Иоан 20 - Коми Библия 2023

Исуслӧн ловзьӧм

¹ Шойччан лун бӧрын асъя рӧмыднас Магдала Марья локтіс дзебанінӧ. Сійӧ аддзис, мый изсӧ пыранінсьыс вӧлі вештӧма.

² Сэки котӧртіс Симон-Петыр дінӧ да сійӧ велӧдчысьыс дінӧ, коді вӧлі муса Исуслы, да шуис налы: «Господьтӧ нуӧмаӧсь дзебанінсьыс, но огӧ тӧдӧй, кытчӧ Сійӧс пуктӧмаӧсь».

³ Петыр да мӧд велӧдчысьыс мӧдӧдчисны дзебанінас.

⁴ Найӧ кыкнанныс котӧртісны, но мӧдыс Петырысь тэрыбджыка котӧртіс да водзджык воис дзебанін дорас.

⁵ Сійӧ копыртчылӧмӧн видзӧдліс да аддзис дзебан дӧраяссӧ, но пытшкас эз пыр.

⁶ Сы бӧрся локтіс Симон-Петыр, пырис дзебанінас да аддзис сэтысь дзебан дӧраяссӧ.

⁷ Исуслысь юрсӧ гартыштан чышъяныс тубыртӧмӧн куйліс мӧдлаын, дӧраясысь торйӧн.

⁸ Дзебанінас пырис тшӧтш мӧд велӧдчысьыс, коді водзджык воис. Сійӧ аддзис тайӧс да эскис.

⁹ Ӧд найӧ эз на гӧгӧрвоны Гижӧдсьыс, мый Исус ловзяс.

¹⁰ Сэсся велӧдчысьяс бӧр мунісны гортаныс.

Исус петкӧдчӧ Магдала Марьялы

¹¹ Марья бӧрдігтыр сулаліс дзебанін дорас. Бӧрдігмозыс сійӧ копыртчӧмӧн видзӧдліс дзебанін пытшкас

¹² да аддзис сэтысь еджыд паськӧма кык анделӧс. Найӧ пукалісны сэні, кӧні водзынджык куйліс Исуслӧн шойыс, ӧтиыс пукаліс юрладорас, а мӧдыс – кокладорас.

¹³ Найӧ юалісны: «Аньӧй, мыйла тэ бӧрдан?» Марья вочавидзис: «Нуӧмаӧсь менсьым Господьӧс, и ог тӧд, кытчӧ Сійӧс пуктӧмаӧсь».

¹⁴ Тайӧс шуӧм бӧрын Марья бергӧдчис да аддзис сулалысь Исусӧс, сӧмын эз тӧд Сійӧс.

¹⁵ Исус юаліс: «Аньӧй, мыйла тэ бӧрдан? Кодӧс корсян?» Марья чайтіс, мый сыкӧд сёрнитӧ сад йӧрын уджалысь, да шуис сылы: «Ыджыдӧй, тэ кӧ петкӧдін Сійӧс, висьтав, кытчӧ пуктін. Ме босьта Сійӧс».

¹⁶ Исус шуис: «Марья!» Исуслань бергӧдчӧмӧн Марья шуис: «Раввуни», мый лоӧ «Велӧдысьӧй».

¹⁷ Исус шуис сылы: «Эн инмӧдчы Ме дінӧ, Ме ӧд эг на кыпӧдчы Батьӧй дінӧ. Мун Менам вокъяс дінӧ да висьтав налы, мый Ме кыпӧдча Аслам Батьӧй да тіян Батьныд дінӧ, Аслам Енмӧй да тіян Енныд дінӧ».

¹⁸ Магдала Марья муніс да юӧртіс велӧдчысьяслы, мый аддзыліс Господьӧс, да висьталіс налы Исуслысь кывъяссӧ.

Исус петкӧдчӧ велӧдчысьясыслы

¹⁹ Шойччан лун бӧрын рытнас велӧдчысьяс чукӧртчисны ӧтлаӧ. Иудейяслӧн веськӧдлысьясысь полӧм вӧсна найӧ йигналісны ӧдзӧсъяссӧ. Виччысьтӧг локтіс Исус, сувтіс на шӧрӧ да шуис: «Лӧнь олӧм тіянлы!»

²⁰ Тайӧс шуӧм бӧрын Сійӧ петкӧдліс налы Ассьыс кисӧ да ордлыяссӧ. Господьӧс аддзӧмысь велӧдчысьяс долыдмисны.

²¹ Исус шуис налы мӧдысь: «Лӧнь олӧм тіянлы! Кыдзи Бать мӧдӧдіс Менӧ, сідзи Ме мӧдӧда тіянӧс».

²² Тайӧс шуӧм бӧрын Сійӧ пӧльыштіс налань да шуис: «Сибӧдӧй Вежа Лолӧс.

²³ Кодлысь мыжъяссӧ прӧститанныд, сійӧс лоӧ прӧститӧма. Кодлысь онӧ прӧститӧй, сы вылӧ мыжыс коляс».

²⁴ Исуслӧн волігӧн Двӧйнипӧв Фома, дас кыксьыс ӧти, эз вӧв накӧд.

²⁵ Мукӧд велӧдчысьыс висьталісны сылы: «Ми аддзылім Господьӧс». Фома воча шуис: «Ог кӧ аддзыв кисьыс кӧрттув дойяссӧ, ог кӧ пуктыв сэтчӧ чуньӧс да ог пуктыв ассьым киӧс сылы ордлыас, ог эскы».

²⁶ Вежон мысти Исуслӧн велӧдчысьясыс бара вӧліны керкаынӧсь, Фома тшӧтш вӧлі накӧд. Ӧдзӧсъясыс вӧліны йиганаӧсь, но Исус сувтіс на шӧрӧ да шуис: «Лӧнь олӧм тіянлы!»

²⁷ Сэсся шуис Фомалы: «Вайлы чуньтӧ да видзӧдлы Менсьым киӧс. Нюжӧдлы китӧ да пуктыв Менам ордлыӧ. Эн ло эскытӧмӧн, но ло эскысьӧн».

²⁸ Фома вочавидзис: «Господьӧй, менам Енмӧй!»

²⁹ Исус шуис сылы: «Тэ эскан, Менӧ аддзылін да. Шудаӧсь найӧ, кодъяс оз аддзыны, но эскӧны!»

³⁰ Исус вӧчис велӧдчысьясыс дырйи уна мукӧд шензьӧданатор, мый йылысь абу гижӧма тайӧ небӧгас.

³¹ Но тайӧс гижӧма, медым ті эскинныд, мый Исус эм Кристос, Ен Пи. Эсканныд кӧ, Сылӧн нимыс пыр тіянлы вичмас олӧм.