Исай 10 - Коми Библия 2023

Курыд шог чорыд индӧд лӧсьӧдысьяслы

¹ Курыд шог налы, кодъяс лӧсьӧдӧны лёк индӧдъяс, гижӧны чорыд тшӧктӧмъяс,

² медым гӧльясӧс эз мыждыны веськыда, медым Менам войтыр пӧвстысь коньӧръяслы эз вӧчны веськыда, медым мырддьыны дӧваяслысь эмбурсӧ, медым куштыны батьтӧм-мамтӧмъясӧс.

³ Мый ті кутанныд вӧчны мыждан лунӧ, кор бырӧдӧмыс ыджыд тӧвныр моз ылісянь суӧдас тіянӧс? Код дінӧ ті котӧртанныд отсӧгла? Кытчӧ дзебанныд ассьыныд озырлунтӧ?

⁴ Пленӧ босьтӧмаяс пӧвстын ті сувтанныд пидзӧс выланыд, кулӧмаяс моз усянныд. Но тайӧн Господьлӧн скӧралӧмыс эз на помась, Сылӧн киыс пыр на нюжӧдӧма, медым мыждыны.

Ассурӧс суас мыждӧм

⁵ Курыд шог Ассурлы, Менам скӧралан бедьлы. Сы киын орсыс – Менам лӧглунӧй.

⁶ Ме веськӧда сійӧс тайӧ мыжа войтырыслы паныд, кодъяс вылӧ кыптӧ Менам скӧрлунӧй. Ме тшӧкта сылы куштыны да мырддявны налысь эмбурсӧ, талявны найӧс ывлавывса няйтӧс моз.

⁷ Но ачыс сійӧ оз тадзи мӧвпав, сійӧ нӧшта на унджык кӧсйӧ вӧчны, мӧвпалӧ пазӧдны-бырӧдны войтыръясӧс.

⁸ Сійӧ шуӧ: «Став менам веськӧдлысыс – ӧксыяс!

⁹ Калне усис Каркемис моз, Хамат – Арпад моз, Самария – Дамаск моз.

¹⁰ Менам кипод улӧ шедісны муяс, кӧні олысьясыс копрасисны идолъяслы. Сэні бӧлбаныс вӧлі ёна унджык Ерусалимын да Самарияын дорысь.

¹¹ Ме вӧча Ерусалимлы да сылӧн идолъяслы сійӧ жӧ, мый вӧчи Самариялы да сылӧн идолъяслы».

¹² Кор Господь помӧдз вайӧдас Ассьыс уджсӧ Сион керӧс вылын да Ерусалимын, Сійӧ мынтысяс ассурса ӧксылы сылӧн вылӧ кыпӧдчӧмысь да ышнясьӧмысь.

¹³ Ӧд ассурса ӧксы шуис: «Ме сюсь мывкыда морт, ставсӧ тайӧс вӧчи аслам вынӧн да сюсь вежӧрӧн. Ме бырӧді войтыръяслысь мувежтасъяссӧ, кушті налысь озырлунсӧ, вына морт моз шыбиті юралан пуклӧсысь налысь юралысьяссӧ.

¹⁴ Ме озырмӧдчи войтыръяслӧн озырлунӧн, быттьӧ лэбач поз пазӧді. Кыдзи эновтӧм позйысь чукӧртӧны лэбачлысь колькъяссӧ, тадзи ме курышті аслам кипод улӧ ставнас мусӧ. Весиг борднас некод эз шеныштлы, вомсӧ эз восьтлы да эз чипӧстлы».

¹⁵ Чер ӧмӧй ошйысьӧ чернас керасьысь водзын? Пила ӧмӧй ошйысьӧ пилитчысь водзын? Бедь ӧмӧй шенасьӧ мортӧн, коді сійӧс киас кутӧ? Бедь ӧмӧй лэптӧ мортӧс, кодӧс абу пуысь вӧчӧма?

¹⁶ Та вӧсна Ыджыдыс, Господь Саваоф, жебмӧдас ӧксылысь вынйӧра йӧзсӧ да бипурын моз сотас сылысь нималӧмсӧ.

