Иоан 13 - Коми Библия 2023

Исус мыськалӧ велӧдчысьяслысь кокнысӧ

¹ Тайӧ вӧлі Ыджыд лун водзвылын. Исус тӧдіс нин, мый Сылы воис кад мунны тайӧ муюгыдсьыс Батьыс дінӧ. Исуслы вӧлі мусаӧсь найӧ, кодъяс эскисны Сылы, Сійӧ помӧдзыс петкӧдліс на дінӧ Ассьыс муслунсӧ.

² Рытнас найӧ чукӧртчисны сёйны. Омӧльыс вӧлі ышӧдӧма нин Иудаӧс, Симон-Искариотлысь писӧ, вузавны Исусӧс.

³ Исус тӧдіс, мый Батьыс ставсӧ сетіс Сы киӧ, мый Сійӧ локтіс Енсянь да бӧр Сы дінӧ мунӧ.

⁴ Сёйигас Исус чеччис, пӧрччис вылыс паськӧмсӧ да вӧнясис ки чышкӧдӧн.

⁵ Кисьтіс дозйӧ ва да кутіс мыськавны велӧдчысьяслысь кокнысӧ да вӧнялӧм чышкӧднас чышкавны.

⁶ Исус матыстчис Симон-Петыр дінӧ. Петыр шуис: «Господьӧй, Тэныд-ӧ менсьым кокӧс мыськыны?»

⁷ Исус вочавидзис: «Ӧні тэ он на гӧгӧрво, мый Ме вӧча, но бӧрынджык гӧгӧрвоан».

⁸ Петыр шуис Сылы: «Некор он мыськав менсьым кокӧс!» Исус воча шуис: «Ог кӧ мыськав тэнӧ, он ло Мекӧд».

⁹ Симон-Петыр шуис Сылы: «Господьӧй, мыськы тшӧтш менсьым киӧс да юрӧс, эн сӧмын кокӧс!»

¹⁰ Исус вочавидзис: «Мыськалӧмалысь колӧ мыськавны сӧмын коксӧ, ӧд дзоньнассӧ сійӧ сӧстӧм нин. Ті сӧстӧмӧсь нин, сӧмын абу ставныд».

¹¹ Исус тӧдіс, коді Сійӧс вузалас, та вӧсна шуис, абу пӧ ставныд сӧстӧмӧсь.

¹² Налысь кокнысӧ мыськалӧм бӧрын Исус пасьтасис да бара пуксис сёйны. Сійӧ шуис велӧдчысьясыслы: «Гӧгӧрвоанныд-ӧ, мый Ме ӧні вӧчи?

¹³ Ті шуанныд Менӧ Велӧдысьӧн да Господьӧн. Ті веськыда шуанныд, Ме буретш сійӧ.

¹⁴ Ме кӧ, тіян Господь да Велӧдысь, мыськалі тіянлысь кокнытӧ, сідзкӧ, тіянлы тшӧтш колӧ мыськавны ӧта-мӧдныдлысь кокнытӧ.

¹⁵ Тадзи Ме вӧчи, медым ті вӧчинныд Ме моз.

¹⁶ Веськыда, веськыда висьтала тіянлы: кесйӧг абу ыджыдджык аслас ыджыдысь, мӧдӧдӧм морт абу ыджыдджык сійӧс мӧдӧдысьысь.

¹⁷ Тайӧс кӧ тӧданныд да та серти оланныд, ті шудаӧсь.

¹⁸ Ме ог висьтав ставныд йылысь, ӧд Ассьым бӧрйӧмаясӧс Ме тӧда. Но гижӧма: ”Мекӧд сёйысьыс сувтас Меным паныд”. Тайӧ кывъясыслы колӧ инны.

¹⁹ Ме водзвыв висьтала тайӧс, медым лоӧм бӧрас ті эскинныд, мый Ме збыльысь Сійӧ, кодӧн Ачымӧс шуа.

