Иона 4 - Коми Библия 2023

Иона скӧрмӧ

¹ Иона шогӧ усис таысь да ёна скӧрмис.

² Сійӧ кевмысьӧмӧн норасис Господьлы: «Господьӧй, кор ме вӧлі на аслам муын, ме тӧді нин, мый тадзи лоас. Ме та понда и пышйи Фарсисӧ. Ме тӧді, мый Тэ бур да мелі сьӧлӧма Ен, Тэнад терпитӧмыд ыджыд, Тэнад буралӧмлы абу помыс. Тэ дась бӧр босьтны Ассьыд мыждана шуӧмтӧ.

³ Та вӧсна, Господьӧй, босьт менсьым лолӧс – бурджык меным кувны олӧм дорысь».

⁴ Господь юаліс: «Тайӧ ӧмӧй тэнӧ сэтшӧма скӧрмӧдіс?»

⁵ Иона петіс карысь да кольччис кар асывладорӧ. Сэні вӧчис аслыс лэбувтор да пуксис вуджӧр улӧ. Виччысис, мый лоӧ карыскӧд.

⁶ Сэки Господь Ен быдтіс ыджыд коръя быдмӧг, медым вуджӧрнас сайӧдны Ионаӧс да лӧньӧдны сійӧс дӧзмӧмсьыс. Иона ёна нимкодясис быдмӧглы.

⁷ Мӧд луннас кыа петігӧн Ен ыстіс вегыльӧс. Вегыль кутіс сёйны быдмӧгсӧ, и сійӧ косьмис.

⁸ А кор петіс шонді, Ен ыстіс чизыр асыв тӧв. Шонді пӧжис Ионалысь юрсӧ. Сійӧ дзикӧдз лёшмуніс да виччысис кулӧм. Иона шуаліс: «Бурджык меным кувны олӧм дорысь».

⁹ Ен юаліс Ионалысь: «Быдмӧгыс понда ӧмӧй татшӧма скӧрмин?» Мӧдыс вочавидзис: «Да. Весиг овнысӧ ог кӧсйы».

¹⁰ Сэки Господь шуис: «Тэ шогсян быдмӧг вӧсна, кодӧс тэ эн быдты, эн дӧзьӧрит. Сійӧ быдмис ӧти войӧн, и ӧти войӧн косьмис.

¹¹ Менам сьӧлӧмӧй тшӧтш шогсьӧ Ниневия вӧсна, тайӧ ыджыд карыс вӧсна. Сэні сё кызь сюрсысь унджык олысь, кодъяс оз кужны торйӧдны шуйга кинысӧ веськыдсьыныс. Нӧшта сэні уна пемӧс на эм».