Исай 59 - Коми Библия 2023

Лёк вӧчӧм торйӧдӧ войтырӧс Енсьыс

¹ Господьлӧн киыс эз дженьдаммы, медым мездыны, Сылӧн пельыс эз сьӧктаммы, медым кывны.

² Но тіян лёк вӧчӧмъясныд торйӧдісны тіянӧс Енсьыныд, тіян мыжъясныд вӧсна Сійӧ бергӧдчис тіянысь да оз кывзы.

³ Тіян киясныд пежасьӧмаӧсь вирӧн, тіян чуньясныд – лёк вӧчӧмӧн. Тіян вомысь петӧ ылӧг, тіян кывныд пӧръясьӧ.

⁴ Некод оз мыжды веськыда, ёрд водзын некод оз висьтав збыльсӧ. Ставныс лача кутӧны абутӧмыс вылӧ, висьталӧны ылӧгсӧ. Найӧ новлӧдлӧны ас пытшканыс лёксӧ, чужтӧны лёк вӧчӧм.

⁵ Найӧ пӧжӧны змей колькъяс, кыӧны черань везъяс. Налысь колькъяссӧ кӧ сёян, кулан, а тувччан кӧ колькйыс вылӧ, сэтысь гадюка петас.

⁶ Асланыс везйысь найӧ оз вермыны вурны паськӧм, киӧн вӧчӧмторъясӧн оз вермыны вевттьыны вир-яйнысӧ. Найӧ вӧчӧны лёксӧ, налӧн киныс виӧ-дойдалӧ.

⁷ Налӧн кокныс котӧртӧ лёксӧ вӧчны, найӧ тэрмасьӧны мыжтӧмлысь вир кисьтны. Налӧн мӧвпъясыс шогмытӧмӧсь, найӧ мырддялӧны да виалӧны.

⁸ Найӧ оз тӧдны лӧньлунсӧ, вунӧдісны веськыда мыждӧмсӧ. Налӧн туйясыс чукляӧсь, сэті ветлысь оз тӧд лӧньлунсӧ.

⁹ Та вӧсна веськыда мыждӧмыс ылын миянысь, веськыдлуныс оз во миянӧдз. Ми виччысям югыдсӧ, но гӧгӧр пемыд, виччысям югдӧмсӧ, но ветлам пемыдас.

¹⁰ Синтӧм моз ми ветлам стен пӧлӧн, аддзытӧм моз ми ветлӧдлам кималасӧн, лунъюгыднас ми крукасьлам пемыдас моз, ловъяяс пӧвстын ми кулӧмаяс кодьӧсь.

¹¹ Ми ставным равзам ошъяс моз, курксам гулюяс моз. Ми виччысям веськыда мыждӧмсӧ, но сійӧ абу, виччысям мездмӧмсӧ, но сійӧ ылын миянысь.

¹² Ӧд ми Тэныд паныд уна лёк вӧчим, миян мыжъясным мыждӧны миянӧс, лёк вӧчӧмъясным век миянкӧд, ми тӧдам ассьыным мыжъяснымӧс.

¹³ Ми кыпӧдчим Господьлы паныд, пӧрйӧдлім Сійӧс, бергӧдчим асланым Енмысь, ми суклясим-асныралім, новлӧдлім сьӧлӧманым ылӧгсӧ да висьтавлім сійӧс.

¹⁴ Ми ылыстім веськыда мыждӧмсӧ, веськыдлуныс сулалӧ ылын, збыльыс крукасис изэрдйӧ, веськыда вӧчӧмыс оз су миянӧс.

¹⁵ Збыльыс эз ло. Лёксьыс ылыстчысьлысь эмбурсӧ мырддьӧны. Господь аддзис, мый веськыда мыждӧмыс абу, и тайӧ вӧлі зывӧк Сылы.

¹⁶ Сійӧ аддзис, мый абу мортыс, шензис, мый абу дорйысьыс. Сійӧ вермис Аслас киӧн, Сылӧн веськыдлуныс лои Сылы отсӧгӧн.

¹⁷ Кӧрт кышӧдӧн моз Сійӧ вевттьысис веськыдлуннас, пуктіс юр вылас мездмӧмыслысь юртупкӧдсӧ, пасьталіс Ас вылас водзӧс перъян паськӧмсӧ, вевттьысис скӧрлуннас кышанӧн моз.

¹⁸ Уджъясныс серти Сійӧ мынтысяс паныд кыпӧдчысьяслы, мынтысяс налы скӧрлунӧн, паныд сувтысьяслы – водзӧс перйӧмӧн, саридз дорын олысьяслы мынтысяс, кыдзи колӧ.

¹⁹ Рытыввылын пондасны повны Господьлӧн нимысь, асыввылын – Сылӧн дзирдлунысь. Вӧрӧг кӧ ыльӧбтас ю моз, Господьлӧн ловшыыс вӧтлас сійӧс.

²⁰ Сионӧ локтас Мездысь, Сійӧ локтас Яковсянь чужысьяс дінӧ, кодъяс бергӧдчисны мыжъяссьыныс, – висьталӧ Господь.

²¹ Тэкӧд, Менам войтырӧй, Ме кӧртала татшӧм йитӧд, – висьталӧ Господь, – Менам Лолӧй лоас тэ вылын, Менам кывъясӧй, мый пукті тэнад вомӧ, пыр лоӧны тэнад вомын, тэсянь чужысьяслӧн вомын да насянь чужысьяслӧн вомын ӧні и нэмъяс чӧж, – висьталӧ Господь.