Иоан 18 - Коми Библия 2023

Исусӧс локтӧны босьтны

¹ Тайӧс шуӧм бӧрын Исус муніс велӧдчысьясыскӧд Кедрон ковтыс сайӧ да пырис накӧд сад йӧрӧ.

² Найӧ унаысь чукӧртчылісны сэтчӧ, сійӧн тайӧ йӧрсӧ тӧдіс тшӧтш Иуда, Исусӧс вузалысь.

³ Иуда вайӧдіс сэтчӧ шыпуртаясӧс да крам видзысьясӧс, кодъясӧс мӧдӧдісны аркирейяс да фарисейяс. Найӧ локтісны пӧнаръясӧн, биясӧн да шыпуртъясӧн.

⁴ Исус тӧдіс нин, мый лоӧ Сыкӧд, да воча петіс налы. Сійӧ юаліс: «Кодӧс ті корсянныд?»

⁵ Сылы вочавидзисны: «Назаретса Исусӧс». Исус шуис: «Тайӧ Ме». Накӧд орччӧн сулаліс тшӧтш Иуда, Исусӧс вузалысь.

⁶ Кор Исус шуис, тайӧ пӧ Ме, шыпуртаяс бӧрыньтчисны да усисны муас.

⁷ Исус бара юаліс: «Кодӧс ті корсянныд?» Найӧ вочавидзисны: «Назаретса Исусӧс».

⁸ Исус шуис налы: «Ме висьталі нин тіянлы, мый тайӧ Ме. Менӧ кӧ корсянныд, лэдзӧй мукӧдсӧ мунны».

⁹ Исус шуис тадзи, медым инісны Сылӧн кывъясыс: «Меным сетӧмаясысь весиг ӧтикӧс эг вошты».

¹⁰ Симон-Петырлӧн вӧлі шыпурт. Сійӧ кыскис шыпуртсӧ да керыштіс аркирей кесйӧглысь веськыд пельсӧ. Кесйӧглӧн нимыс вӧлі Малк.

¹¹ Исус шуис Петырлы: «Бӧр сюй шыпурттӧ пуртӧсас. Тайӧ чашаыс Меным Батьсянь. Ме ӧмӧй ог ю сійӧс?»

¹² Сэки шыпуртаяс, налӧн веськӧдлысьыс да крам видзысьяс босьтісны Исусӧс. Сэсся Сійӧс кӧрталӧмӧн

¹³ нуӧдісны медводз Аннас дінӧ, Каиаф гӧтырлӧн бать дінӧ. Сійӧ вонас Каиаф аркиреяліс.

¹⁴ Буретш сійӧ шуліс иудейяслӧн веськӧдлысьяслы, бурджык пӧ ӧти мортлы кувны войтырыс вӧсна.

Петырлӧн соссьӧм

¹⁵ Симон-Петыр да нӧшта ӧти велӧдчысь мунісны Исус бӧрся. Тайӧ велӧдчысьыс вӧлі тӧдса аркирейлы, та вӧсна сійӧ пырис Исускӧд аркирей йӧр пытшкӧ.

¹⁶ Петыр кольччис сулавны йӧр ортсыас, дзиръя дорас. Аркирейлы тӧдса велӧдчысьыс петіс, сёрнитыштіс дзиръя восьталысь анькӧд да вайӧдіс Петырӧс йӧр пытшкас.

¹⁷ Аньыс юаліс Петырлысь: «Абу-ӧ тэ тшӧтш тайӧ кӧрталӧм Мортыслӧн велӧдчысь?» Петыр шуис: «Абу».

¹⁸ Вӧлі кӧдзыд. Та вӧсна кесйӧгъяс да крам видзысьяс пестісны бипур да сы гӧгӧр сулалӧмӧн шонтысисны. Петыр тшӧтш сулаліс накӧд да шонтысис.

Исус аркирей водзын

¹⁹ Аркирей юаліс Исуслысь Сылӧн велӧдӧмыс да велӧдчысьясыс йылысь.

²⁰ Исус вочавидзис: «Ме ставсӧ висьтавлі восьсӧн. Ме велӧді иудейясӧс синагогаясын да крамын, кӧні найӧ пыр чукӧртчывлӧны. Ме нинӧм эг висьтавлы гусьӧн.

²¹ Мыйла тэ Менсьым юасян? Юав Менӧ кывзысьяслысь, мый Ме висьтавлі налы. Найӧ тӧдӧны Менсьым висьтавлӧмӧс».

