Исай 6 - Коми Библия 2023

Господь чуксалӧ Исайӧс пророкавны

¹ Озей ӧксылӧн кулан воӧ ме аддзылі Господьӧс. Сійӧ пукаліс выліинын сулалысь джуджыд юралан пуклӧсын. Сылӧн паськӧм пӧлаыс вевттис ставнас крам пытшкӧссӧ.

² Сы дінын сулалісны серафимъяс. Налӧн быдӧнлӧн вӧлі квайт борд. Кык борднас найӧ вевттисны чужӧмнысӧ, мӧд кык борднас – кокнысӧ, и нӧшта кык борднас лэбалісны.

³ Найӧ чуксасисны ӧта-мӧдныскӧд да сьылісны: «Вежа, вежа, вежа Господь Саваоф, став муыс тырӧма Сылӧн дзирдлунӧн!»

⁴ Налӧн гӧлӧс шыысь крам подулыс вӧрзьыліс, и крамыс тырис тшынӧн.

⁵ Сэки ме шуи: «Курыд шог меным, менӧ виччысьӧ кулӧм! Ме ӧд пеж вома морт, ола пеж вома войтыр пӧвстын, но ме аддзылі Ӧксыӧс, Господь Саваофӧс».

⁶ Сэки лэбзис ме дінӧ серафимъяс пӧвстысь ӧтиыс. Шом чепӧляӧн сійӧ кутіс киас висьпуктанінысь босьтӧм биа ӧгыр.

⁷ Биа ӧгырнас сійӧ инмӧдчыліс менам вомдорӧ да шуис: «Тэнсьыд мыжтӧ вештӧма, тэнсьыд лёк вӧчӧмъястӧ прӧститӧма, ӧд тайӧ биа ӧгырыс инмӧдчыліс тэнад вомдорӧ».

⁸ Сэсся ме кылі Господьлысь гӧлӧс шысӧ: «Кодӧс Меным мӧдӧднысӧ? Коді мунас миян пыдди?» Сэки ме шуи: «Со ме, мӧдӧд менӧ!»

⁹ Господь шуис: «Мун да висьтав тайӧ войтырыслы: пельнаныд кутанныд кывзыны да онӧ гӧгӧрвоӧй, синнаныд кутанныд видзӧдны да онӧ аддзӧй.

¹⁰ Чорзьӧд тайӧ войтырыслысь сьӧлӧмнысӧ, найӧ мед лоӧны сьӧкыд пеляӧсь, куньса синмаӧсь. Синнаныс мед оз аддзыны, пельнаныс мед оз кывны, сьӧлӧмнаныс мед оз гӧгӧрвоны, Мелань мед оз бергӧдчыны, медым Ме бурдӧді найӧс».

¹¹ Сэсся ме юалі: «Господьӧй, дыр-ӧ тадзи лоӧ?» Сійӧ вочавидзис: «Кытчӧдз каръяс оз кушмыны, керкаясын оз коль олысьыс, и муыс дзикӧдз оз энды.

¹² Ме вӧтла татысь йӧзсӧ, и тайӧ мусӧ лоӧ дзикӧдз эновтӧма.

¹³ Весиг коляс кӧ тані олысьяс пӧвстысь дасӧд юкӧныс, найӧс тшӧтш лоӧ бырӧдӧма. Кыдзи кералӧм бӧртиыс тупулӧн да ыджыд пулӧн кольӧ вужйыс, сідзи тайӧ войтырлӧн кольӧ вежа петасыс».