и йӧзыс бурӧ пуктісны Сійӧс.