Йоиль 1 - Коми Библия 2023

¹ Петуэллӧн Йоиль пилы вӧлі Господьсянь кыв.

Бырӧдӧм кӧдзас вӧсна бӧрдӧм

² – Кывзӧй, юрнуӧдысьяс, кывзӧй, тайӧ муас олысьяс! Вӧлі-ӧ татшӧмторйыс тіян олан лунъясӧ либӧ батьясныдлӧн олігӧн?

³ Висьтавлӧй та йылысь асланыд ныв-пилы, тіян ныв-пиныд мед висьталасны асланыс ныв-пилы, а найӧ мед юӧртасны водзӧ чужысьяслы.

⁴ Лёльӧяс бӧрся коляссӧ сёйис саранча, саранча бӧрся сёйисны чиркъяс, чиркъяс бӧрся сёйисны гагъяс.

⁵ Садьмӧй, кодалысьяс, ырзӧмӧн бӧрдӧй, сыркъялӧмӧн бӧрдӧй, вина юысьяс, ӧд босьтӧма тіян вомдорысь винанытӧ.

⁶ Менам му вылӧ уськӧдчис вына войтыр, лыдтӧм-тшӧттӧм войтыр. Сылӧн пиньясыс ай левлӧн кодьӧсь, черлыыс энь левлӧн кодь.

⁷ Сійӧ бырӧдіс Менсьым виноград пуӧс, йирис Менсьым инжир пуӧс, сылысь кырсьсӧ чашйис да шыбитіс, колины сӧмын кульӧм вожъяс.

⁸ Пасьталӧй шогалан паськӧм, бӧрдӧй верӧспусӧ воштӧм том ныв моз.

⁹ Господьлӧн крамӧ оз нин вайны нянь вись ни вина вись. Попъяс – Господьлӧн кесъялысьяс – ыджыд шогынӧсь.

¹⁰ Видз-муяс кушмисны, муыс бӧрдӧ, ӧд воӧм няньсӧ бырӧдӧма, виноград косьмӧма, олив пуяс нярмӧмаӧсь.

¹¹ Шогсьӧй, нянь быдтысьяс, бӧрдӧй, виноград йӧрын уджалысьяс. Шобді да ид нянь кулӧма,

¹² виноград косьмӧма, инжир нярмунӧма, гранат, финик да яблӧг пуяс нюкыртчӧмаӧсь – став пуыс косьмӧма. Йӧзыс воштісны гажлунсӧ.

¹³ Попъяс, пасьталӧй шогалан паськӧм да бӧрдӧй, ырзӧмӧн бӧрдӧй, висьпуктанін дорын кесъялысьяс! Пырӧй крамӧ, менам Енлы кесъялысьяс, весиг войнас энӧ пӧрччӧй шогалан паськӧмнытӧ, ӧд тіян Енлӧн крамӧ оз нин вайны нянь вись да вина вись.

¹⁴ Урчитӧй вежа видзалан лунъяс, юӧртӧй ыджыд чукӧртчӧм йылысь. Коралӧй юрнуӧдысьясӧс да став войтырсӧ Господьлӧн, асланыд Енлӧн, крамӧ, сэні шыасьӧй Господь дінӧ.

¹⁵ Повзьӧдана лун миянӧс виччысьӧ, Господьлӧн луныс матын, Ставсӧвермысьсянь сійӧ локтас, медым бырӧдны.

¹⁶ Син водзаным бырис сёянным, Енлӧн крамын ланьтіс нимкодясьӧм-гажӧдчӧм.

¹⁷ Кӧдзӧм кӧйдыс сісьмис муас, жытникъяс кушмисны, нянь йӧртӧдъяс киссисны, ӧд няньыс эз ло.

¹⁸ Пемӧсъяс ружтӧны, мӧсъяс шӧйтӧны, абутӧм турунсӧ корсьӧны, весиг ыж чукӧръясӧс суис бырӧдӧмыс.

¹⁹ Тэ дінӧ, Господьӧй, ме шыася! Веж туруныс сотчис миян видзьяс вылын, став пуяссӧ биыс чишкаліс.

²⁰ Весиг вӧлявывса пемӧсъяс Тэсянь отсӧг виччысьӧны, ӧд юяс косьмисны, йирсянінъяс би улӧ веськалісны.