Иов 38 - Коми Библия 2023

Господь шыасьӧ Иов дінӧ

¹ [Кор Элиху помаліс сёрнисӧ,] Господь шыасис Иов дінӧ бушков пытшсянь:

² – Коді тэ сэтшӧмыс, мый Менсьым мывкыдлунӧс аслад вежӧртӧм сёрниӧн вевттян?

³ Вӧнясь тышкаморт моз! Ме кута юасьны, а тэ Меным вочавидз.

⁴ Кӧні тэ вӧлін, кор Ме пукті муыслы подувсӧ? Висьтав, тӧдан кӧ.

⁵ Тӧдан-ӧ, коді индіс муыслы мурталан пассӧ? Коді муӧд нюжӧдіс мурталан кӧвсӧ?

⁶ Муыслӧн подулыс мый вылӧ мыджсьӧ? Коді пуктіс сылысь пельӧс изсӧ,

⁷ кор асъя кодзувъяс нимкодясисны, кор Енлӧн пияныс долыда горзісны?

⁸ Коді тупкис саридзлысь дзиръяяссӧ, кор ваыс му пытшсьыс ыльӧбтіс?

⁹ Ме пасьтӧді саридзсӧ кымӧръясӧн, гартышті сійӧс пемыднас,

¹⁰ потшӧсалі сійӧс, сувтӧді дзиръяяс да пукті иган-тасъяс,

¹¹ шуи сылы: «Татчӧдз паськӧдчан, водзӧсӧ он вудж, тані помасяс тэнад гыяслӧн вывтіасьӧмыс».

¹² Тэ ӧмӧй тшӧктін асылыслы югдыны, асъя кыалы индін, кӧні петны,

¹³ медым сійӧ босьтіс мусӧ помъясӧдыс да пыркнитіс сы вылысь став лёк вӧчысьсӧ,

¹⁴ уна рӧма паськӧмӧн пасьтӧдіс мусӧ, сёй вылӧ моз вӧчис выль серпас,

¹⁵ лёк вӧчысьяслысь югыдсӧ босьтіс, налысь ыршасян кияссӧ чегъяліс?

¹⁶ Лэччылін-ӧ тэ саридз пыдӧсӧдз, ветлӧдлін-ӧ тэ сылӧн пыдӧстӧминӧд?

¹⁷ Воссьыліс-ӧ тэ водзын кулӧмыслӧн ӧдзӧсыс, аддзылін-ӧ тэ сап пемыдас пыранінсӧ?

¹⁸ Тэ ӧмӧй тӧдан муыслысь пасьтасӧ? Тӧдан кӧ ставсӧ тайӧс, висьтав.

¹⁹ Кӧні туйыс югыдыслӧн оланінӧ? Кӧні олӧ пемыдыс?

²⁰ Тэ ӧмӧй пемыдсӧ бӧр нуӧдан оланінас, тэ ӧмӧй тӧдан туйсӧ сылӧн керка дінӧ?

²¹ Дерт, тэ тӧдан. Тэ, буракӧ, чужӧмыд югыдсьыс да пемыдсьыс водзджык, тэнад олан лунъяслӧн лыдыс вывті уна.

²² Пыралін-ӧ тэ лым видзанінъясӧ, аддзылін-ӧ тэ шерлысь йӧртӧдъяссӧ?

²³ Ме видза найӧс сьӧкыд кад кежлӧ, тышӧ петан лун кежлӧ.

²⁴ Кутшӧм туйвизьясӧд югыдыс паськалӧ, кыті кытшлалӧ му вылын асыв тӧв?

²⁵ Коді писькӧдӧ зэрлы туйсӧ, восьтӧ гымньӧвлы ордымсӧ,

²⁶ медым киськавны эновтӧм му, овтӧмин, кӧні морт оз тыдав,

²⁷ медым юктавны кушин, быдтыны сэні веж турун?

²⁸ Эм-ӧ зэрлӧн батьыс? Коді чужтӧ лысва войтсӧ?

²⁹ Кодлӧн кынӧмысь петӧ йи? Коді чужтӧ енэжвыв гыӧр,

³⁰ медым ваыс лои из кодь чорыд, медым пыдӧстӧм йирлӧн веркӧсыс йизис?

³¹ Верман-ӧ тэ гӧрддзавны Корӧся кодзув чукӧр, разьны Куима кодзув чукӧрлысь вӧньсӧ?

³² Верман-ӧ быд кодзув чукӧр петкӧдны ас кадӧ, нуӧдны Сизима кодзулӧс челядьыскӧд?

³³ Тэ ӧмӧй тӧдан енэжлысь индӧдъяссӧ, тэ-ӧ индан, кыдзи енэжыслы ыджыдавны му вылын?

³⁴ Верман-ӧ тэ горӧдны кымӧръяслы, медым найӧ ыльӧбтасны тэ вылӧ сувтса зэр?

³⁵ Верман-ӧ лыйны гымньӧвйӧн, шуас-ӧ сійӧ тэныд, ме пӧ дась лыйны?

³⁶ Коді петуклы сетіс гӧгӧрвоӧмлунсӧ, ибислы – мывкыдлунсӧ?

³⁷ Коді аслас мывкыдлунӧн вермас артавны кымӧръяс? Коді доровтас енэжвывса ва дозъяс,

³⁸ кор муыс чорзьӧма, ёкмыльтчӧма тшалакӧ?

³⁹ Тэ ӧмӧй кыян левлы кыйдӧссӧ, тэ ӧмӧй вердан левлысь пиянсӧ,

⁴⁰ кор найӧ куйлӧны асланыс сайӧдчанінын, кыйӧдчӧны турун пӧвстын?

⁴¹ Тэ ӧмӧй сёян дасьтан кырнышлы, кор сылӧн пияныс горзӧны Енмыслы, тшыг кынӧмӧн котралӧны?