Иов 12 - Коми Библия 2023

Иов вочавидзӧ Софарлы

¹ Иов воча шуис:

² – Збыльысь тай, сӧмын ті йӧзыс, и тіянкӧд тшӧтш мывкыдлуныс кулас!

³ Но менам тшӧтш эм вежӧр, ме дзик жӧ тіян кодь. Коді нӧ оз тӧд тайӧс?

⁴ Но серамтуйын аслам ёртъяслы ме лои – ме, коді шыасьлі Енмыс дінӧ, и кодлы Сійӧ вочавидзліс. Менӧ, мыжтӧмӧс да веськыда олысьӧс, серамтуйӧ пуктӧны.

⁵ Сійӧ, кодлӧн ставыс бур, увтыртӧ шогсьысьӧс, йӧткыштӧ мортӧс, коді крукасьлӧ.

⁶ Эмбур мырддялысьяслысь керкаяссӧ некод оз вӧрзьӧд, Енсӧ дӧзмӧдысьяс олӧны повтӧг, енмӧн лыддьӧны ассьыныс вынсӧ.

⁷ Юав пемӧсъяслысь – найӧ тэнӧ велӧдасны, юав енэжвыв лэбачьяслысь – найӧ тэныд юӧртасны.

⁸ Сёрнит муыскӧд – сійӧ тэныд гӧгӧрвоӧдас, весиг саридзса черияс тэныд вочавидзасны.

⁹ Коді на пиысь оз тӧд, мый ставсӧ вӧчӧма Господь,

¹⁰ кодлӧн киын став ловъя олысьлӧн олӧмыс, тшӧтш мортлӧн лолыс.

¹¹ Оз ӧмӧй пельыд торйӧд кылӧм кывсӧ, оз ӧмӧй вомыд тӧдмав сёянлысь кӧрсӧ?

¹² Пӧрысьяслӧн эм мывкыдлун, дыр олысьяслӧн – сюсь вежӧр.

¹³ Енлӧн эм мывкыдлуныс да выныс, эм тӧдӧмлуныс да вежӧрыс.

¹⁴ Сійӧ кӧ жугӧдас, выльысь он лэпты, пуксьӧдас кӧ мортсӧ иган сайӧ, сэтысь сійӧ оз пет.

¹⁵ Дугӧдас кӧ зэрсӧ – ставыс косьмас, пондас кӧ дугдывтӧг кисьтны – муыс ойдас.

¹⁶ Сылӧн эм выныс да вежӧрыс, Сылӧн кипод улын – ылӧдлысь и ылӧгас шедысь.

¹⁷ Ӧксыӧс туйдӧдысьясӧс Сійӧ вӧтлӧ кӧмтӧгныс, ёрдысьясӧс бӧбъясӧн вӧчӧ.

¹⁸ Ӧксы кипод улысь лэдзӧ кӧрталӧмаясӧс, а ӧксылы коскас кӧрталӧ кесйӧглысь вӧньсӧ.

¹⁹ Попъясӧс Сійӧ вӧтлӧ кӧмтӧгныс, юралысьясӧс чӧвтӧ,

²⁰ пыдди пуктана йӧзлысь вомсӧ тупкӧ, юрнуӧдысьяслысь вежӧрсӧ босьтӧ,

²¹ нималысьясӧс янӧдӧ, вынаясӧс жебмӧдӧ.

²² Сійӧ восьтӧ джуджыд пемыд гуяс, сап пемыдсӧ югыдӧ петкӧдӧ.

²³ Сійӧ рӧдмӧдӧ и бырӧдӧ войтыръясӧс, сетӧ паськӧдчыны и мутӧг кольӧ.

²⁴ Войтыръяслӧн юралысьяслысь вежӧрсӧ босьтӧ, кольӧ найӧс шӧйтны овтӧминын, кӧні туйыс абу.

²⁵ Битӧг найӧ кималасӧн ветлӧны пемыдас, шатлалӧны код юраяс моз.