²⁰ Веськыда, веськыда висьтала тіянлы: коді сибӧдӧ Месянь мӧдӧдӧмаӧс, сійӧ сибӧдӧ Менӧ. А Менӧ сибӧдысь сибӧдӧ Менӧ Мӧдӧдысьӧс».

Исус висьталӧ вузалысь йывсьыс

²¹ Тайӧс висьталӧм бӧрын Исуслӧн нормис сьӧлӧмыс. Сійӧ шуис: «Веськыда, веськыда висьтала тіянлы: тіян пиысь ӧти вузалас Менӧ».

²² Сэки велӧдчысьясыс видзӧдлісны ӧта-мӧдныс вылӧ. Найӧ эз гӧгӧрвоны, код йылысь Сійӧ сёрнитӧ.

²³ Велӧдчысьяс пиысь ӧти, коді вӧлі муса Исуслы, нёровтчӧмӧн пукаліс Исус бердын.

²⁴ Симон-Петыр довкнитіс сылы, юав пӧ Исуслысь, код йылысь Сійӧ сёрнитӧ.

²⁵ Исуслы морӧс бердас топӧдчӧмӧн тайӧ велӧдчысьыс юаліс: «Господьӧй, коді нӧ сійӧ?»

²⁶ Исус вочавидзис: «Сійӧ мортыслы Ме сета кӧтӧдӧм няньтор». Сэсся Исус кӧтӧдіс няньтор да сетіс сійӧс Симон-Искариот Иудалы.

²⁷ Тайӧ няньтор бӧрас Иуда пытшкӧ пырис сӧтана. Исус шуис Иудалы: «Мый кӧсъян вӧчны, вӧч ӧдйӧджык».

²⁸ Сёйысьяс пӧвстысь некод эз гӧгӧрво, мыйла Исус шуис тадзи.

²⁹ Кодсюрӧ чайтісны, мый Исус тшӧктіс ньӧбны коланаторсӧ Ыджыд лун кежлӧ либӧ сетны мыйкӧ гӧльяслы, ӧд сьӧм кудйыс вӧлі Иуда ордын.

³⁰ Няньторсӧ босьтӧм бӧрын Иуда дзик пыр петіс ывлаӧ. Вӧлі вой.

Выль тшӧктӧм

³¹ Иудалӧн петӧм бӧрын Исус шуис: «Ӧні воссис Морт Пилӧн дзирдлуныс, а Пиыс пыр воссис Енлӧн дзирдлуныс.

³² Енлӧн дзирдлуныс кӧ воссис Пиыс пыр, сэки Енмыс Ас пытшкас восьтас Пиыслысь дзирдлунсӧ. Тайӧ лоӧ регыд нин.

³³ Челядь, Меным этша нин колис овны тіянкӧд, сэсся кутанныд корсьны Менӧ. Ӧні висьтала тіянлы сійӧ, мый коркӧ висьтавлі иудейяслы: кытчӧ Ме муна, сэтчӧ ті онӧ вермӧй локнысӧ.

³⁴ Выль тшӧктӧм сета тіянлы: радейтӧй ӧта-мӧднытӧ! Кыдзи Ме радейта тіянӧс, сідзи ті радейтӧй ӧта-мӧднытӧ.

³⁵ Радейтанныд кӧ ӧта-мӧднытӧ, сэки быдӧн аддзас, мый ті – Менам велӧдчысьяс».

Исус висьталӧ Петырлӧн соссьӧм йылысь

³⁶ Симон-Петыр юаліс: «Господьӧй, кытчӧ нӧ Тэ мунан?» Исус вочавидзис: «Кытчӧ Ме муна, сэтчӧ тэ ӧні он вермы муннысӧ. Локтан Ме бӧрся бӧрынджык».

³⁷ Петыр шуис: «Господьӧй, мыйла ӧні ог вермы Тэ бӧрся муннысӧ? Ме ассьым олӧмӧс сета Тэ вӧсна!»

³⁸ Исус вочавидзис: «Тэ шуан, мый ассьыд олӧмтӧ сетан Ме вӧсна. Веськыда, веськыда висьтала тэныд: петук чукӧсттӧдз на тэ куимысь соссян Меысь».