Левит 25 - Коми Библия 2023

Сизимӧд во

¹ Синай керӧсын Господь тшӧктіс Мӧисейлы

² висьтавны Израиль пиянлы: «Кор ті овмӧдчанныд сійӧ муас, мый Ме сета тіянлы, быд сизимӧд воӧ шойччӧдӧй мусӧ, Господьсянь сетӧй муыслы шойччӧг.

³ Квайт во чӧж кӧдзӧй мунытӧ, квайт во чӧж вундалӧй виноград вожъяснытӧ да чукӧртӧй вотӧссӧ.

⁴ Но сизимӧд вонас муыслӧн мед лоӧ Господьлы сиӧм шойччан во. Сэки мунытӧ энӧ кӧдзӧй, виноград вожъяснытӧ энӧ вундалӧй.

⁵ Няньсӧ, мый ачыс быдмас, энӧ вундӧй. Вундавтӧм вожъясысь виноградсӧ энӧ чукӧртӧй. Муыс мед шойччас во гӧгӧр чӧж.

⁶ Мулӧн шойччан воӧ мый ачыс быдмас, лоӧ сёянӧн тіянлы, кесйӧгъясныдлы, меда йӧзныдлы да йӧз муысь локтысьяслы.

⁷ Ыж-мӧсныд да мукӧд пемӧсныд мед тшӧтш сёясны сійӧ, мый ачыс быдмас».

Тшупӧда во

⁸ «Сизим шойччан во мысти, кор коляс сизимысь сизим во, мӧд ногӧн кӧ, нелямын ӧкмыс во,

⁹ сизимӧд тӧлысьлӧн дасӧд лунӧ – Мыж вештан лунӧ – буксӧй буксанӧн став му пасьтала.

¹⁰ Ветымынӧд воыс мед лоӧ тіянлы вежа, сійӧ тшупӧда во. Сэки тіян муын став олысьыслы юӧртӧй мездлун йылысь. Быдӧн мед бӧр босьтӧ ассьыс мусӧ, бӧр локтӧ аслас чужанкотырыс дінӧ.

¹¹ Ветымынӧд воыс тіян мед лоӧ тшупӧда во. Сэки энӧ кӧдзӧй. Няньсӧ, мый ачыс быдмас, энӧ вундӧй. Вундавтӧм вожъясысь виноградсӧ энӧ чукӧртӧй.

¹² Тайӧ тшупӧда воыс мед лоӧ тіянлы вежа. Сёйӧй сӧмын сійӧ, мый ачыс быдмас.

¹³ Тшупӧда воӧ быдӧн мед бӧр локтӧ да босьтӧ ассьыс мусӧ.

¹⁴ Аслад войтырысь мортлы мутӧ вузалігӧн либӧ сылысь мусӧ ньӧбигӧн ӧта-мӧднытӧ энӧ пӧръялӧй.

¹⁵ Мутӧ ньӧбигӧн либӧ вузалігӧн мынтысь вояс арталӧмӧн. Кымын во кольӧ тшупӧда воӧдз, сійӧ воясысь колӧ мынтыны.

¹⁶ Тшупӧда воӧдз кӧ нянь чукӧртан воыс уна на, унджык мынты, а этша кӧ, этшаджык мынты. Вузалысь мед артыштӧ му донсӧ нянь вундан вояслӧн лыд серти.

¹⁷ Энӧ пӧръялӧй ӧта-мӧднытӧ. Полӧй асланыд Енмысь, ӧд Ме – Господь, тіян Енныд.

¹⁸ Кутчысьӧй Менам индӧд-тшӧктӧмъясӧ, олӧй на серти, и ті кутанныд повтӧг овны асланыд муын.

¹⁹ Муыс кутас сетны быдтас, тіян сёянныд пӧтмӧн лоӧ, и ті кутанныд повтӧг овны.

