Иов 40 - Коми Библия 2023

Господь мӧдысь шыасьӧ Иов дінӧ

¹ Господь бара шыасис Иов дінӧ бушков пытшсянь:

² – Вӧнясь тышкаморт моз! Ме кута юасьны, а тэ Меным вочавидз.

³ Тэ шуан, мый Ме ог веськыда мыжды, мыжалан Менӧ, мед дорйыны асьтӧ.

⁴ Тэнад ӧмӧй Енлӧн кодь выныд, тэ ӧмӧй верман Сы моз гымыштны?

⁵ Вевттьы асьтӧ ӧксылӧн кодь дзирдлунӧн, пасьтӧд асьтӧ ыджыдалан вынӧн,

⁶ кисьт ассьыд ыпъялан скӧрлунтӧ, нюкырт вылӧ кыпӧдчысьясӧс,

⁷ раммӧд ышнясьысьясӧс, лямӧд лёк вӧчысьясӧс асланыс сулаланінын,

⁸ ставнысӧ найӧс тырт мунас, чужӧмнысӧ вевттьы сап пемыднас,

⁹ сэки Ме ошка тэнӧ, ӧд тэ верман мездыны ачыд асьтӧ.

¹⁰ Видзӧдлы бегемот вылӧ – и сійӧс, и тэнӧ Ме вӧчи. Сійӧ ӧш моз сёйӧ турун,

¹¹ сылӧн лядьвейыс ён, кынӧм яйчигыс чорыдсьыс-чорыд.

¹² Сійӧ ӧвтчӧ сус пу кодь чорыд бӧжнас, лядьвей сӧнъясыс кыӧм гез кодьӧсь,

¹³ лыяссӧ быттьӧ ыргӧнысь вӧчӧма, сюрса лысӧ – кӧртысь.

¹⁴ Енмыслӧн став вӧчӧмторсьыс сійӧ медвына, сӧмын Вӧчысьыс вермӧ лэптыны сы вылӧ шыпуртсӧ.

¹⁵ Керӧсъяс вердӧны сійӧс, вӧлявывса пемӧсъяс котралӧны сыкӧд орччӧн.

¹⁶ Сійӧ шойччӧ пашкыр пу улын, куйлӧ вадйын эжӧр пӧвстын.

¹⁷ Пашкыр пуяс сайӧдӧны сійӧс вуджӧрнаныс, юдорса бадьяс кытшалӧны сійӧс.

¹⁸ Бузгысь юысь сійӧ оз пов, сійӧ лӧнь, весиг кӧ Йӧрдан юын ваыс ныр-вомӧдзыс.

¹⁹ Коді вермас кутны сійӧс синмас видзӧдӧмӧн, крукыштны нырӧдыс багырӧн.

²⁰ Верман-ӧ тэ вугырӧн кыйны левиафанӧс, гезйӧн кыскыны сійӧс кывйӧдыс?

²¹ Пысалан-ӧ тэ эжӧрысь кыӧм кӧв сылӧн ныр розьӧ, писькӧдан-ӧ ёсь беддьӧн сылысь черлысӧ?

²² Пондас-ӧ сійӧ кевмӧмӧн корны тэнӧ, сёрнитны тэкӧд небыда?

²³ Кӧрталас-ӧ сійӧ тэкӧд йитӧд, босьтан-ӧ тэ сійӧс кесйӧгӧ пыр кежлӧ?

²⁴ Пондан-ӧ ворсӧдчыны сыкӧд лэбачкӧд моз, сетан-ӧ нывъясыдлы кӧв йылысь новлӧдлыны сійӧс?

²⁵ Пондасны-ӧ вузасьны сыӧн чери кыйысьяс, юкласны-ӧ сылысь яйсӧ ас костаныс ханаанса вузасьысьяс?

²⁶ Верман-ӧ розьӧдны сылысь кучиксӧ ёсь шыӧн, писькӧдны сылысь юрсӧ пыридзӧн?

²⁷ Лэптан кӧ китӧ сы вылӧ, сыкӧд вермасьӧмтӧ некор он вунӧд, и мӧдысь он нин вӧч тадзи.