Левит 26 - Коми Библия 2023

Кывзысьӧм вайӧ бурсиӧм

¹ «Энӧ вӧчӧй бӧлбанъясӧс, энӧ сувтӧдӧй из сюръяяс да серпасалӧм изъяс, медым налы юрбитны. Ме – Господь, тіян Енныд.

² Видзӧй Менсьым шойччан лунӧс, пыдди пуктӧй Менсьым вежаинӧс. Ме – Господь.

³ Кутчысянныд кӧ Менам индӧд-тшӧктӧмъясӧ да оланныд кӧ на серти,

⁴ сэки Ме ас кадӧ мӧдӧда тіянлы зэр, и муыс сетас быдтас, пуясыс сетасны вотӧс.

⁵ Ті кутанныд нянь вартны виноград чукӧрттӧдз, а виноград чукӧртӧмныд нюжалас кӧдзан кадӧдз. Ті кутанныд пӧттӧдз сёйны да повтӧг овны асланыд муын.

⁶ Тіян муӧ Ме вая лӧнь олӧм. Воданныд узьны, и тіянӧс некод оз повзьӧд. Тіян муысь Ме ылыста зверъясӧс, сэні оз лоны тышъяс.

⁷ Ті кутанныд вӧтлыны вӧрӧгъяснытӧ, найӧ куласны тіян шыпурт помысь.

⁸ Тіян пӧвстысь витыс вӧтлас сёӧс, а сёыс вӧтлас дас сюрсӧс. Вӧрӧгъясныд куласны тіян шыпурт помысь.

⁹ Ме бергӧдча тіянлань [да бурсиа тіянӧс]. Ме сета тіянлы чужтысьны-рӧдмыны. Тіянкӧд кӧрталӧм йитӧдӧс Ме збыльмӧда.

¹⁰ Колян вося сёянныд оз быр, сійӧс весиг ковмас шыблавны.

¹¹ Ме ог кут зывӧктыны тіянӧс, Ассьым оланінӧс сувтӧда тіян шӧрӧ.

¹² Ме кута ветлӧдлыны тіян пӧвстын да лоа тіян Енмӧн, а ті – Менам войтырӧн.

¹³ Ме – Господь, тіян Енныд. Ме петкӧді тіянӧс Египет муысь, медым ті энӧ олӧй кесйӧг туйын. Ме мезді тіянӧс сийӧс улысь, медым ті веськӧдчӧмӧн ветлӧдлінныд».

Кывзысьтӧмлун вайӧ ёрӧм

¹⁴ «Онӧ кӧ кывзӧй Менӧ да онӧ олӧй став индӧдыс серти,

¹⁵ мустӧмтанныд-зывӧктанныд кӧ Менсьым индӧд-тшӧктӧмъясӧс, Менам тшӧктӧмъяс серти кӧ онӧ олӧй, а торканныд Менсьым йитӧдӧс,

¹⁶ тӧдӧй, мый Ме сэки тіянкӧд вӧча. Ме мӧдӧда тіян вылӧ полӧм, вир-яй косьмӧм да биа висьӧм, мый вӧсна тіян синныд пемдас и ловныд нюкыртчас. Ті весьшӧрӧ кутанныд кӧдзны, ӧд вӧрӧг сёяс няньнытӧ.

¹⁷ Ме тіянлы паныд сувта. Вӧрӧгныд вермас тіянӧс, мустӧмтысьныд кутас ыджыдавны тіян вылын. Ті котӧрӧн пышъянныд, кӧть вӧтӧдысьыс оз ло.

¹⁸ Весиг та бӧрын кӧ ті онӧ кутӧй кывзысьны Менсьым, Ме сизим пӧвстӧн мыжда тіянӧс мыжъяссьыныд.

¹⁹ Тіянлысь пыксьӧм-асныралӧмнытӧ Ме песовта. Вӧча сідзи, мый тіян весьтын енэжыс кӧрт кодь лоӧ, а муныд – ыргӧн кодь.

²⁰ Весьшӧрӧ вынтӧ пуктанныд, ӧд муныд оз сет быдтассӧ, пуясныд оз сетны тіянлы вотӧссӧ.

²¹ Весиг та бӧрын кӧ ті Меным паныд сувтанныд да онӧ кутӧй кывзысьны Менсьым, Ме сизим пӧвстӧн мыжда тіянӧс мыжъяссьыныд.

²² Мӧдӧда тіян вылӧ зверъясӧс, и найӧ гусявласны ныв-пинытӧ да косявласны ыж-мӧснытӧ. Ті кутанныд чинӧмӧн чинны, и тіян туйяс вывті ветлысь-мунысьыс оз ло.

²³ Весиг та бӧрын кӧ онӧ кутӧй кывзысьны да Меным паныд сувтанныд,

²⁴ Ме тшӧтш [скӧрмӧмӧн] тіянлы паныд сувта, сизим пӧвстӧн мыжда тіянӧс мыжъяссьыныд.