¹⁷ Сійӧ Ачыс, Израильлӧн Югыдыс, лоӧ биӧн, Израильлӧн вежа Енмыс лоӧ ыпъялысь биӧн, Сійӧ сотас йӧнсӧ да ёг турунсӧ, ӧти лунӧн бырӧдас Ассурӧс.

¹⁸ Ассурлысь медбур вӧръяссӧ да сад йӧръяссӧ лоӧ бырӧдӧма, сэні нинӧм ловъяыс оз коль, Ассур лоӧ кулӧм морт кодь.

¹⁹ Сэні зэв этша кольӧ пуыс, весиг кага вермас найӧс лыддьынысӧ.

Израильлӧн коляс войтырыс бергӧдчас Ен дінӧ

²⁰ Сійӧ лунӧ Израильлӧн коляс войтырыс, Яковсянь чужысьясысь ловйӧн кольӧмаяс, оз нин пондыны лача кутны найӧс дзескӧдысь вылӧ, но став сьӧлӧмсянь пондасны лача кутны Господь вылӧ, Израильлӧн вежа Ен вылӧ.

²¹ Коляс войтырыс бӧр бергӧдчас, Яковсянь чужысьясысь ловйӧн кольӧмаяс бӧр бергӧдчасны вына Ен дінӧ.

²² Израиль, тэнад войтырыдлӧн лыдыс кӧ лоӧ весиг саридздор лыа мында, бергӧдчас сӧмын колясыс. Бырӧдӧмыс лоӧ веськыдлун серти, сійӧ ыльӧбтас ойдӧм ва моз.

²³ Ыджыдыс, Господь Саваоф, вӧчас Аслас шуӧмыс серти – бырӧдӧмыс лоас став му пасьтала.

²⁴ Та вӧсна Ыджыдыс, Господь Саваоф, тадзи висьталӧ: Менам войтырӧй, Сионын олысьяс, энӧ полӧй Ассурысь! Сійӧ нӧйтӧ тіянӧс беддьӧн, Египет моз кыпӧдӧ тіян вылӧ ассьыс орссӧ.

²⁵ Но регыд нин, вывті регыд Менам лӧглунӧй тіян вылӧ кусас. Менам скӧрлунӧй бергӧдчас Ассур вылӧ, медым бырӧдны сійӧс.

²⁶ Господь Саваоф кыпӧдас сы вылӧ Ассьыс орссӧ, кыдзи вӧчис мадиансаяскӧд, кор пасьвартіс найӧс Орив изкырта дорын. Сійӧ нюжӧдас Ассьыс бедьсӧ саридзлань, кыдзи нюжӧдіс сійӧс египетсаяслань.

²⁷ Сійӧ лунӧ тіян пельпом вылысь усяс Ассурлӧн сьӧкыд нопйыс, тіян сьылі вылысь жугалас сылӧн сийӧсыс.

Ассурса тышкайӧз матыстчӧны Ерусалим дорӧ

²⁸ Ассурса тышкайӧз локтісны Айят кар пыр, мунісны Мигрон кар бокиті, Микмасын найӧ колисны ассьыныс эмбурнысӧ.

²⁹ Найӧ мунісны керӧс потасӧд да узьмӧдчисны Геваӧ. Рама кар дзӧрис полӧмысла, Сауллӧн Гива карын олысьяс пышйисны.

³⁰ Галлим кар, горзы гораджыка! Лаис кар мед кылас тэнсьыд горзӧмтӧ, Анатот кар мед локтас тэныд отсӧг вылӧ!

³¹ Мадменаын олысьяс пышйисны, Гевимын олысьяс разӧдчисны.

³² Ассурса тышкайӧз талун нин воӧдчасны Нов кар дорӧ, кинысӧ кыпӧдӧмӧн найӧ пондасны ыршасьны Сион керӧслы паныд, ерусалимса вывтасінлы паныд.

³³ Ӧні Ыджыдыс, Господь Саваоф, ыджыд вынӧн нетшкӧ пу вожъяс. Ыджыд пуяссӧ лоӧ кералӧма, джуджыд пуяс усясны.

³⁴ Сук вӧрсӧ Сійӧ кералас черӧн, Ставсӧвермысь пӧрӧдас ливанса пуяс.