Лука 11 - Коми Библия 2023

Исус велӧдӧ кевмысьны

¹ Ӧтчыд Исус кевмысис. Кевмысьӧм бӧрас велӧдчысьяс пиысь ӧти шуис Сылы: «Господьӧй, велӧд миянӧс кевмысьны, кыдзи Иоан велӧдіс ассьыс велӧдчысьяссӧ».

² Исус шуис налы: «Кевмысиганыд шуӧй тадзи: – Енэжвывса миян Бать, мед лоӧ вежаӧн Тэнад нимыд. Мед воас Тэнад Юралӧмыд. Мед инас Тэнад кӧсйӧмыд му вылын енэжын моз.

³ Сет миянлы быд лун кежлӧ няньнымӧс.

⁴ И прӧстит миянлысь мыжъяснымӧс, ӧд ми прӧститам миян водзын мыжаясӧс. Эн сет миянлы ылавны, но видз миянӧс омӧльысь».

⁵ Исус нӧшта висьталіс: «Шуам, кодкӧ тіян пиысь войшӧр кадӧ мунас ёртыс ордӧ да шуас: ”Ёртӧй, водзӧсав меным няньтор.

⁶ Ме ордӧ туйморт кежис, а верднысӧ нинӧмӧн”.

⁷ Мӧдыс воча шуас ӧдзӧс сайсяньыс: ”Эн дӧзмӧдчы. Ме йигнаси нин, и ныв-пиӧй узьӧны нин. Ог вермы чеччыны няньтӧ сетны”.

⁸ Висьтала тіянлы: сійӧ кӧ оз чеччы да оз сет сылы ёртасьӧмыс понда, вӧчас тайӧс ёртыслӧн мырдӧн корӧмыс вӧсна да сетас сылы, мыйта колӧ.

⁹ Висьтала тіянлы: корӧй, и тіянлы сетасны, корсьӧй, и ті аддзанныд, игӧдчӧй, и тіянлы восьтасны.

¹⁰ Ӧд корысьлы сетӧны, корсьысьлы сюрӧ да игӧдчысьлы восьтӧны.

¹¹ Эм-ӧ тіян пӧвстын бать, коді пиыслы сетас из, корас кӧ сійӧ нянь? Сетас ӧмӧй змейӧс, корас кӧ пиыс чери?

¹² Сетас ӧмӧй скорпионӧс, корас кӧ пиыс кольк?

¹³ Ті лёкӧсь, а сямманныд бурсӧ сетны асланыд ныв-пилы. Дерт нин, енэжвыв Батьныд сетас Вежа Ловсӧ Сылысь корысьяслы».

Кодсянь Исуслӧн выныс?

¹⁴ Исус вӧтліс сёрниттӧм морт пытшкысь пеж лолӧс. Пеж ловлӧн петӧм бӧрын мортыс пондіс сёрнитны. Йӧзсӧ тайӧ шензьӧдіс,

¹⁵ а кодсюрӧ шуисны, Сійӧ пӧ вӧтлалӧ пеж ловъясӧс налӧн Вельзевул юралысь вынӧн.

¹⁶ Мукӧдыс Исусӧс кыйӧм могысь корисны петкӧдлыны енэжсянь индысьпас.

¹⁷ Налысь мӧвпъяссӧ тӧдӧмӧн Исус шуис: «Ас муын олысьяс кӧ ас костаныс тышкасьӧны, тайӧ муыс кушмас, да керкаясыс сэні киссясны.

¹⁸ Сӧтанаыс кӧ аслыс паныд тышкасьӧ, дыр-ӧ кутчысяс сылӧн ыджыдалӧмыс? Менӧ ті мыжаланныд пеж ловъясӧс Вельзевул вынӧн вӧтлӧмысь.

¹⁹ Ме кӧ вӧтлала пеж ловъясӧс Вельзевул вынӧн, кутшӧм вынӧн, сідзкӧ, тіян йӧзыд вӧтлалӧны? Найӧ тіянӧс мыждасны.