²⁰ Ті юаланныд: ”Мый нӧ кутам сёйны сизимӧд вонас, огӧ кӧ кӧдзӧй да чукӧртӧй быдтаснымӧс?”

²¹ Но тӧдӧй: Ме бурсиа тіянӧс, и квайтӧд вонас муыс сетас быдтассӧ куим во кежлӧ.

²² Кӧкъямысӧд вонас кутанныд кӧдзны, а сёйны кутанныд важ быдтаснытӧ на. Ӧкмысӧд вонас, кытчӧдз оз кисьмы да оз во выль быдтасыс, тіян лоӧ на важ сёяныс».

Вузалӧм му бӧр босьтӧм йылысь

²³ «Мунытӧ пыр кежлӧ энӧ вузалӧй, ӧд сійӧ Менам, а ті сэні йӧз муысь локтысьяс, Менам муӧ овмӧдчысьяс.

²⁴ Лэдзӧй мортыслы бӧр ньӧбны вузалӧм мусӧ.

²⁵ Тіян пӧвстысь кӧ кодкӧ гӧльлун вӧснаыс вузалас ассьыс мусӧ, сылӧн медматысса рӧдвужыс мед бӧр ньӧбас тайӧ мусӧ.

²⁶ Сылӧн кӧ абу матысса рӧдвужыс, коді эськӧ вермис ньӧбны тайӧ мусӧ, но бӧрынджык кӧ сійӧ ачыс вермас бӧр ньӧбны ассьыс мусӧ,

²⁷ сэки мед артыштас муыслысь донсӧ сы серти, кымын во коли мусӧ вузалан восяньыс. И кодлы вузавліс мусӧ, мед вештысяс сійӧ воясысь, мыйта коли тшупӧда воӧдз. Та бӧрын сійӧ мед бӧр локтас да босьтас ассьыс мусӧ.

²⁸ А оз кӧ вермы вештысьнысӧ, сэки вузалӧм муыс мед кольӧ ньӧбысь киӧ тшупӧда воӧдз на. Тшупӧда вонас ньӧбысь мед бӧр сетас мусӧ, а вузалысь мед бӧр босьтас ассьыс мусӧ.

²⁹ Вузалас кӧ кодкӧ стенмӧн кытшалӧм карысь керкасӧ, вузалан лунсянь во чӧж сылӧн эм позянлун бӧр ньӧбны ассьыс керкасӧ.

³⁰ Во чӧжнас кӧ карысь керкасӧ бӧр оз ньӧб, сідзкӧ, керкаыс кольӧ пыр кежлӧ ньӧбысьлы. Тшупӧда воӧ керкаыс вузалысьлы бӧр оз вудж.

³¹ Но стенмӧн кытшавтӧм сиктысь морт вермас ассьыс керкасӧ бӧр ньӧбны мусӧ моз. А оз кӧ ньӧб, тшупӧда воӧ керкаыс бӧр вуджас сылы.

³² Левитъяслӧн пыр эм позянлун бӧр ньӧбны асланыс каръясысь керканысӧ.

³³ Левитъяс пӧвстысь кӧ кодкӧ керкасӧ бӧр оз ньӧб, сэки карысь вузалӧм керкаыс тшупӧда воӧ бӧр вуджас сылы, ӧд левитъяслӧн каръясысь налы вичмӧдӧма керкаяссӧ Израиль пиянлы юклӧм му моз.

³⁴ Левитъяслӧн кар бердысь видзьяс вузавны оз позь, ӧд найӧс сетӧма левитъяслы пыр кежлӧ».

Гӧльяс да кесйӧгъяс йылысь

³⁵ «Тэнад войтырысь кӧ кодкӧ гӧльмас да оз вермы тӧждысьны ас вӧснаыс, отсав сылы. Сійӧ мед тэ ордын олас йӧз муысь локтысь морт моз.

³⁶ Аслыд мыйкӧ чуктӧдӧм могысь содтӧдӧн сылысь эн босьт. Аслад Енмысь пов, и аслад войтырысь мортлы лэдз ас ордад овны. [Ме – Господь.]

