Иов 20 - Коми Библия 2023

Софар мӧдысь шыасьӧ Иов дінӧ

¹ Наамаса Софар воча шуис:

² – Мӧвпъясӧй вӧзйысьӧны ортсӧ петны, сёрнитӧмысь кутчысьны ог вермы.

³ Ме кылі менӧ янӧдана вомалӧм, но сюсь вежӧрӧй вочавидзас тэныд.

⁴ Тэ ӧмӧй он тӧд, мый водзысяньыс – мортӧс вӧчӧмсяньыс –

⁵ лёк вӧчысьлӧн гажӧдчӧмыс дженьыд, Ентӧг олысьлӧн нимкодясьӧмыс здук мында?

⁶ Весиг кӧ сійӧ быдмас енэжӧдз, юрнас люкасяс кымӧръясӧ,

⁷ аслас сіт-куйӧд моз сійӧ бырас пыр кежлӧ, сійӧс тӧдлысьяс пондасны юасьны, кӧні сійӧ.

⁸ Вӧт моз сійӧ лэбыштас-вошас, и сійӧс оз нин аддзыны, войся петкӧдчылӧм моз сійӧ бырас.

⁹ Сійӧ некодлы нин оз усь син улас, сылӧн оланіныс оз нин аддзыв сійӧс.

¹⁰ Гусявлӧмторсӧ сылы ковмас бӧр сетны аслас киӧн, пияныслы ковмас корны гӧльяслысь.

¹¹ Выныс, мыйӧн тырӧма сылӧн том лыясыс, водас сыкӧд гуӧ.

¹² Лёкыс Ентӧг олысьлы юмовтор кодь, пуктӧма сійӧс кыв улас,

¹³ нёнялӧ, оз сьӧлышт, кутӧ сійӧс вомас.

¹⁴ Но кынӧм пытшкас юмыс вошас, гырк пытшкас змей ядӧ пӧрас.

¹⁵ Озырлуныс, мый сійӧ ньылыштіс, воснас петас, Енмыс перъяс сійӧс кынӧм пытшсьыс.

¹⁶ Сійӧ чурскӧ змей яд, змейлӧн чушкысь кывйыс виас сійӧс.

¹⁷ Сійӧ оз нин аддзыв визув шоръяс, маа да йӧла юяс.

¹⁸ Чукӧртӧм озырлунсӧ бӧр ковмас сетны, нажӧвитӧм удждоныс оз вай сылы нимкодьлун.

¹⁹ Ӧд сійӧ гӧльясӧс дзескӧдліс да ӧтдортліс, мырддявліс керкаяс, мый эз лэптывлы.

²⁰ Сійӧ некор оз пӧтлы, озырмӧдчӧмнас оз мезды асьсӧ.

²¹ Сылӧн пӧтлытӧмлуныс ньылыштіс ставсӧ, та вӧсна сылӧн шудыс киссяс.

²² Озырлун дырйиыс сылы дзескыд лоӧ, дзескӧдӧмаяс кинысӧ лэптасны сы вылӧ.

²³ Кор сійӧ дзикӧдз пӧтас, Енмыс ыстас сы вылӧ Ассьыс ыпъялан скӧрлунсӧ, зэр моз кисьтас сы вылӧ ярлунсӧ.

²⁴ Сійӧ пышъяс кӧрт шыпуртысь, но сыӧ ыргӧн йыла ньӧв сатшас,

²⁵ поткӧдас сылысь сӧпсӧ, ньӧвсӧ перйигӧн курыд сӧптыс петас, и сійӧс полӧм-тіралӧм босьтас,

²⁶ пемыдыс шымыртас сійӧс, сійӧс ньылыштас би, мый абу мортӧн пестӧма, лёкыс суас сылӧн чомйын ловйӧн кольӧмаясӧс.

²⁷ Енэжыс восьтас сылысь мыжсӧ, муыс кыпӧдчас сылы паныд.

²⁸ Аслас керкаӧ чукӧртӧм озырлуныс бырас-вошас, Енлӧн скӧралан лунӧ ставыс кылалас ва вывті моз.

²⁹ Татшӧмтор вичмас лёк вӧчысьлы Енсянь, тадзи шуӧма лоны сылы Енмыс!