Колосӧ 3 - Коми Библия 2023

Важ да выль морт

¹ Ті кӧ ловзинныд Кристоскӧд, корсьӧй енэжвывсасӧ. Ӧд енэжас, Ен веськыдладорын, пукалӧ Кристос.

² Мӧвпалӧй енэжвывсаыс йылысь, а энӧ мувывсаыс йылысь.

³ Ті ӧд кулінныд, да тіянлысь олӧмнытӧ дзебӧма Кристоскӧд Ен пытшкӧ.

⁴ Тіян олӧмыс – Кристос. Кор Сійӧ локтас, Сыкӧд тшӧтш и ті тыдовтчанныд Сылӧн дзирдлунас.

⁵ Та вӧсна бырӧдӧй ас пытшсьыныд мувывсасӧ: кырсалӧм, пеж оласног, лёкколӧм, лёк вылӧ ыштӧм да горшасьӧм. Горшасьӧмыс лоӧ сійӧ жӧ мый идоллы юрбитӧм.

⁶ Тадзи олӧмысь кывзысьтӧм йӧз вылӧ лэччӧ Енлӧн скӧрлуныс.

⁷ Коркӧ ті асьныд татшӧмӧсь вӧлінныд да тадзи олінныд.

⁸ Ӧні эновтӧй скӧралӧмтӧ, лёксьӧмтӧ, лӧгалӧмтӧ, омӧльтӧмтӧ, пеж сёрнитӧ.

⁹ Энӧ пӧръясьӧй, ті ӧд пӧрччинныд нин важ мортлысь оласногнытӧ

¹⁰ да вежсинныд выль мортӧ. Татшӧм мортыс выльмӧ, медым тӧдны ассьыс Вӧчысьсӧ да лоны Сы кодьӧн жӧ.

¹¹ Грек-ӧ тэ либӧ иудей, вундыштчӧмыд-ӧ либӧ абу вундыштчӧмыд, варвар-ӧ либӧ скиф, кесйӧг-ӧ либӧ мездлуна морт – торъялӧмыс абу. Ставыс да ставас Кристос.

¹² Сідзкӧ, лоӧй бур сьӧлӧмаӧсь, меліӧсь, авъяӧсь да рамӧсь, терпитӧй ӧта-мӧднытӧ. Ті ӧд Енлӧн бӧрйӧмаяс, вежаяс да Сылӧн мусаяс.

¹³ Дӧзмытӧг сибӧдӧй ӧта-мӧднытӧ. Эм кӧ код вылӧ норасьӧм, прӧститӧй сійӧс. Кристос ӧд тіянӧс прӧститіс, ті тшӧтш Сы моз прӧститӧй.

¹⁴ Медвойдӧр кутчысьӧй муслунас, ӧд муслуныс ставсӧ йитӧ да вайӧдӧ тыр-бурӧдз.

¹⁵ Тіян сьӧлӧмын мед ыджыдалас Енлӧн лӧньлуныс, кытчӧ корӧма тіянӧс, ті ӧд ӧти вир-яйынӧсь. Быд кадӧ ошкӧй Енмӧс.

¹⁶ Кристослӧн кывйыс мед озыра овмӧдчас тіян пытшкӧ. Мывкыда велӧдӧй-туйдӧдӧй ӧта-мӧднытӧ. Господьӧс аттьӧалӧмӧн сьӧлӧмсяньныд сьылӧй псаломъяс, ошкана сьыланкывъяс да бурсьылӧмъяс.

¹⁷ Кывйӧн-ӧ, уджӧн-ӧ мыйкӧ вӧчанныд, ставсӧ вӧчӧй Господь Исус Кристос нимӧн да аттьӧалӧй Сы пыр Ен Батьӧс.

Ӧта-мӧд костын олӧм

¹⁸ Гӧтыръяс, кывзысьӧй верӧсныдлысь, ӧд тадзи лӧсялӧ вӧчны Господь войтырлы.

¹⁹ Верӧсъяс, радейтӧй гӧтырнытӧ, энӧ лоӧй накӧд чорыдӧсь.

²⁰ Челядь, быдторйын кывзысьӧй бать-мамныдлысь, ӧд Господьлы нимкодь таысь.

²¹ Батьяс, энӧ дӧзмӧдӧй ныв-пинытӧ, медым найӧ эз жугыльмыны.

²² Кесйӧгъяс, быдторйын кывзысьӧй асланыд мувывса ыджыдъяслысь. Кесъялӧй налы восьса сьӧлӧмӧн да Енмысь полӧмӧн, а энӧ йӧз водзын асьнытӧ петкӧдлӧм могысь.

²³ Ставсӧ вӧчӧй сьӧлӧмсяньныд Господьлы моз, энӧ мортлы моз.

²⁴ Тӧдӧй, тіянлы вичмас Господьсянь тырдон, ӧд ті кесъяланныд Кристослы, асланыд Господьлы.

²⁵ А лёксӧ вӧчысьлы лёкыс вичмас. Енмыс оз видзӧд морт чужӧм вылӧ.