Исай 39 - Коми Библия 2023

Езекей петкӧдлӧ ассьыс озырлунсӧ Вавилонысь локтысьяслы

¹ Сійӧ кадас вавилонса Меродах-Валадан ӧксы, Валаданлӧн пиыс, тӧдмаліс Езекейлӧн висьмылӧм да бурдӧм йылысь. Та вӧсна сійӧ мӧдӧдіс Езекейлы гижӧд да козинъяс.

² Езекей нимкодясис локтысьяс вӧсна. Сійӧ петкӧдліс налы ассьыс озырлун видзанінъяссӧ да ставсӧ, мый сэні вӧлі: эзысь-зарни, чӧскыд ӧвтанторъяс да дона мавтасъяс. Нӧшта петкӧдліс шыпурт видзанінсӧ. Ӧксы керкаысь да аслас муысь Езекей петкӧдліс налы став озырлунсӧ.

³ Исай пророк локтіс Езекей ӧксы дінӧ да юаліс: «Мый висьталісны тайӧ йӧзыс? Кытысь найӧ волісны тэ дінӧ?» Езекей вочавидзис: «Найӧ волісны ылі муысь, Вавилонысь».

⁴ «Мый найӧ аддзылісны тэнад керкаысь?» – юаліс Исай. Езекей вочавидзис: «Найӧ аддзылісны ставсӧ. Ме петкӧдлі налы озырлун видзанінъясысь ставсӧ».

⁵ Сэки Исай шуис Езекейлы: «Кывзы Господь Саваофлысь кывсӧ.

⁶ Воасны лунъяс, кор тэнад керкаысь ставсӧ нуасны Вавилонӧ. Нуасны тшӧтш сійӧ, мый тэнад батьясыд чукӧртісны тайӧ лунӧдзыс. Нинӧм оз коль, – висьталӧ Господь. –

⁷ Тэсянь чужысьясӧс нуӧдасны вавилонса ӧксы керкаӧ, и налы ковмас кесъявны сэні евнукъясӧн».

⁸ Езекей мӧвпыштіс: «Сідзкӧ, менам олан кадӧ тані лоӧ лӧньлун да бур олӧм». Та вӧсна сійӧ шуис Исайлы: «Господьлӧн кывйыс, мый ӧні висьталін меным – бур».