Лука 14 - Коми Библия 2023

Исус бурдӧдӧ висьысьӧс шойччан лунӧ

¹ Шойччан лунӧ Исус муніс фарисейяслӧн ӧти юралысь ордӧ сёйны. Сэні ставӧн сюся видзӧдісны Исус бӧрся.

² Сы дінӧ локтіс ва пыкталӧмӧн висьысь морт.

³ Исус юаліс Индӧдӧ велӧдысьяслысь да фарисейяслысь: «Позьӧ-ӧ шойччан лунӧ бурдӧднысӧ?»

⁴ Найӧ чӧв олісны. Исус инмӧдчылӧмӧн бурдӧдіс висьысьӧс да ыстіс сійӧс гортас.

⁵ Исус бара юаліс: «Шойччан лунӧ кӧ тіян осёлныд либӧ ӧшныд усяс юкмӧсӧ, онӧ ӧмӧй пырысьтӧм-пыр лэптӧй сійӧс сэтысь?»

⁶ Найӧ нинӧм эз вермыны воча шуны.

Асьтӧ вылӧ эн пукты

⁷ Исус казяліс, мый пызан сайӧ пуксигӧн корӧмаяс корсисны бурджыкинсӧ. Сэки Сійӧ шыасис на дінӧ велӧданвисьтӧн:

⁸ «Корасны кӧ тэнӧ кӧлысь вылӧ, эн пуксьы бурджыкинас. Корӧмаяс пӧвстын вермас лоны тэысь пыдди пуктанаджык.

⁹ Сэки кӧлысь вылӧ корысь матыстчас тэ дінӧ да шуас: ”Тайӧ мортыс мед пуксяс татчӧ”. Тэ яналан, ӧд тэныд ковмас вуджны пызан помас.

¹⁰ Кор тэ локтан кӧлысь вылӧ, пуксьы пызан помланьыс. Тэнӧ корысь кӧ матыстчас да шуас: ”Ёртӧй, пуксьы матӧджык”, сэки тэ лоан корӧмаяс водзын пыдди пуктӧмаӧн.

¹¹ Ӧд асьсӧ вылӧ пуктысьӧс лэдзасны, асьсӧ улӧ пуктысьӧс кыпӧдасны».

¹² Сэсся Исус шуис Сійӧс корысьлы: «Лӧсьӧдан кӧ пызан, эн корав ёртъястӧ, вокъястӧ, рӧдвужтӧ, орччӧн озыра олысьястӧ. Ӧд найӧ сэсся коркӧ асьтӧ корасны, тадзи мынтысясны тэныд.

¹³ Мӧдарӧ, лӧсьӧдан кӧ пызан, кор гӧльясӧс, доймалӧмаясӧс, коктӧмъясӧс да синтӧмъясӧс.

¹⁴ Тэ шуда лоан, ӧд найӧ оз вермыны тэныд мынтысьны. Тэныд лоӧ мынтӧма веськыда олысьяслӧн ловзьӧм дырйи».

Корӧмаяс йылысь велӧданвисьт

¹⁵ Тайӧс кылӧм бӧрын сёйысьясысь ӧти шуис: «Шуда Енлӧн Юраланінын пызан сайӧ пуксьысь!»

¹⁶ Исус воча шуис: «Ӧти морт ыджыд пызан лӧсьӧдас да унаӧс корас.

¹⁷ Пызан сайӧ пуксян кад матыстчигӧн сійӧ мӧдӧдас ассьыс кесйӧгсӧ юӧртны корӧмаяслы: ”Локтӧй, ставыс нин дась”.

¹⁸ Водзвыв сёрнитчӧмӧн моз ставныс шуасны, огӧ пӧ вермӧй локнысӧ. Ӧти шуас: ”Ме му ньӧби, колӧ ветлыны видзӧдлыны сійӧс. Эн дӧзмы, ог эшты”.

¹⁹ Мӧд шуас: ”Дас ӧш ньӧби, муна видлыны найӧс. Эн дӧзмы”.

²⁰ Коймӧд шуас: ”Ме гӧтраси да, ог вермы локнысӧ”.

²¹ Кесйӧг бӧр локтас да висьталас та йылысь ыджыдыслы. Сійӧ ёна скӧрмас да шуас кесйӧгыслы: ”Ӧдйӧджык мун карса туйвежъясӧ да йӧзаинъясӧ, вайӧд татчӧ гӧльясӧс, доймалӧмаясӧс, коктӧмъясӧс да синтӧмъясӧс”.

²² Локтӧм бӧрас кесйӧг шуас: ”Ыджыдӧй, тэнсьыд тшӧктӧмтӧ вӧчи, но пызан саяд эм на пуксяніныс”.

²³ Мӧдыс вочавидзас: ”Пет карсьыс, ветлы туйяс-потшӧсъяс пӧлӧн да тшӧкты локнысӧ, медым менам керкаӧй вӧлі тыр.

²⁴ Висьтала тіянлы: воддза корӧмаясысь весиг ӧти морт оз видлы менсьым пызанвыв сёянӧс”. Унаӧс корӧма, но этшаӧс бӧрйӧма».

Коді Менам велӧдчысьыс?

²⁵ Уна йӧз муніс Исускӧд. Налань бергӧдчылӧмӧн Сійӧ шуис:

²⁶ «Ме дінӧ локтысьлы кӧ бать-мамыс, гӧтырыс, ныв-пиыс, чой-вокыс да аслас олӧмыс Ме дорысь мусаджык, сійӧ оз вермы лоны Менам велӧдчысьӧн.

²⁷ Коді оз ну ассьыс крестсӧ да оз мун Ме бӧрся, сійӧ оз вермы лоны Менам велӧдчысьӧн.

²⁸ Кодкӧ тіян пиысь кӧ мӧвпыштас ыджыд керка лэптыны, оз-ӧ сійӧ водзджык пуксьы да артышт, тырмас-ӧ сылӧн сьӧмыс керкасӧ лэптыны.

²⁹ Вермас артмыны, мый подувсӧ пуктас, а помавнысӧ оз вермы. Сэки пондасны серавны сійӧс:

³⁰ ”Видзӧдлӧй, лэптынысӧ босьтчис, а помавнысӧ эз вермы!”

³¹ Ӧксылы кӧ ковмас тышӧ петны мӧд ӧксылы паныд, оз-ӧ сійӧ водзджык пуксьы да бура мӧвпышт, вермас-ӧ сійӧ дас сюрса тышкайӧзнас водзсасьны кызь сюрса тышкайӧзкӧд.

³² Оз кӧ вермы, сійӧ мӧдӧдас сёрнитчысьясӧс паныд локтысь ӧксы дінӧ, мед бурасьны сыкӧд.

³³ Ті кӧ онӧ кольӧй ставсӧ, мый тіян эм, онӧ вермӧй лоны Менам велӧдчысьясӧн».

Дуб сов

³⁴ «Солыд – буртор. Но воштас кӧ солыс ассьыс вынсӧ, кыдзи сійӧс бӧр соланас вӧчан?

³⁵ Сійӧс весиг оз шогмы муӧ сюйны, сӧмын кольӧ шыбитны. Кодлӧн эм пель, мед кылӧ!»