²⁵ Йитӧд торкӧмысь Ме вайӧда тіян вылӧ вӧрӧгӧс. Татшӧм ногӧн тіянлысь водзӧс перъя. Дзебсянныд кӧ асланыд каръясӧ, Ме мӧдӧда тіян вылӧ пӧрӧс висьӧм, сета тіянӧс вӧрӧг киӧ.

²⁶ Ме мырддя тіянлысь няньнытӧ. Ӧти пач дорын дас ань кутасны пӧжасьны, няньсӧ веситӧмӧн кутасны юклыны. Ті кутанныд сёйны, но онӧ пӧтӧй.

²⁷ Весиг та бӧрын кӧ онӧ кутӧй кывзысьны да Меным паныд сувтанныд,

²⁸ Ме скӧрмӧмӧн тіянлы паныд сувта да сизим пӧвстӧн мыжда тіянӧс мыжъяссьыныд.

²⁹ Ныв-пиныдлысь яйсӧ ті сёйны кутанныд.

³⁰ Вись ваян мылькъяснытӧ Ме бырӧда, тшынӧдчан висьпуктанінъястӧ жугла, шойяснытӧ шыблала жуглӧм бӧлбанъясныд вылӧ. Ті лоанныд Меным зывӧкӧсь.

³¹ Каръяснытӧ Ме пасьварта, вежаинъяснытӧ бырӧда, чӧскыда ӧвтан висьяснытӧ ог сибӧд.

³² Ме кушта тіянлысь мунытӧ. Вӧрӧгныд весьӧпӧрас, кор локтас сэтчӧ овмӧдчыны.

³³ Ме разӧда тіянӧс войтыръяс пӧвстӧ, бӧрсяньныд вӧтча шыпуртӧн. Тіян муныд овтӧммас, каръясныд киссясны.

³⁴ Сэки муныд вермас шойччыны, аслас шойччытӧм воясысь водзӧс босьтны. Ті кутанныд овны вӧрӧгныдлӧн муын, а тіян муныд кутас шойччыны, сійӧ водзӧс босьтас аслас шойччытӧм воясысь.

³⁵ Кор ті онӧ кутӧй овны асланыд муын, тіян муныд шойччас сійӧ воясысь, кор сэні олігӧн ті муыслы шойччӧгсӧ энӧ сетлӧй.

³⁶ Тіян пӧвстысь ловйӧн кольӧмаяс кутасны овны вӧрӧглӧн муын. Сэні Ме тіян сьӧлӧмӧ пукта полӧм. Коръяслӧн кышакылӧмысь ті пышъянныд шыпуртысь моз да усянныд, кӧть вӧтӧдысьыс оз ло.

³⁷ Ті пышъянныд шыпуртысь моз да конъясянныд ӧта-мӧданыд, кӧть вӧтӧдысьыс оз ло. Вӧрӧгкӧд водзсасьнытӧ онӧ вермӧй.

³⁸ Ті куланныд мукӧд войтыръяс пӧвстын, тіянӧс ньылыштас вӧрӧгныдлӧн муыс.

³⁹ Тіян пӧвстысь ловйӧн кольӧмаяс асланыс да батьясныслӧн мыж вӧсна косьмасны-сісьмасны вӧрӧг муын.

⁴⁰ Но найӧ висьтасясны асланыс да батьясныслӧн мыжысь, Меным паныд сувтӧмысь да Менӧ эновтӧмысь,

⁴¹ мый вӧсна Ме [скӧрмӧмӧн] налы паныд сувті, вӧтлі найӧс вӧрӧг муӧ. Сэні найӧ мынтысясны мыжсьыныс, и налӧн вундыштчытӧм сьӧлӧмныс раммас Ме водзын.

⁴² Сэки Ме тӧд вылӧ уськӧда Яковкӧд кӧрталӧм йитӧдӧс, Исааккӧд кӧрталӧм йитӧдӧс да Ӧвраамкӧд кӧрталӧм йитӧдӧс, казьтышта налӧн муыс йылысь.

⁴³ Кор налӧн эновтӧм да кушмӧм муыс кутас шойччыны, сійӧ водзӧс босьтас аслас шойччытӧмысь. Найӧ мынтысясны мыжсьыныс, мый мустӧмтісны-зывӧктісны Менсьым индӧд-тшӧктӧмъясӧс.

⁴⁴ Но весиг сэки, кор найӧ лоасны вӧрӧгныслӧн муын, Ме ог мустӧмт-зывӧкты найӧс. Ме найӧс ог бырӧд, накӧд кӧрталӧм йитӧдӧс ог торк, ӧд Ме – Господь, налӧн Ен.

⁴⁵ На ради Ме тӧд вылӧ уськӧда Ассьым йитӧдӧс, мый кӧрталі налӧн батьяскӧд, кодъясӧс мукӧд войтыръяслӧн син водзын петкӧді Египет муысь, медым лоны налӧн Енмӧн. Ме – Господь».

⁴⁶ Тайӧ индӧд-тшӧктӧмъяссӧ Господь сетіс Мӧисей пыр Израиль пиянлы Синай керӧсын.