Иоан 11 - Коми Библия 2023

Исус ловзьӧдӧ Лазарӧс

¹ Вифания сиктын оліс Лазар нима морт, сійӧ висис. Сэні олісны тшӧтш Лазарлӧн Марья да Марпа чойясыс.

² Буретш тайӧ Марьяыс бӧрынджык мавтас Господьӧс чӧскыд дука выйӧн да чышкалас Сылысь коксӧ аслас юрсиӧн. Висьысь Лазар вӧлі Марьялӧн вокыс.

³ Чойяс мӧдӧдісны мортӧс висьтавны Исуслы: «Господьӧй, Тэнад муса ёртыд висьӧ».

⁴ Тайӧс кылӧм бӧрын Исус шуис: «Тайӧ висьӧмыс абу кулӧм вылӧ, но Енмӧс ошкӧм вылӧ. Та пыр воссяс Ен Пилӧн дзирдлуныс».

⁵ Марпа, сылӧн чойыс да Лазар вӧліны мусаӧсь Исуслы.

⁶ Кор Исус тӧдмаліс Лазарлӧн висьӧм йылысь, Сійӧ кольччыліс на кык лун кежлӧ сэтчӧ, кӧні вӧлі.

⁷ Сэсся Исус шуис велӧдчысьясыслы: «Бӧр мунамӧй Иудеяӧ».

⁸ Велӧдчысьясыс воча шуисны: «Велӧдысь, Иудея муын сӧмын на кӧсйисны вины Тэнӧ изъясӧн, а Тэ бара нин мунан сэтчӧ?»

⁹ Исус вочавидзис: «Лунын ӧмӧй абу дас кык час? Луннас ветлысь оз крукась, ӧд сійӧ аддзӧ тайӧ мувывса югыдсӧ.

¹⁰ Войнас ветлысь крукасьӧ, ӧд сылӧн югыдыс абу».

¹¹ Тайӧс шуӧм бӧрын Исус содтіс: «Миян Лазар ёртным унмовсьӧма. Ме муна сійӧс садьмӧдны».

¹² Велӧдчысьясыс шуисны Сылы: «Господьӧй, унмовсьӧма кӧ, бурдас».

¹³ Исус сёрнитіс Лазарлӧн кулӧм йылысь, а велӧдчысьясыс мӧвпалісны, мый Исус сёрнитӧ узьӧм йылысь.

¹⁴ Сэки Исус веськыда шуис налы: «Лазар кулӧма.

¹⁵ Но тіян вӧсна Ме нимкодяся, мый эг вӧв сэні, ӧд ӧні ті понданныд эскыны. Локтӧй, мунамӧй сы дінӧ».

¹⁶ Сэки Фома, кодӧс шуисны Двӧйнипӧлӧн, шуис мукӧд велӧдчысьыслы: «Мунам да Сыкӧд ӧтлаын кулам».

¹⁷ Локтӧм бӧрас Исуслы висьталісны, Лазарӧс пӧ нёль лун сайын нин дзебисны.

¹⁸ Вифания сикт вӧлі Ерусалимсянь матын, кык-куим верст ылнаын.

¹⁹ Уна иудей вӧлі локтӧмаӧсь Марпа да Марья ордӧ, медым пальӧдны кулӧм вок вӧснаыс налысь шогсӧ.

²⁰ Марпа кыліс Исуслӧн локтӧм йылысь да петіс Сылы воча. Марья пукаліс гортас.

²¹ Марпа шуис Исуслы: «Господьӧй, вӧлін кӧ Тэ тані, менам вокӧй эськӧ эз кув.

²² Но весиг ӧні тӧда: мый коран Енмыслысь, Сійӧ сетас Тэныд».

²³ Исус вочавидзис: «Ловзяс тэнад вокыд».

²⁴ Марпа шуис Сылы: «Тӧда, сійӧ ловзяс медбӧръя лунӧ, кор ловзясны кулӧмаяс».

²⁵ Исус шуис: «Ме эм Ловзьӧдысьыс да Олӧмыс. Меным эскысь весиг кулӧм бӧрас кутас овны.

²⁶ Быдӧн, коді олігас эскӧ Меным, некор оз кув. Эскан-ӧ таӧ?»

²⁷ Марпа шуис: «Эска, Господьӧй! Ме эска, мый Тэ – Кристос, Ен Пи, кодлы колӧ вӧлі локны муюгыдас».

²⁸ Тайӧс шуӧм бӧрын Марпа муніс Марья чойыс дінӧ да гусьӧн висьталіс сылы: «Велӧдысьным тані, тэнӧ корӧ».

²⁹ Тайӧс кылӧм мысти Марья дзик пыр чеччис да муніс Исус дінӧ.

³⁰ Исус абу на вӧлі пырӧма сиктас, Сійӧ вӧлі сэні, кӧні паныдасис Марпакӧд.

³¹ Иудейяс, кодъяс вӧліны Марьякӧд керкаын да пальӧдісны сылысь шогсӧ, аддзисны Марьялысь тэрмасьӧмӧн мӧдӧдчӧмсӧ да петісны сы бӧрся. Найӧ чайтісны, мый сійӧ мунӧ дзебанінӧ бӧрдны.

