Иоан 9 - Коми Библия 2023

Исус бурдӧдӧ чужӧмсяньыс синтӧмӧс

¹ Мунігмозыс Исус аддзис чужӧмсяньыс синтӧм мортӧс.

² Велӧдчысьяс юалісны Исуслысь: «Велӧдысь, кодлӧн мыж вӧсна сійӧ синтӧмӧн чужӧма? Ачыс-ӧ сійӧ мыжа али бать-мамыс?»

³ Исус вочавидзис: «Сійӧ абу мыжа, бать-мамыс тшӧтш абу мыжаӧсь. Сійӧ синтӧм, медым сы пыр тыдовтчасны Енлӧн уджъясыс.

⁴ Ӧні, лунъюгыднас, Меным колӧ вӧчны Менӧ Мӧдӧдысьлысь уджъяссӧ. Пуксяс вой, сэки некод оз вермы уджавны.

⁵ Му вылын олігӧн Ме йӧзыслы югыдыс».

⁶ Тайӧс шуӧм бӧрын Исус сьӧлыштіс муас, сьӧлыштӧмсьыс вӧчис ляти да синтӧм мортлысь синсӧ мавтіс лятинас.

⁷ Сэсся шуис: «Мун да мыссьы Силоам вайӧртӧдын». Силоам нимыс, вуджӧдны кӧ, лоӧ ”мӧдӧдӧма”. Синтӧм морт муніс, мыссис да кутіс аддзыны.

⁸ Сыкӧд орччӧн олысьяс да сійӧс синтӧмӧн аддзылысьяс шензисны: «Абу-ӧ тайӧ сійӧ мортыс, коді пукаліс да сьӧм корис?»

⁹ Ӧтияс шуалісны: «Тайӧ дзик сійӧ мортыс», мӧдъяс шуалісны: «Абу, тайӧ сӧмын сы вылӧ мунӧ». Но сійӧ ачыс висьталіс: «Тайӧ ме».

¹⁰ Сэки юалісны сылысь: «Кыдзи нӧ тэ аддзыны кутін?»

¹¹ Сійӧ вочавидзис: «Исус нима морт вӧчис ляти, мавтіс сыӧн менсьым синмӧс да шуис: ”Мун да мыссьы Силоам вайӧртӧдын”. Ме муні да мысси, ӧні аддза».

¹² Сэки юалісны сылысь: «Кӧні тэнӧ Бурдӧдысьыд?» Мӧдыс вочавидзис: «Ог тӧд».

^13-14 Буретш шойччан лунӧ Исус вӧчис ляти да бурдӧдіс синтӧм мортӧс. Тайӧ мортсӧ нуӧдісны фарисейяс дінӧ.

¹⁵ Найӧ тшӧтш юалісны сылысь, кыдзи сійӧ кутіс аддзыны. Сійӧ вочавидзис: «Исус пуктіс син вылам ляти, сэсся ме мысси да куті аддзыны».

¹⁶ Сэки фарисейяс пӧвстысь кодсюрӧ шуисны: «Тайӧ Бурдӧдысьыс абу Енсянь, ӧд Сійӧ торкӧ тшӧктӧмсӧ – уджалӧ шойччан лунӧ». Мукӧдыс сёрнитісны: «Вермас ӧмӧй мыжа морт вӧчны татшӧм шензьӧданаторъяссӧ?» Тадзи лыбис на костын вен.

¹⁷ Синтӧм мортлысь бара юалісны: «Тэ шуан, мый Сійӧ бурдӧдіс тэнсьыд синтӧ? Коді Сійӧ тэ ногӧн?» Морт вочавидзис: «Пророк».

¹⁸ Иудейяслӧн веськӧдлысьяс эз эскыны, мый тайӧ мортыс вӧлі синтӧм да пондіс аддзыны. Сэки найӧ корисны сылысь бать-мамсӧ

¹⁹ да юалісны налысь: «Тайӧ тіян пиныд? Ті шуанныд, сійӧ пӧ чужӧмсяньыс синтӧм. Кыдзи нӧ сійӧ аддзӧ ӧні?»