²⁰ Ме кӧ Ен вынӧн вӧтлала пеж ловъясӧс, сідзкӧ, Енлӧн Юралӧмыс воис тіянӧдз.

²¹ Вына морт кӧ видзӧ керкасӧ шыпуртӧн, сылӧн эмбурыс дзонь коляс.

²² Но сы вылӧ кӧ уськӧдчас сыысь вынаджык, дерт, вынаджыкыс вермас сійӧс, мырддяс шыпуртсӧ, мый вылӧ сійӧ лача кутіс, да юклас босьтӧм эмбурсӧ.

²³ Коді абу Мекӧд, сійӧ Меным паныд, коді оз чукӧрт Мекӧд, сійӧ разӧдӧ».

Пеж ловлӧн бӧр локтӧм

²⁴ «Морт пытшкысь петӧм бӧрын пеж лов шӧйтӧ ватӧминъясті, корсьӧ шойччанін да оз аддзы. Сэки шуӧ: ”Бӧр муна важ оланінӧ, кытысь петі”.

²⁵ Локтӧм бӧрас аддзӧ: оланінсӧ чышкӧма-пелькӧдӧма.

²⁶ Сэки мунӧ да босьтӧ аскӧдыс сизим пеж лолӧс, ассьыс на лёкджыкъясӧс, сэсся ставныс найӧ овмӧдчӧны важ оланінас. Тайӧ мортыслы воддза дорсьыс нӧшта на лёкджык лоӧ».

Коді шудаыс?

²⁷ Исуслӧн сёрнитігӧн йӧз чукӧрысь ӧти ань гораа шуис: «Шуда тэнӧ кынӧмас новлӧдлысь да морӧснас нёньӧдысь!»

²⁸ Исус шуис: «Шудаӧсь Енлысь кывсӧ кылысьяс да Ен кыв серти олысьяс!»

Ионалӧн пас

²⁹ Йӧзыс чукӧрмис пыр унджык и унджык. Исус висьталіс налы: «Ӧнія олысьяс – лёкас сетчӧм йӧз. Найӧ кӧсйӧны аддзывны индысьпас, но Иона пророк пасысь кындзи оз ло налы мӧдыс.

³⁰ Ниневия карын олысьяслы индысьпасӧн вӧлі Иона, ӧнія олысьяслы – Морт Пи.

³¹ Лунвыв муысь ӧксы-ань сувтас мыждан лунӧ ӧнія олысьяскӧд да мыжалас найӧс. Ӧд му помсяньыс сійӧ воліс кывзыны Соломонлысь мывкыд сёрнисӧ. Но тані тіянкӧд Сійӧ, коді Соломон дорысь ыджыдджык.

³² Ниневия карын олысьяс сувтасны мыждан лунӧ ӧнія олысьяскӧд да мыжаласны найӧс. Ӧд Ионалӧн юӧртӧм бӧрын ниневияса йӧз бергӧдчисны асланыс мыжъясысь. Но тані тіянкӧд Сійӧ, коді Иона дорысь ыджыдджык».

Вир-яйлӧн югыдыс

³³ «Ӧзтӧм битӧ оз дзебны, оз пуктыны доз улӧ. Сійӧс пуктӧны бикок вылӧ, медым пырысьяс аддзисны югыдсӧ.

³⁴ Синмыд – вир-яйтӧ югдӧдысь. Синмыд кӧ бур, став вир-яйыд югыдын. Синмыд кӧ лёк, вир-яйыд пемыдын.

³⁵ Видзӧд, мед югыдыс тэ пытшкын эз вӧв пемыд!

³⁶ Тэнад кӧ став вир-яйыд югыдын, и весиг ӧти юкӧн абу пемыдын, сэки тэ ставнас пондан югъявны югдӧдысь би моз».