³² Марья локтіс Исус дінӧ. Кор аддзис Сійӧс, уськӧдчис Сы водзӧ да шуис: «Господьӧй, вӧлін кӧ Тэ тані, вокӧй эськӧ эз кув».

³³ Марьялысь да сыкӧд локтӧм иудейяслысь бӧрдӧмсӧ аддзӧмысь Исуслӧн сьӧлӧмыс нормис. Сійӧ сьӧкыда ышловзис

³⁴ да юаліс: «Кытчӧ ті пуктінныд сійӧс?» Сылы вочавидзисны: «Господьӧй, лок видзӧдлы».

³⁵ Исуслӧн синваыс петіс.

³⁶ Сэки иудейяс ас костаныс сёрнитісны: «Видзӧдлӧй, кутшӧм муса Сылы вӧлӧма Лазарыс».

³⁷ Ӧткымынӧн шуисны: «Сійӧ бурдӧдіс синтӧмӧс. Эз ӧмӧй Сійӧ вермы Лазарӧс видзны кулӧмысь?»

³⁸ Исус локтіс дзебанін дорӧ нормӧм сьӧлӧмӧн. Дзебаніныс вӧлі кырта горсйын, а пыранінсӧ вӧлі тупкӧма изйӧн.

³⁹ Исус шуис: «Вештӧй изсӧ». Кулӧм Лазарлӧн Марпа чойыс шуис: «Господьӧй, сійӧ дуксьӧма нин, ӧд нёльӧд лун нин дзебанінын».

⁴⁰ Исус шуис Марпалы: «Эг ӧмӧй тэныд шулы, мый эскан кӧ, аддзан Енлысь дзирдлунсӧ?»

⁴¹ Сэки вештісны изсӧ дзебанінысь, кӧні куйліс кулӧм Лазар. Енэжӧ видзӧдлӧмӧн Исус шуис: «Батьӧй, Ме аттьӧала Тэнӧ, мый Тэ кылін Менӧ.

⁴² Ме тӧда, мый Тэ век кылан Менӧ. Но тайӧс Ме шуи тані сулалысь йӧзыс вӧсна, медым найӧ эскисны, мый Тэ Менӧ мӧдӧдін».

⁴³ Та бӧрын Исус гораа горӧдіс: «Лазар, пет сэтысь!»

⁴⁴ Кулӧм Лазар петіс. Сылысь ки-коксӧ вӧлі гартлӧма дзебан дӧраясӧн, чужӧмсӧ гартыштӧма чышъянӧн. Исус шуис: «Разьӧй дӧраяссӧ, мед мунас».

Исусӧс кӧсйӧны вины

⁴⁵ Унаӧн иудейясысь, кодъяс волісны Марья дінӧ да аддзылісны, мый Исус вӧчис, пондісны эскыны Исуслы.

⁴⁶ Мукӧдыс мунісны фарисейяс дінӧ да висьталісны налы, мый Исус вӧчис.

⁴⁷ Аркирейяс да фарисейяс чукӧртісны веськӧдлан котыр да сёрнитісны: «Мый миянлы вӧчны? Тайӧ Мортыс уна шензьӧданатор вӧчӧ.

⁴⁸ Лэдзам кӧ Сылы водзӧ тадзи вӧчны, ставныс кутасны эскыны Сылы. Сэки локтасны римсаяс да бырӧдасны миянлысь вежаиннымӧс да войтырнымӧс».

⁴⁹ Каиаф нима морт, коді сійӧ вонас аркиреяліс, шуис налы: «Ті нинӧм онӧ вежӧртӧй.

⁵⁰ Ті ӧмӧй онӧ гӧгӧрвоӧй, мый миянлы бурджык лоӧ, кулас кӧ ӧти морт войтыр вӧсна, дзоньнас войтырыс бырӧм дорысь».

⁵¹ Тайӧ кывъяссӧ Каиаф эз шу ассяньыс, но аркиреялігас водзвыв висьталіс, мый Исус кулас войтырыс вӧсна,

⁵² и оз сӧмын тайӧ войтырыс вӧсна, но медым ӧтлаӧ чукӧртны Енлысь разалӧм ныв-писӧ.

⁵³ Тайӧ лунсяньыс найӧ шуисны вины Исусӧс.

⁵⁴ Та вӧсна Исус эз нин ветлы восьсӧн Иудея муӧд. Сійӧ муніс сэтысь овтӧминлань Ефраим карӧ да кольччис сэтчӧ велӧдчысьясыскӧд.

⁵⁵ Матыстчис иудейяслӧн Ыджыд лун. Сиктъясысь унаӧн локтісны Ерусалимӧ, медым сӧстӧммӧдчыны Ыджыд лун водзвылын.

⁵⁶ Найӧ корсисны Исусӧс, крамын сулаліганыс сёрнитісны ӧта-мӧдныскӧд: «Кыдзи ті чайтанныд, локтас оз Сійӧ татчӧ Ыджыд лун кежлӧ?»

⁵⁷ Аркирейяс да фарисейяс водзвыв тшӧктісны йӧзыслы, мый аддзас кӧ кодкӧ Исусӧс, мед юӧртас та йылысь, медым найӧ вермисны кутны Исусӧс.