²⁰ Бать-мамыс вочавидзисны: «Тайӧ миян пиным. Ми тӧдам, мый сійӧ чужис синтӧмӧн,

²¹ но ми огӧ тӧдӧй, кыдзи сійӧ кутіс аддзыны. Ми огӧ тӧдӧй, коді бурдӧдіс сійӧс. Юалӧй сылысь, сійӧ тыр арлыда нин, вермас ачыс вочавидзны».

²² Бать-мамыс шуисны тадзи, ӧд найӧ полісны иудейяслӧн веськӧдлысьясысь. Веськӧдлысьяс сёрнитчӧмаӧсь, мый быдӧнӧс, коді Исусӧс пуктӧ Кристос туйӧ, вӧтласны синагогаысь.

²³ Та вӧсна бать-мамыс шуисны: «Юалӧй сылысь, ӧд сійӧ тыр арлыда нин».

²⁴ Сэсся мӧдысь корисны сійӧ мортсӧ, коді вӧлі синтӧм, да шуисны сылы: «Кӧсйысь Ен водзын, мый збыльсӧ висьталан. Ми тӧдам: тэнӧ Бурдӧдысьыс – мыжа морт».

²⁵ Сійӧ вочавидзис: «Мыжа-ӧ Сійӧ, ме ог тӧд. Но ӧтитор тӧда: ме вӧлі синтӧм, а ӧні аддза».

²⁶ Сылысь выльысь юалісны: «Мый Сійӧ вӧчис тэныд? Кыдзи Сійӧ бурдӧдіс тэнӧ?»

²⁷ Бурдӧм морт вочавидзис: «Ме тіянлы висьталі нин, сӧмын ті энӧ кывзӧй. Мый нӧшта кӧсъянныд кывны месянь? Гашкӧ, ті тшӧтш кӧсъянныд лоны Сылӧн велӧдчысьясӧн?»

²⁸ Иудейяслӧн веськӧдлысьяс кутісны видны тайӧ мортсӧ да шуисны сылы: «Тэ Сылӧн велӧдчысь, а ми – Мӧисейлӧн.

²⁹ Ми тӧдам, мый Ачыс Енмыс сёрнитіс Мӧисейкӧд. А кытысь тайӧ Мортыс, ми огӧ тӧдӧй».

³⁰ Бурдӧм морт вочавидзис: «Тайӧ ёна шензьӧдӧ! Сійӧ бурдӧдіс менсьым синмӧс, а ті онӧ тӧдӧй, кытысь Сійӧ.

³¹ Ми тӧдам, мый Ен оз кывзы мыжаясӧс. Но коді бурӧ пуктӧ Енсӧ да олӧ Сылӧн кӧсйӧм серти, Енмыс кывзӧ сійӧс.

³² Му пуксьӧмсяньыс эз на вӧв татшӧмыс, мый чужӧмсяньыс синтӧмӧс кодкӧ бурдӧдіс.

³³ Менӧ Бурдӧдысьыс кӧ эз вӧв Енсянь, нинӧм эськӧ вӧчны эз вермы».

³⁴ Сылы вочавидзисны: «Тэ дзоньнас мыж пытшкын чужӧмыд, а лысьтан миянӧс велӧдны!» Сэсся вӧтлісны сійӧс.

³⁵ Исус кывліс бурдӧдӧм мортӧс вӧтлӧм йылысь, корсис сійӧс да юаліс: «Эскан-ӧ тэ Ен Пилы?»

³⁶ Мӧдыс вочавидзис: «Господьӧй, коді нӧ Сійӧ? Висьтав, медым ме верми эскыны».

³⁷ Исус шуис: «Тэ аддзылін Сійӧс, Сійӧ сёрнитӧ тэкӧд».

³⁸ Бурдӧм морт шуис: «Эска, Господьӧй!» И копыртчис Сы водзӧ.

³⁹ Исус шуис: «Ме локті муюгыдас мыждыны, медым синтӧмъяс аддзисны да аддзысьяс синтӧммисны».

⁴⁰ Тайӧс кылӧм бӧрын ӧткымын фарисей, кодъяс вӧліны Исус дінын, юалісны Сылысь: «Гашкӧ, ми тшӧтш синтӧмӧсь да?»

⁴¹ Исус вочавидзис: «Вӧлінныд кӧ ті синтӧмӧсь, сэки эськӧ энӧ мыжмӧй. Но ті шуанныд, аддзам пӧ, сідзкӧ, мыжныд ас выланыд кольӧ».