Исус мыжалӧ фарисейясӧс да Индӧдӧ велӧдысьясӧс

³⁷ Кор Исус помаліс сёрнисӧ, ӧти фарисей корис Сійӧс гортас пажнайтны. Исус локтіс фарисей ордӧ да пуксис сёйны.

³⁸ Исуслӧн мыссьытӧг сёйны пуксьӧмыс шензьӧдіс фарисейӧс.

³⁹ Господь шуис сылы: «Ті, фарисейяс, тасьті-дозмуклысь ортсысӧ весаланныд, а пытшкӧсныд горшлунӧн да лёкӧн тырӧма.

⁴⁰ Вежӧртӧмъяс! Эз-ӧ ортсысӧ вӧчысьыс вӧч тшӧтш пытшкӧссӧ?

⁴¹ Сетӧй корысьяслы, мый дозмук пытшкас. Сэки ставыс тіян лоӧ сӧстӧм.

⁴² Курыд шог тіянлы, фарисейяс! Ті сетанныд исань турунысь, рута корйысь да став пуктасысь дасӧд юкӧнсӧ, а веськыда мыждӧмсӧ да Енмӧс радейтӧмсӧ бокӧ вештанныд. Тайӧс колӧ вӧчны да мукӧдторсӧ оз ков вунӧдны.

⁴³ Курыд шог тіянлы, фарисейяс! Ті радейтанныд синагогаын водзын пукавны да йӧзаинын чолӧмалӧмъяс кывзыны.

⁴⁴ Курыд шог тіянлы, Индӧдӧ велӧдысьяс да фарисейяс! Кык бана шаньгаяс! Ті пасйытӧм шойгуяс кодьӧсь, йӧзыс тӧдтӧгныс ветлӧны на вывті».

⁴⁵ Сэки Индӧдӧ велӧдысьясысь ӧти шуис Сылы: «Велӧдысь, татшӧм сёрнинад Тэ янӧдан тшӧтш миянӧс».

⁴⁶ Исус воча шуис: «Курыд шог тшӧтш тіянлы, Индӧдӧ велӧдысьяс! Ті пуктанныд йӧзлы пельпом вылас нуны вермытӧм нӧбъяс, но асьныд весиг чунь помнад онӧ отсалӧй налы.

⁴⁷ Курыд шог тіянлы! Ті сувтӧданныд казьтылан изъяс пророкъяслы, кодъясӧс батьясныд виисны.

⁴⁸ Тайӧн ті петкӧдланныд, мый ӧтувтчанныд батьясныдлӧн уджъясӧ: найӧ виисны пророкъясӧс, а ті сійӧ пророкъясыслы изъяс сувтӧданныд.

⁴⁹ Та вӧсна Енлӧн мывкыдлуныс висьталӧ: ”Мӧдӧда на дінӧ пророкъясӧс да апостолъясӧс. Ӧтиясӧс найӧ виасны, мӧдъясӧс вӧтласны”.

⁵⁰ Тадзи ӧнія олысьяслы ковмас мынтысьны став пророкыслӧн вирысь, мый кисьтӧма му пуксьӧмсяньыс:

⁵¹ Авель вирсянь да Закар вирӧдз, кодӧс виисны висьпуктанін да крам костын. Висьтала тіянлы: ӧнія олысьяслы ковмас мынтысьны таысь.

⁵² Курыд шог тіянлы, Индӧдӧ велӧдысьяс! Ті босьтінныд тӧдӧмлуныслысь восьтансӧ. Асьныд энӧ пырӧй и пырны кӧсйысьяслы потшинныд туйсӧ».

⁵³ Исуслӧн сёрнитігӧн Индӧдӧ велӧдысьяс да фарисейяс тыртісны Сійӧс юалӧмъясӧн.

⁵⁴ Найӧ зілисны крукыштны Исусӧс, корсисны помка мыжавны Сійӧс.