Левит 20 - Коми Библия 2023

Мыждӧмъяс

¹ Господь шуис Мӧисейлы:

² «Висьтав Израиль пиянлы: мед виасны мортӧс, коді сетас ныв-писӧ Молок идоллы. Израиль войтыр мед изъялас тайӧ мортсӧ, Израиль войтырысь-ӧ сійӧ либӧ йӧз муысь локтысь.

³ Тайӧ мортыслы Ме паныд сувта, бырӧда сійӧс войтыр пӧвстысь сы понда, мый ассьыс кагасӧ Молок идоллы сетіс. Тайӧн сійӧ Менсьым вежаинӧс пежаліс да Менсьым вежа нимӧс янӧдіс.

⁴ Израиль войтыр кӧ тӧдӧ, мый кодкӧ ассьыс писӧ либӧ нывсӧ Молок идоллы сетіс, но оз ви тадзи вӧчысьӧс,

⁵ сэки тадзи вӧчысьлы да сылӧн рӧдвужлы Ме паныд сувта. Ме бырӧда войтыр пӧвстысь быдӧнӧс, коді кырсалысь ань моз сетчӧ Молок идоллы.

⁶ Коді шыасяс кулӧмаӧс корысь либӧ туналысь дінӧ да кырсалысь ань моз мунас на бӧрся, сылы Ме паныд сувта да бырӧда сійӧс войтыр пӧвстысь.

⁷ Вежӧдӧй-сӧстӧммӧдӧй асьнытӧ, лоӧй вежаӧсь, ӧд Ме – Господь, тіян Енныд. [Ме вежа.]

⁸ Олӧй Менам тшӧктӧмъяс серти, ӧд Ме – Господь, тіянӧс Вежӧдысь.

⁹ Коді лёкӧдас бать-мамсӧ, сійӧс мед виасны. Бать-мамсӧ лёкӧдысь ачыс лоӧ мыжа аслас кулӧмысь.

¹⁰ Узяс кӧ кодкӧ мӧдлӧн гӧтыркӧд, найӧ кыкнанныс гозъякост олӧм пежалӧны. Найӧс колӧ вины.

¹¹ Коді узяс батьыслӧн гӧтырыскӧд, сійӧ янӧдӧ батьсӧ. Найӧс кыкнаннысӧ колӧ вины, найӧ асьныс лоӧны мыжаӧсь асланыс кулӧмысь.

¹² Узяс кӧ кодкӧ моньыскӧд, найӧс кыкнаннысӧ колӧ вины. Найӧ зывӧктор вӧчӧны, и найӧ асьныс лоӧны мыжаӧсь асланыс кулӧмысь.

¹³ Айлов, коді айловкӧд узяс анькӧд моз, зывӧктор вӧчӧ. Найӧс кыкнаннысӧ колӧ вины, найӧ асьныс лоӧны мыжаӧсь асланыс кулӧмысь.

¹⁴ Коді гӧтырӧ босьтас аньӧс да сылысь мамсӧ, сійӧ зывӧктор вӧчӧ. Найӧс куимнаннысӧ колӧ биын сотны, медым тіян пӧвстын эз вӧв пеж вӧчӧмыс.

¹⁵ Айловӧс пемӧскӧд узьӧмысь колӧ вины, пемӧссӧ тшӧтш колӧ вины.

¹⁶ Аньӧс пемӧскӧд узьӧмысь колӧ вины, пемӧссӧ тшӧтш колӧ вины. Мед найӧс виасны, найӧ асьныс лоӧны мыжаӧсь асланыс кулӧмысь.

¹⁷ Босьтас кӧ кодкӧ гӧтырӧ чойсӧ, батьыслысь нывсӧ либӧ мамыслысь нывсӧ да узяс сыкӧд, тайӧ яндысьтӧмтор. Найӧс мед бырӧдасны войтыр пӧвстысь. Чойыскӧд узьӧмысь мортыс лоӧ мыжа.

¹⁸ Айлов кӧ узяс анькӧд сылӧн тӧлысся дырйиыс да аддзылас сылысь вир мунӧмсӧ, и тӧлысся дырйис кӧ аньыс ачыс лэдзас айловӧс ас дінас, сэки кыкнаннысӧ мед бырӧдасны войтыр пӧвстысь.

¹⁹ Мамыдлӧн чойкӧд да батьыдлӧн чойкӧд эн узьлы. Коді тадзи вӧчӧ, сійӧ ассьыс рӧдвужсӧ янӧдӧ. Найӧ кыкнанныс лоӧны мыжаӧсь.

²⁰ Коді узяс тьӧткаыскӧд, сійӧ дядьсӧ янӧдӧ. Найӧ кыкнанныс лоӧны мыжаӧсь да куласны ныв-питӧг.

²¹ Коді гӧтырӧ босьтас вокыслысь гӧтырсӧ, сійӧ пеж вӧчӧ, ӧд воксӧ янӧдӧ. Налӧн оз ло ныв-пиыс.

²² Кутчысьӧй Менам индӧд-тшӧктӧмъясӧ, олӧй на серти, сэки муыс, кытчӧ тіянӧс нуӧда, оз быликты тіянӧс.

²³ Энӧ олӧй войтыръяс моз, кодъясӧс Ме вӧтла тіян водзысь. Найӧ вӧчӧны став тайӧ зывӧкторсӧ, та вӧсна Ме мустӧмта найӧс.

²⁴ А тіянлы Ме шуи, мый ті босьтанныд налысь мусӧ. Ме сета тіянлы му, кӧні визувтӧ йӧв да ма. Ме – Господь, тіян Енныд. Ме торйӧді тіянӧс мукӧд войтыръясысь.

²⁵ Ті тшӧтш торйӧдӧй сӧстӧм пемӧсӧс пеж пемӧсысь, сӧстӧм лэбачӧс пеж лэбачысь. Энӧ пежалӧй асьнытӧ сэтшӧм пемӧс-лэбач да му вывті котралысь-веглясьысь вӧсна, кутшӧмӧс Ме шуи пежӧн.

²⁶ Лоӧй вежаӧсь Ме водзын, ӧд Ме вежа. Ме – Господь [тіян Енныд]. Ме торйӧді тіянӧс мукӧд войтыръясысь, медым ті вӧлінныд Менам.

²⁷ Кулӧмаӧс корысьӧс да тунасьысьӧс колӧ вины, ань-ӧ сійӧ либӧ айлов. Сійӧс мед изъяласны, сійӧ ачыс лоӧ мыжа аслас кулӧмысь».