Исай 33 - Коми Библия 2023

Сьӧкыд кадӧ кевмысьӧм

¹ Курыд шог тэныд, бырӧдысь, кодӧс эз на бырӧдны. Курыд шог тэныд, ылӧдчысь, кодӧс эз на ылӧдлыны. Кор тэ дугдан бырӧднытӧ, тэнӧ асьтӧ бырӧдасны. Кор тэ дугдан ылӧдчынытӧ, тэнӧ асьтӧ ылӧдласны.

² Господьӧй, ло бур сьӧлӧма миян дінӧ! Тэ вылӧ ми лача кутам. Водз асывсянь ло миянлы Дорйысьӧн, сьӧкыд кадӧ ло миянлы Мездысьӧн!

³ Тэнад гора гӧлӧс шыысь пышъясны войтыръяс. Кор Тэ кыпӧдчан, разаласны чужанкотыръяс.

⁴ Сійӧ, мый найӧ мырддялісны тыш дырйи, налысь йирасны лёльӧ моз, сы вылӧ уськӧдчасны саранча моз.

⁵ Господь медвылын, Сійӧ олӧ выліинын. Сион вылын Сійӧ зумыдмӧдас веськыда мыждӧм да веськыдлун.

⁶ Сійӧ лоӧ тэныд Дорйысьӧн, Сысянь лоӧ тэныд тырвыйӧ мездмӧм, мывкыдлун да тӧдӧмлун. Тэнад озырлуныд – Господьысь полӧм.

⁷ Со, вынаяс горзӧны ывлаын, лӧньлунсӧ юӧртысьяс курыда бӧрдӧны.

⁸ Туйяс кушмисны, ветлысь-мунысьыс абу. Сёрнитчӧм торкӧма, каръяс кисьтӧма, йӧзсӧ увтыртӧма.

⁹ Муыс шогсьӧ, косьмӧма, ливанса вӧр нюкыртчӧма, сьӧдасьӧма, Шарон ласта лои кушинӧн. Васан ыб вылын да Кармил керӧсъясын кушмӧмаӧсь пуяс.

Господь чеччас

¹⁰ Ӧні Ме чечча, – висьталӧ Господь, – ӧні Ме сувта да кыпӧдча.

¹¹ Ті нӧбасянныд кос турунӧн, чужтанныд идзас. Тіян ловшыныд би моз сотас асьнытӧ.

¹² Войтыръяс, тіянӧс лоӧ сотӧма, ті лоанныд кориз кодьӧсь, керыштӧм лежнӧгӧс моз тіянӧс лоӧ сотӧма биын.

¹³ Ыліын олысьяс, кывзӧй Менам уджъяс йылысь! Матіын олысьяс, тӧдмалӧй Менсьым вынӧс!

¹⁴ Сионын олысь мыжаяс полӧны, Ентӧг олысьяс тіралӧны. Найӧ шуалӧны: «Коді миян пӧвстысь вермас орччӧн овны ставсӧ сотысь бикӧд? Коді миян пӧвстысь вермас овны куслытӧм би пытшкын?»

¹⁵ Сійӧ, коді олӧ веськыда да висьталӧ збыльсӧ, коді оз кӧсйы озырмӧдчыны мукӧдсӧ дзескӧдӧмӧн, коді оз босьт козин, а мыждӧ веськыда, коді оз кӧсйы ӧтувтчыны вир кисьтысьяскӧд, коді мустӧмтӧ лёк вӧчысьяслысь уджъяссӧ.

¹⁶ Татшӧм мортыс пондас овны выліинын, сылӧн сайӧдчанінӧн лоӧ керӧсвывса изкар. Сылӧн няньыс пыр лоӧ, и ваыс сылӧн оз бырлы.

Господь – Ӧксыыс

¹⁷ Аслад синмӧн тэ аддзан Ӧксыӧс став сылӧн мичлуннас, тэ аддзан ылӧдз нюжӧдчӧм му.

¹⁸ Тэ казьтыштан бӧрӧ кольӧм полӧмсӧ да шуан: «Кӧні ӧні сійӧ, коді гижавліс вот мынтӧмнымӧс? Кӧні сійӧ, коді веситліс вот мынтан сьӧмнымӧс? Кӧні сійӧ, коді видзӧдаліс-лыддис башняяснымӧс?»

¹⁹ Водзӧ тэ он нин аддзы чорыд сьӧлӧма войтырӧс, кодлӧн сёрниыс нума-намакылӧм кодь, кодлӧн кывйыс тешкодь да гӧгӧрвотӧм.

²⁰ Видзӧдлы Сион кар вылӧ, миян гажӧдчанін вылӧ! Аслад синмӧн тэ аддзан Ерусалим, сійӧ – лӧнь оланін, вӧрзьывлытӧм дӧрачом. Сылӧн сюръяясыс сулалӧны зумыда, сылӧн гезъясыс оз орны.

²¹ Сэні Господь лоӧ миянлы визув ваӧн да паськыд юӧн. Сэті оз кут кывтны вӧрӧглӧн пыж, оз кут кывтны ыджыд корабль.

²² Господь – миян Мыждысьыс, Господь – миян Юралысьыс, Господь – миян Ӧксыыс, Сійӧ мездас миянӧс!

²³ Кор тэнад гезъясыд личаласны, оз нин вермыны кутны шолга да зэвтны тӧвдӧра, сэки кутан юклыны тышын шедӧдӧм ыджыд эмбуртӧ, весиг чотысьяс уськӧдчасны юклыны сійӧс.

²⁴ Сионын олысьяс пӧвстысь некод оз шу, ме пӧ вися, сэні олысь войтырлысь мыжъяссӧ лоӧ прӧститӧма.