Исай 62 - Коми Библия 2023

Ерусалимлӧн выль ним

¹ Сион вӧсна ог кут чӧв овны, Ерусалим ради ог дугды висьтавлыны, кытчӧдз сылӧн веськыдлуныс оз воссьы югыд моз, сылӧн мездмӧмыс оз тыдовтчы ӧзъялысь би моз.

² Сэки войтыръяс аддзасны тэнсьыд веськыдлунтӧ, став ӧксыяс аддзасны тэнсьыд дзирдлунтӧ, тэнӧ нимтасны выль нимӧн, тайӧ нимсӧ сетас тэныд Господь.

³ Тэ лоан дзирдалысь юркытшӧн Господьлӧн киын, лоан ӧксылӧн юркытшӧн Аслад Енлӧн ки пыдӧсын.

⁴ Тэнӧ оз нин шуны Эновтӧмаӧн, тэнсьыд мутӧ оз шуны Кушинӧн, но тэнӧ нимтасны Господьлӧн олан гажӧн, тэнсьыд мутӧ шуасны Гӧтырӧн, ӧд тэ муса Господьлы, и тэнад муыд оз коль верӧстӧг.

⁵ Кыдзи том зон ӧтлаасьӧ том нывкӧд, сідзи тэнад войтырыд ӧтлаасьӧ тэкӧд. Кыдзи верӧспу нимкодясьӧ гӧтырпуыс вӧсна, сідзи тэнад Енмыд пондас нимкодясьны тэ вӧсна.

⁶ Ерусалим, тэнад стенъяс вылӧ Ме сувтӧді кар видзысьясӧс, лун и вой налӧн гӧлӧс шыныс оз ланьтлы. – Ті, Господь дінӧ шыасьысьяс, энӧ чӧв олӧй!

⁷ Дугдывтӧг кевмысьӧй Господьлы, кытчӧдз Сійӧ выльысь оз сувтӧд Ерусалим, кытчӧдз Сійӧ оз нимӧд Ерусалим карсӧ став му пасьталаыс.

⁸ Господь сетіс кыв, кӧсйысис Аслас веськыд кинас, Аслас вына кинас Сійӧ кӧсйысис: – Тэнсьыд няньтӧ Ме ог нин сет вӧрӧгыдлы, йӧз муысь локтысьяс оз кутны юны тэнсьыд винатӧ, мый тэ мудзтӧдзыд вӧчин.

⁹ Но шобді чукӧртысьяс пондасны сёйны ассьыныс няньсӧ да ошкыны таысь Господьӧс, виноград чукӧртысьяс пондасны юны ассьыныс винасӧ Менам вежаин йӧрын.

¹⁰ Петӧй, петӧй дзиръяясӧд, шыльӧдӧй туйсӧ войтырлы! Дасьтӧй, дасьтӧй туйсӧ, весалӧй изъясысь, кыпӧдӧй дӧрапас войтыръяслы!

¹¹ Со, Господь юӧртӧ му помӧдзыс: – Висьталӧй Сион нывлы: видзӧд, локтӧ тэнад Мездысьыд, Сыкӧд ставныс, кодъясӧс Сійӧ шедӧдіс, Сылӧн син водзын ставныс, кодъясӧс Сійӧ Аслыс босьтіс.

¹² Найӧс шуасны Вежа войтырӧн, Господьлӧн мездмӧм йӧзӧн, а тэнӧ шуасны Мусаӧн, Карӧн, мый оз ло эновтӧма.