Левит 18 - Коми Библия 2023

Кодкӧд оз позь узьлыны

¹ Господь шуис Мӧисейлы:

² «Висьтав Израиль пиянлы: Ме – Господь, тіян Енныд.

³ Энӧ вӧчӧй Египет муын олысьяс моз, кодъяс пӧвстын ті олінныд. Ме нуӧда тіянӧс Ханаан муӧ, но энӧ вӧчӧй сэні олысьяс моз, энӧ олӧй налӧн оласног серти.

⁴ Олӧй Менам индӧд-тшӧктӧмъяс серти. Ме – Господь, тіян Енныд.

⁵ Кутчысьӧй Менам индӧд-тшӧктӧмъясӧ. На серти олысь наӧн пондас овны. Ме – Господь [тіян Енныд].

⁶ Тіян пӧвстысь некод мед оз узьлы рӧдвуж аньыскӧд. Ме – Господь.

⁷ Батьтӧ эн янӧд, мамыдкӧд эн узьлы гӧтыркӧд моз.

⁸ Батьтӧ эн янӧд, сылӧн гӧтыркӧд эн узьлы.

⁹ Эн узьлы чойыдкӧд, батьыдлӧн нылыскӧд либӧ мамыдлӧн нылыскӧд, чужӧма-ӧ сійӧ ӧти керкаын тэкӧд либӧ абу.

¹⁰ Эн узьлы пиыдлӧн либӧ нылыдлӧн нывкӧд, медым асьтӧ эн янӧд.

¹¹ Эн узьлы батьыд гӧтырлӧн нывкӧд, коді чужис тэнад батьсянь, ӧд сійӧ тэнад чой.

¹² Эн узьлы батьыдлӧн чойыскӧд, ӧд сійӧ батьыдлӧн рӧдвуж.

¹³ Эн узьлы мамыдлӧн чойыскӧд, ӧд сійӧ мамыдлӧн рӧдвуж.

¹⁴ Батьыдлысь воксӧ эн янӧд, сылӧн гӧтыркӧд эн узьлы, ӧд сійӧ тэнад тьӧтка.

¹⁵ Эн узьлы моньыдкӧд, ӧд сійӧ пиыдлӧн гӧтыр.

¹⁶ Воктӧ эн янӧд, вокыдлӧн гӧтырыскӧд эн узьлы.

¹⁷ Узян кӧ кутшӧмкӧ анькӧд, эн узьлы сылӧн нывкӧд, пиыслӧн нывкӧд либӧ нылыслӧн нывкӧд, ӧд найӧ аньыдлӧн рӧдысь. Тадзи вӧчӧмыс – зывӧк.

¹⁸ Ловъя гӧтырыдлысь чойсӧ эн босьт гӧтырӧ да эн узьлы сыкӧд.

¹⁹ Эн узьлы гӧтырыдкӧд сылӧн тӧлысся дырйиыс, ӧд сэки сійӧ абу сӧстӧм.

²⁰ Мӧдлӧн гӧтыркӧд эн узьлы, эн пежав асьтӧ.

²¹ Ныв-питӧ эн вай вись пыдди Молок идоллы, эн янӧд аслад Енлысь нимсӧ. Ме – Господь.

²² Айловкӧд эн узьлы анькӧд моз. Тадзи вӧчӧмыс – зывӧк.

²³ Пемӧскӧд эн узьлы анькӧд моз, эн пежав асьтӧ. Ань мед оз узьлы пемӧскӧд айловкӧд моз. Тадзи вӧчӧмыс – зывӧк.

²⁴ Тадзи вӧчӧмнаныд асьнытӧ энӧ пежалӧй, ӧд тадзи вӧчигӧн асьнысӧ пежалісны войтыръяс, кодъясӧс Ме вӧтла тіян водзысь.

²⁵ На вӧсна муыс пежасис. Ме мыжді мусӧ сэні олысьяслӧн мыжныс вӧсна, и муыс быликтіс найӧс.

²⁶ Но ті олӧй Менам индӧд-тшӧктӧмъяс серти, энӧ вӧчӧй тайӧ зывӧкторъяссӧ, ни вужвойтыр, ни йӧз муысь локтысьяс.

²⁷ Став тайӧ зывӧкторсӧ вӧчисны тіянӧдз олысьяс. Та вӧсна муыс лои пеж.

²⁸ Энӧ пежалӧй мусӧ, ӧд и тіянӧс муыс вермас быликтыны, кыдзи быликтіс тіянӧдз сэні олысь войтыръясӧс.

²⁹ Татшӧм зывӧкторсӧ вӧчысьӧс лоӧ бырӧдӧма аслас войтыр пӧвстысь.

³⁰ Олӧй Менам тшӧктӧмъяс серти, а энӧ тіянӧдз олысьяслӧн зывӧк оласног серти. Энӧ пежалӧй асьнытӧ налӧн кодь оласногӧн. Ме – Господь, тіян Енныд».