Левит 19 - Коми Библия 2023

Лоӧй вежаӧсь

¹ Господь шуис Мӧисейлы:

² «Висьтав став Израиль войтырлы: лоӧй вежаӧсь, ӧд Ме вежа. Ме – Господь, тіян Енныд.

³ Пыдди пуктӧй бать-мамнытӧ. Видзӧй Менсьым шойччан лунӧс. Ме – Господь, тіян Енныд.

⁴ Энӧ юрбитӧй идолъяслы, энӧ сывдӧй-вӧчӧй аслыныд бӧлбанъясӧс. Ме – Господь, тіян Енныд.

⁵ Господьлы бурасян висьнытӧ вайигӧн видзӧдӧй, медым вӧлінныд шогманаӧсь.

⁶ Тіянлы колӧ сёйны вайӧм висьнытӧ сійӧ жӧ лунӧ, но коляс кӧ мыйкӧ, сійӧс позьӧ сёйны мӧд луннас на. Коймӧд лунся яйсӧ колӧ сотны биын.

⁷ Сёянныд кӧ сійӧс коймӧд луннас, висьныд оз ло шогмана, тайӧ – пеж яй.

⁸ Коді сёяс татшӧм яйсӧ, лоӧ мыжа, ӧд Господьлысь вежаторсӧ пежаліс. Сійӧс лоӧ бырӧдӧма аслас войтыр пӧвстысь.

⁹ Няньнытӧ вундігӧн му бокъяссӧ кольӧй вундытӧг. Вундӧм дырйи усьласьӧм шепсӧ энӧ чукӧртӧй.

¹⁰ Виноград вотӧснытӧ энӧ кушӧдз ӧктӧй и му вылас гылалӧмасӧ энӧ босьталӧй. Гӧльяслы да йӧз муысь локтысьяслы чукӧртны кольӧй. Ме – Господь, тіян Енныд.

¹¹ Энӧ гусясьӧй да энӧ пӧръясьӧй, ӧта-мӧднытӧ энӧ ылӧдлӧй.

¹² Менам нимӧн пӧръясьӧмӧн энӧ сетӧй кывнытӧ, медым энӧ янӧдӧй Менсьым нимӧс. Ме – Господь, тіян Енныд.

¹³ Некодӧс эн дзескӧд, некодлысь эн мырддяв. Медалӧм мортлысь удждонсӧ ас дінад асылӧдзыс эн кут.

¹⁴ Пельтӧм морт вылын эн серав, синтӧмлы кок улас эн пукты крукасянтор. Аслад [Господь] Енмысь пов. Ме – Господь [тіян Енныд].

¹⁵ Ёрд вылын ло веськыд. Мыжды веськыда, эн видзӧд чужӧм вылӧ. Гӧль и озыр морт мед лоӧны тэныд ӧткодьӧсь.

¹⁶ Аслад войтыр пӧвстын ылӧг сёрни эн паськӧд. Эн вешйы бокӧ, тэнсьыд матыссатӧ кӧ кодкӧ мыждӧ кулӧм вылӧ. Ме – Господь [тіян Енныд].

¹⁷ Эн мустӧмт матыссатӧ, а ӧлӧд сійӧс, медым сыкӧд ӧтвылысь мыж улас эн шед.

¹⁸ Водзӧс эн перйы да эн скӧрав аслад войтырысь морт вылӧ, но радейт матыссатӧ асьтӧ моз. Ме – Господь [тіян Енныд].

¹⁹ Менам тшӧктӧмъяс серти ов. Пемӧстӧ мӧд сикас пемӧскӧд эн нӧйччӧд. Мутӧ кык сикас кӧйдысӧн эн кӧдз. Кык сикас шӧртысь – вурунысь да шабдіысь – сорлалӧмӧн кыӧм кӧлуй эн пасьтав.

²⁰ Узяс кӧ кодкӧ кесйӧг анькӧд, кодӧс кӧсйысьӧма мӧдлы, но сыысь абу на вештысьӧма либӧ сійӧс абу на лэдзӧма вӧля вылӧ, сэки найӧс кыкнаннысӧ колӧ мыждыны, но оз ков вины, ӧд аньыс кесйӧг туйын на.

²¹ Тайӧ айловыс мед вайӧдас Господьлы мыж вештан вись пыдди межӧс вежа чом пыранін дорӧ.

²² Поп мед ваяс межсӧ мыж вештан вись пыдди. Тадзи вештас мортлысь мыжсӧ Господь водзын, и сійӧс лоӧ прӧститӧма.

²³ Кор воанныд асланыд муӧ [мый Господь Ен сетас тіянлы] да пуктанныд кутшӧмкӧ вотӧс вайысь пу, куим во чӧж сылысь вотӧссӧ лыддьӧй пежӧн, энӧ сёйӧй сійӧс.

²⁴ Нёльӧд вонас став вотӧссӧ вайӧй Господьлы, тайӧ лоӧ гаждырся вежа сетӧмторйӧн.

²⁵ Витӧд вонас верманныд сёйны вотӧссӧ. Тадзи ті кутанныд чукӧртны унасьыс-уна вотӧс. Ме – Господь, тіян Енныд.

²⁶ Энӧ сёйӧй яйсӧ вирнас. Энӧ тунасьӧй, энӧ кимӧститчӧй.

²⁷ Кӧсичадор юрсинытӧ энӧ шырӧй. Тоштӧ энӧ тшӧтшӧдӧй.

²⁸ Кулӧм морт вӧсна энӧ вундалӧй вир-яйнытӧ, кучик выланыд энӧ гижасьӧй-серпасасьӧй. Ме – Господь [тіян Енныд].

²⁹ Эн янӧд ассьыд нывтӧ, эн лэдз сылы кырсавны, медым муыс эз пежась да эз тыр зывӧкнас.

³⁰ Видзӧй Менсьым шойччан лунӧс, пыдди пуктӧй Менсьым вежаинӧс. Ме – Господь.

³¹ Кулӧмаӧс корысь да туналысь дінӧ энӧ шыасьӧй, насянь асьнытӧ энӧ пежалӧй. Ме – Господь, тіян Енныд.

³² Пыдди пукты пӧрысь мортӧс, чеччы сы водзын. Пов аслад [Господь] Енмысь. Ме – Господь [тіян Енныд].

³³ Йӧз муысь локтысьӧс энӧ дзескӧдӧй.

³⁴ Йӧз муысь локтысьясӧс, кодъяс олӧны тіян пӧвстын, лыддьӧй вужвойтырӧн. Радейтӧй найӧс асьнытӧ моз. Ӧд Египетын ті асьныд вӧлінныд локтысь войтырӧн. Ме – Господь, тіян Енныд.

³⁵ Ёрд вылын ло веськыд. Мурталігӧн-веситігӧн тшӧтш ло веськыд.

³⁶ Вескиыд мед стӧча веситас. Гираыд, ефаыд да гиныд мед оз пӧрйӧдлыны. Ме – Господь, тіян Енныд. Ме петкӧді тіянӧс Египет муысь.

³⁷ Кутчысьӧй Менам индӧд-тшӧктӧмъясӧ, олӧй на серти. Ме – Господь [тіян Енныд]».