²² Кор Исус шуис тайӧс, крам видзысьяс пӧвстысь ӧти, коді сулаліс Сыкӧд орччӧн, кучкис Сылы чужӧмас да шуис: «Кыдзи тэ сёрнитан аркирейкӧд!»

²³ Исус вочавидзис: «Шуи кӧ мыйкӧ лёка, висьтав, мый Ме лёксӧ шуи. Шуи кӧ веськыда, мыйла Менӧ нӧйтан?»

²⁴ Исусӧс кӧртавлӧмӧн Аннас мӧдӧдіс Сійӧс Каиаф аркирей дінӧ.

Петыр бара соссьӧ

²⁵ Симон-Петыр сулаліс бипур дорын да шонтысис. Сылысь юалісны: «Абу-ӧ тэ тшӧтш Сылӧн велӧдчысь?» Сійӧ соссис: «Абу».

²⁶ Сэні вӧлі аркирейлӧн кесйӧг. Тайӧ кесйӧгыс вӧлі рӧдвуж сылы, кодлысь пельсӧ Петыр керыштіс. Сійӧ юаліс Петырлысь: «Эн-ӧ тэ вӧв Сыкӧд тшӧтш сад йӧрас?»

²⁷ Петыр бара соссис. Дзик пыр кыліс петуклӧн чукӧстӧм.

Исус Пилат водзын

²⁸ Асывводзнас Каиафсянь Исусӧс нуӧдісны римса юралысьлӧн керкаӧ. Иудейяслӧн веськӧдлысьяс эз пырны керка пытшкас, медым эз пежасьны да вермисны сёйны ыджыдлунся сёян.

²⁹ Пилат петіс на дінӧ да шуис: «Мыйысь ті мыжаланныд тайӧ Мортсӧ?»

³⁰ Найӧ вочавидзисны: «Эз кӧ вӧв Сійӧ лёк вӧчысь, ми эськӧ эгӧ вайӧдӧй Сійӧс тэ дінӧ».

³¹ Пилат шуис налы: «Босьтӧй Сійӧс да мыждӧй асланыд Индӧд серти». Иудейяслӧн веськӧдлысьяс шуисны сылы: «Миянлы оз позь мыждыны мортӧс кулӧм вылӧ».

³² Тадзи инісны Исуслӧн кывъясыс, кутшӧм ногӧн Сійӧ кулас.

³³ Пилат бӧр пырис керкаӧ, корис ас дінас Исусӧс да юаліс: «Тэ-ӧ иудейяслӧн Ӧксыыс?»

³⁴ Исус воча шуис: «Ачыд-ӧ тэ тадзи мӧвпалан, либӧ мукӧдыс тадзи шуӧны Ме йылысь?»

³⁵ Пилат шуис: «Ме ӧд абу иудей. Тэнад войтырыд да аркирейяс сетісны Тэнӧ менам киӧ. Мый Тэ вӧчин?»

³⁶ Исус вочавидзис: «Менам Юралӧмӧй абу тайӧ муюгыдсьыс. Вӧлі кӧ тадзи, Менам кесъялысьясӧй эськӧ тышкасисны Ме вӧсна, медым эг шед иудейяслӧн киӧ. Но Менам Юралӧмӧй абу татысь».

³⁷ Пилат шуис Сылы: «Сідзкӧ, Тэ Ӧксы?» Исус вочавидзис: «Тэ ачыд шуан, мый Ме Ӧксы. Ме чужи да локті муюгыдас, медым висьтавны збыль йывсьыс. Коді збыльыслӧн, сійӧ кывзӧ Менсьым кывъясӧс».

³⁸ Пилат юаліс: «Мый сійӧ збыльыс?» Тайӧс шуӧм бӧрын Пилат петіс иудейяс дінӧ да шуис налы: «Ме некутшӧм мыж Сылысь ог аддзы.

Исусӧс мыждӧм

³⁹ Тіян кӧсйӧм серти Ыджыд лун водзвылын быд во ме лэдза дзескыдінысь ӧти мортӧс. Кӧсъянныд-ӧ, медым ме лэдзи тіянлы иудейяслысь Ӧксысӧ?»

⁴⁰ Сэки ставныс горӧдісны: «Эн Сійӧс, а Варавваӧс лэдз!» Варавва вӧлі лёк вӧчысь.