Левит 15 - Коми Библия 2023

Вир-яй сӧстӧммӧдӧм йылысь

¹ Господь шуис Мӧисейлы да Ааронлы:

² «Висьталӧй Израиль пиянлы: айловлӧн кудзасян йывсьыс кӧ петӧ лёквиялӧм, сійӧ пеж.

³ Тайӧ индӧдыс лёквиялӧм вӧсна пежӧн лоӧм йылысь. Мортыс лоӧ пеж, сылӧн вир-яйысь кӧ петӧ лёквиялӧм либӧ оз пет, но чукӧрмӧ вир-яяс.

⁴ Сылӧн куйланіныс да пукаланіныс лоӧ пеж.

⁵ Сылӧн куйланінӧ инмӧдчысьлы колӧ мыськавны паськӧмсӧ да аслыс тшӧтш мыссьыны. Рытӧдзыс сійӧ лоӧ пеж.

⁶ Коді пуксяс сэтчӧ, кӧні пукаліс лёквиялӧмӧн висьысь, сылы колӧ мыськавны паськӧмсӧ да аслыс тшӧтш мыссьыны. Рытӧдзыс сійӧ лоӧ пеж.

⁷ Висьысь дінӧ инмӧдчысьлы колӧ мыськавны паськӧмсӧ да аслыс тшӧтш мыссьыны. Рытӧдзыс сійӧ лоӧ пеж.

⁸ Сьӧлыштас кӧ висьысь сӧстӧм мортлы, мортыс рытӧдзыс лоӧ пеж, сылы колӧ мыськавны паськӧмсӧ да аслыс тшӧтш мыссьыны.

⁹ Тарантасыс, кӧні пукаліс висьысь, [рытӧдзыс] лоӧ пеж.

¹⁰ Быдӧн, коді инмӧдчылас кӧлуйӧ, мый вылын пукаліс висьысь, рытӧдзыс лоӧ пеж. Коді нуас-петкӧдас татшӧм кӧлуйсӧ, сылы колӧ мыськавны паськӧмсӧ да аслыс тшӧтш мыссьыны. Рытӧдзыс сійӧ лоӧ пеж.

¹¹ Лёквиялӧмӧн висьысь айлов кӧ кисӧ мыськытӧг инмӧдчылас кодкӧ дінӧ, мӧдыс мед мыськалас паськӧмсӧ да ачыс тшӧтш мыссяс. Рытӧдзыс сійӧ лоӧ пеж.

¹² Висьысь кӧ инмӧдчылас гырнич дозйӧ, дозсӧ колӧ жугӧдны, а дозмукыс кӧ пуысь, сійӧс колӧ мыськыны ваӧн [и дозмукыс лоӧ сӧстӧм].

¹³ Кор айлов бурдас лёквиялӧмсьыс, бурдӧмсяньыс сизим лун мысти сійӧ мед мыськалас паськӧмсӧ, мыссяс визувтан ваын, и сійӧ лоӧ сӧстӧм.

¹⁴ Кӧкъямысӧд луннас мед босьтас кык гулюӧс либӧ кык гулюпиӧс да локтас Господь водзӧ вежа чом пыранін дорӧ. Сэні мед сетас найӧс поплы.

¹⁵ Ӧтисӧ поп мед ваяс мыжысь вись пыдди, а мӧдсӧ – сотан вись пыдди. Тадзи поп вештас сылысь мыжсӧ Господь водзын да сӧстӧммӧдас сійӧс лёквиялӧмсьыс.

¹⁶ Айловлӧн кӧ петас кӧйдысыс, сылы колӧ ставнас мыссьыны. Рытӧдзыс сійӧ лоӧ пеж.

¹⁷ Паськӧмсӧ да пемӧс кучикысь вӧчӧмторсӧ, кытчӧ петас кӧйдысыс, колӧ мыськавны. Рытӧдзыс сійӧ лоӧ пеж.

¹⁸ Айловлӧн кӧ петас кӧйдысыс, кор узьлӧ анькӧд, налы кыкнанныслы колӧ мыссьыны. Рытӧдзыс найӧ лоӧны пежӧсь.

¹⁹ Аслас тӧлысся дырйи ань сизим лун чӧж лоӧ пеж. Коді инмӧдчас сы дінӧ, рытӧдзыс лоӧ пеж.

²⁰ Ставыс, мый вылын ань тӧлысся дырйиыс куйлӧ да пукалӧ, лоӧ пеж.

²¹ Аньлӧн куйланінӧ инмӧдчысьлы колӧ мыськавны паськӧмсӧ да аслыс тшӧтш мыссьыны. Рытӧдзыс сійӧ лоӧ пеж.

²² Быдӧн, коді инмӧдчылас кӧлуйӧ, мый вылын пукаліс ань, мед мыськалас паськӧмсӧ да ачыс тшӧтш мыссяс. Рытӧдзыс сійӧ лоӧ пеж.

²³ Коді инмӧдчылас кӧлуйӧ, мый куйлӧ аньлӧн вольпасяс либӧ пуклӧсас, рытӧдзыс лоӧ пеж.

²⁴ Айлов кӧ узяс анькӧд сылӧн тӧлысся дырйиыс, аньлӧн пеж вӧснаыс тшӧтш лоӧ пеж. Сизим лун чӧж айлов да сылӧн куйланіныс лоӧны пежӧсь.

²⁵ Аньлӧн кӧ абу тӧлысся, а вирыс уна лун чӧж мунӧ либӧ сылӧн сӧстӧммӧдчан кадыс нюжалӧ тӧлысся дорысь дырджык, вир мунігас сійӧ тӧлысся дырйиыс моз лоӧ пеж.

²⁶ Сылӧн куйланіныс да пукаланіныс тшӧтш лоӧны пежӧсь.

²⁷ Быдӧн, коді инмӧдчылас сылӧн куйланінас либӧ пукаланінас, лоӧ пеж. Сылы колӧ мыськавны паськӧмсӧ да аслыс тшӧтш мыссьыны. Рытӧдзыс сійӧ лоӧ пеж.

²⁸ Кор вир мунӧмыс помасяс, ань мед лыддьӧ сизим лун, та бӧрти сійӧ лоӧ сӧстӧм.

²⁹ Кӧкъямысӧд луннас ань мед босьтас кык гулюӧс либӧ кык гулюпиӧс да локтас вежа чом пыранін дорӧ. Сэні мед сетас найӧс поплы.

³⁰ Ӧтисӧ поп мед ваяс мыжысь вись пыдди, а мӧдсӧ – сотан вись пыдди. Тадзи поп вештас аньлысь мыжсӧ Господь водзын да сӧстӧммӧдас сійӧс вир мунан пежсьыс.

³¹ Велӧдӧй Израиль войтырӧс видзчысьны пежысь, медым эз кувны Менсьым оланінӧс пежалӧм вӧсна».

³² Тайӧ индӧдыс айлов йылысь, коді лёквиялӧм либӧ кӧйдыс петӧм вӧснаыс лоӧ пеж.

³³ Нӧшта тайӧ индӧдыс аньлӧн тӧлысся мунӧм йылысь, айловлӧн да аньлӧн лёквиялӧм йылысь да айлов йылысь, коді узьӧ анькӧд сылӧн пеж дырйиыс.