³⁷ Сетан кӧ сылы уджйӧзӧн сьӧм, бӧрсӧ содтӧдӧн эн босьт. Сетан кӧ сылы нянь, сетӧм дорсьыд унджык эн босьт.

³⁸ Ме – Господь, тіян Енныд. Ме петкӧді тіянӧс Египет муысь, медым сетны тіянлы Ханаан му да лоны тіян Енмӧн.

³⁹ Тэнад войтырысь кӧ кодкӧ гӧльмас и вузалас асьсӧ тэныд, эн уджӧд сійӧс кесйӧгӧс моз.

⁴⁰ Тэ ордын сійӧ мед олас меда морт либӧ йӧз муысь локтысь моз. Тшупӧда воӧдз мед уджалас тэ ордын,

⁴¹ а сэсся ныв-пиыскӧд мед мунас рӧдвуж дінас, бать рӧдыслӧн муас, да овмӧдчас сэтчӧ.

⁴² Израиль войтыр – Менам кесйӧгъяс, кодъясӧс Ме петкӧді Египет муысь, та вӧсна найӧс кесйӧг туйӧ вузавны оз позь.

⁴³ Энӧ лоӧй чорыдӧсь накӧд, полӧй асланыд Енмысь.

⁴⁴ Кесйӧгъясӧс ньӧбӧй тіянкӧд орччӧн олысь войтыръяс пӧвстысь.

⁴⁵ Йӧз муысь локтысьяслысь ныв-писӧ, кодъяс чужисны тіян муын, сідзжӧ верманныд ньӧбны, и найӧ лоӧны тіян.

⁴⁶ Найӧс ті верманныд кольны асланыд ныв-пилы, верманныд видзны кесйӧгъясӧс моз, а вокъяснытӧ, Израиль пиянӧс, онӧ вермӧй. Энӧ лоӧй чорыдӧсь вокъясныд дінӧ.

⁴⁷ Йӧз муысь локтысь кӧ озырмас, а тэнад войтырысь морт кӧ гӧльмас и вузалас асьсӧ сылы либӧ сысянь чужысьлы кесйӧг туйӧ,

⁴⁸ сэки вузалӧм мортӧс позьӧ ньӧбӧмӧн мездыны. Вокъясыс пиысь мед кодкӧ ньӧбас сійӧс.

⁴⁹ А оз кӧ ньӧб, батьыслӧн вокыс, бать вокыслӧн пиыс либӧ сылӧн рӧдысь кодкӧ мед ньӧбас сійӧс. А ачыс кӧ вермас, мед ас вӧснаыс вештысяс.

⁵⁰ Сійӧ ачыс да сійӧс кесйӧг туйӧ ньӧбысьыс мед арталасны вояс сійӧс вузалан восянь тшупӧда воӧдз. Асьсӧ вузалан донысь сылы колӧ бӧр сетны юкӧнсӧ, мый арталасны медалӧм мортлӧн удждон серти.

⁵¹ Тшупӧда воӧдзыс кӧ дыр на, сійӧ мед мынтысяс мездӧмсьыс вояс серти, мыйта кольӧ на.

⁵² Тшупӧда воыс кӧ матын нин, сійӧ мед арталас да мынтысяс вояс серти, мыйта кольӧ на.

⁵³ Асьсӧ вузалӧм морт мед лоӧ ыджыдыслы став вояс чӧжыс медалӧм мортӧн. Энӧ лэдзӧй, медым ыджыдыс сыкӧд вӧлі чорыд.

⁵⁴ Оз кӧ ло мынтысьӧма вузалӧм мортысь, тшупӧда воӧ сійӧс ныв-пиыскӧд колӧ лэдзны вӧля вылӧ,

⁵⁵ ӧд Израиль пиян – Менам кесйӧгъяс. Ме петкӧді найӧс Египет муысь. Ме – Господь, тіян Енныд».