Исай 53 - Коми Библия 2023

¹ Коді эскис миян висьталӧмӧ? Кодлы петкӧдчис Господьлӧн вына киыс?

² Веж петас моз Сійӧ быдмис Господь водзын, быдмис кос муысь чепӧсйӧм турун моз. Сылӧн эз вӧв мичлун ни тӧдчанлун, медым ми видзӧдім Сы вылӧ. Чужӧм-мыгӧрнас Сійӧ эз вӧв сэтшӧм морт, коді эськӧ кыскис миянӧс Ас дінас.

³ Йӧзыс Сійӧс увтыртісны-ӧтдортісны, Сійӧ нуис уна сьӧкыдлун да висьӧм, а ми бергӧдім Сыысь ассьыным чужӧмнымӧс. Сійӧс увтыртісны, и ми нинӧм туйӧ пуктім Сійӧс.

⁴ Сійӧ босьтіс Ас вылас миянлысь висьӧмнымӧс, нуис миянлысь дойяснымӧс. Ми чайтім, мый Енмыс дойдалӧ, нӧйтӧ да мыждӧ Сійӧс.

⁵ Но Сійӧс вӧлі бытшкӧма миян мыжъяс вӧсна, дойдалӧма миян лёк вӧчӧмъяс вӧсна. Сійӧ нуис мыждӧмсӧ, медым миян вӧлі лӧньлун. Сылӧн дойясӧн ми бурдім.

⁶ Ми ставным вӧлім вошӧм ыжъяс кодьӧсь, быдӧн кежим асланым туй вылӧ, но Господь пуктіс Сы вылӧ ставнымлысь мыжъяснымӧс.

⁷ Сійӧс нӧйтісны-дойдалісны, Сійӧ сьӧкыдсӧ нуис Ас кӧсйӧм сертиыс, воча эз шуась. Ыжӧс моз Сійӧс нуӧдісны начкыны, шырысь водзын чӧв олысь баля моз Сійӧ эз восьтлы Ассьыс вомсӧ.

⁸ Сійӧс кутісны, мыждісны, нуӧдісны, нетшыштісны ловъяяслӧн му вылысь, но некод эз шогсьы, мый лоӧ Сыкӧд. Менам войтырлӧн мыжъяс вӧсна Сійӧс нӧйтісны кувтӧдзыс.

⁹ Сылы дасьтісны дзебанін лёк вӧчысьяскӧд орччӧн, но Сійӧс гуалісны озырлӧн дзебанінӧ. Лёксӧ Сійӧ эз вӧчлы, Сійӧ некор эз пӧръясьлы.

¹⁰ Господьлӧн вӧлі шуӧма дойдны Сійӧс, мӧдӧдны Сылы сьӧкыдлунъяс. Но кор Сійӧ Асьсӧ ваяс мыж вештан вись пыдди, Сійӧ аддзас Сысянь чужысьясӧс, кодъяс кутасны дыр овны. Господьлӧн кӧсйӧмыс инас Сы пыр.

¹¹ Аслас уджыс вылӧ видзӧдігӧн Сійӧ кутас нимкодясьны. Менсьым кӧсйӧмӧс тӧдӧмӧн Менам веськыда олысь Кесйӧгӧй унаӧс вӧчас веськыдӧн, босьтас Ас вылас налысь мыжъяссӧ.

¹² Та вӧсна Ме сета Сылы пай ыджыдъяс пӧвстын, тышын шедӧдӧмасӧ Сійӧ пондас юкны вынаяскӧд, ӧд Сійӧ сетіс Асьсӧ кулӧм вылӧ, Сійӧс пуктісны лёк вӧчысьяс лыдӧ. Сійӧ босьтіс Ас вылас уна йӧзлысь мыжъяссӧ, кевмысис лёк вӧчысьяс вӧсна.