Исай 11 - Коми Библия 2023

Давидсянь чужысьлӧн юраланін

¹ Ессей вужсянь чужас выль петас, сылӧн вужсянь быдмас вотӧса вож.

² Сы вылӧ лэччас Господьлӧн Лов, мывкыдлуныслӧн да гӧгӧрвоӧмлуныслӧн лов, туйдӧдӧмыслӧн да выныслӧн лов, тӧдӧмлуныслӧн да Господьысь полӧмыслӧн лов.

³ Сылӧн долыдлуныс – Господьысь полӧм. Сійӧ оз мыжды мортӧс ортсысяньыс, оз шу бӧръя кывсӧ йӧзлӧн сёрни серти.

⁴ Сійӧ веськыда мыждас коньӧръясӧс, гӧльясӧс доръяс збыльыс серти. Аслас чорыд кывнас сійӧ чирыштас мувывса олысьясӧс, аслас ловшынас виас лёк вӧчысьясӧс.

⁵ Сійӧ вӧнясяс веськыдлуннас, эсканлуныс лоӧ сылы вӧньӧн.

⁶ Сэки кӧин кутас ӧтвыв овны баляпикӧд, леопард кутас орччӧн куйлыны кӧзапикӧд. Кукань, лев да ӧшпи лоасны ӧтлаын, ичӧт зонка пондас видзны найӧс.

⁷ Мӧс пондас йирсьыны ошкӧд, кукань да ошпи пондасны орччӧн куйлыны, лев пондас ӧш моз сёйны идзас.

⁸ Ичӧт кага пондас ворсны змейлӧн горс дорын, сійӧ нюжӧдас кисӧ змейлӧн позйӧ, но лёкыс сылы оз ло.

⁹ Менам вежа керӧс вылын оз нин пондыны вӧчны лёксӧ. Кыдзи саридзыс тырӧма ваӧн, сідзи муыс лоӧ тырӧма Господьӧс тӧдӧмӧн.

¹⁰ Сійӧ лунӧ Ессейлӧн вужйыс лоӧ дӧрапасӧн войтыръяслы, найӧ шыасясны Ессейлӧн вужйыс дінӧ, и сылысь шойччанінсӧ вевттяс дзирдлун.

Господь бергӧдас Ассьыс коляс войтырсӧ

¹¹ Сійӧ лунӧ Господь бара нюжӧдас Ассьыс кисӧ да бергӧдас Ассьыс коляс войтырсӧ Ассурысь и Египетысь, Патросысь и Эфиопияысь, Эламысь и Сеннарысь, Хаматысь и саридздорса муясысь.

¹² Сійӧ лэптас дӧрапас войтыръяслы, чукӧртас нёльнан му пельӧссьыс Израильысь вӧтлӧмаясӧс, Иудаысь разалӧм войтырӧс.

¹³ Ефремлӧн вежалӧмыс кусас, Иудаӧс мустӧмтысьясӧс лоӧ бырӧдӧма. Ефрем оз кут вежавны Иудалы, Иуда оз кут мустӧмтны Ефремӧс.

¹⁴ Рытыввылын найӧ уськӧдчасны филистимсаяс вылӧ, асыввывса олысьяслысь куштасны озырлунсӧ. Эдом да Моав лоӧны налӧн кипод улынӧсь, аммон войтыр сетчас налы.

¹⁵ Господь косьтас Египетса саридзлысь куръясӧ, нюжӧдас юлань Ассьыс кисӧ да кыпӧдас ыджыд тӧвныр, Сійӧ юкас юсӧ сизим шор вылӧ, и йӧзыс сэті подӧн вуджасны.

¹⁶ Сэні лоӧ Ассурысь петан паськыд туй Господьлӧн коляс войтырлы, кыдзи вӧлі Израиль войтырлы Египетысь петігӧн.