Иоан 10 - Коми Библия 2023

Исус – ыжъяслы бур видзысь

¹ «Веськыда, веськыда висьтала тіянлы: коді пырӧ ыж йӧрӧ оз ӧдзӧсӧд, а мӧдлаті, сійӧ – гусясьысь да лёк вӧчысь.

² Ӧдзӧсӧд пырысьыс – ыж видзысь,

³ сылы йӧр видзысь восьтӧ ӧдзӧссӧ. Ыжъяс кылӧны ыж видзысьлысь гӧлӧс шысӧ. Сійӧ чуксалӧ ыжъяссӧ нимъяснас да петкӧдӧ найӧс йӧр ортсыӧ.

⁴ Ыжъяссӧ лэдзалӧм бӧрын ачыс мунӧ водзвыланыс, а ыжъясыс локтӧны бӧрсяньыс, ӧд найӧ тӧдӧны сылысь гӧлӧс шысӧ.

⁵ А тӧдтӧм бӧрся ыжъяс оз мунны. Найӧ пышйӧны сыысь, ӧд найӧ оз тӧдны сылысь гӧлӧс шысӧ».

⁶ Исус висьталіс тайӧ велӧданвисьтсӧ фарисейяслы, сӧмын найӧ эз гӧгӧрвоны, мый йылысь сёрнитіс Исус.

⁷ Сэки Исус висьталіс налы водзӧ: «Веськыда, веськыда висьтала тіянлы: Ме эм ыжъяслы ӧдзӧсыс.

⁸ Меӧдз волысьяс – ставныс гусясьысьяс да лёк вӧчысьяс. Ыжъяс найӧс эз кывзыны.

⁹ Ме эм ӧдзӧсыс. Меӧд пырысьыс мездмас. Сійӧ пырас, петас да йирсянін аддзас.

¹⁰ Гусясьысь локтӧ сӧмын гусявны, вины да бырӧдны. А Ме локті сетны олӧм, тырвыйӧ олӧм.

¹¹ Ме эм ыжъяслы бур видзысь. Бур видзысь сетӧ ассьыс олӧмсӧ ыжъясыс вӧсна.

¹² Меда морт оз ассьыс ыжъяссӧ видз. Кор сійӧ аддзӧ локтысь кӧинӧс, эновтӧ ыжъяссӧ да пышйӧ. Сэки кӧин косявлӧ ыжъяссӧ, да найӧ разалӧны.

¹³ Меда морт пышйӧ, ӧд сійӧс сӧмын медалӧма, сылы веськодь, мый лоӧ ыжъясыскӧд.

¹⁴ Ме эм ыжъяслы бур видзысь. Ассьым ыжъясӧс Ме тӧда, и Менам ыжъясӧй тӧдӧны Менӧ.

¹⁵ Кыдзи Батьӧй тӧдӧ Менӧ, сідзи Ме тӧда Батьӧс. Ассьым олӧмӧс Ме сета ыжъясӧй вӧсна.

¹⁶ Тайӧ йӧрас кындзи Менам эмӧсь мукӧд ыжъяс, найӧс Меным тшӧтш колӧ вайӧдны. Найӧ кыласны Менсьым гӧлӧс шыӧс, сэки лоас ӧти чукӧр да ӧти видзысь.

¹⁷ Батьӧйлы Ме муса, ӧд Ме сета Ассьым олӧмӧс, медым бӧр босьтны сійӧс.

¹⁸ Менсьым олӧмӧс некод оз вермы мырддьыны, Ме Ачым сета сійӧс. Ме верма сетны сійӧс, и верма бӧр босьтны. Тадзи тшӧктіс вӧчны Менам Батьӧй».

¹⁹ Тайӧ кывъясысь иудейяс венӧ воисны.

²⁰ Унаӧн на пӧвстысь шуалісны: «Сійӧс пеж лов кутӧма, Сійӧ йӧйталӧ. Мыйла Сійӧс кывзанныд?»

²¹ Мукӧдыс шуалісны: «Пеж лолӧн кутӧм морт оз вермы тадзи сёрнитны. Вермас ӧмӧй пеж лов синтӧмъясӧс бурдӧдны?»

Исуслы оз эскыны

²² Вӧлі тӧв. Ерусалимын вӧлі гажӧдчан кад – крам вежӧдӧмсӧ казьтылӧм.

²³ Исус ветлӧдліс крамдорса Соломон йӧрӧд.

²⁴ Сэки иудейяс кытшалісны Исусӧс да шуисны: «Тэ дыр на кутан миянӧс бӧбйӧдлыны? Тэ кӧ Кристос, веськыда висьтав миянлы».

²⁵ Исус вочавидзис: «Ме висьталі нин тіянлы, но ті онӧ эскӧй. Менам уджъясӧй, кодъясӧс Ме вӧча Бать нимсянь, висьталӧны Ме йылысь.

²⁶ Но ті онӧ эскӧй, ӧд ті абу Менам ыжъяс. Тайӧс Ме висьтавлі нин тіянлы.

²⁷ Менам ыжъясӧй кылӧны Менсьым гӧлӧс шыӧс. Ме тӧда найӧс, и найӧ локтӧны Ме бӧрся.

²⁸ Ме сета налы помтӧм олӧм, и найӧ некор оз вошны. Некод оз мырддьы найӧс Менам киысь.

²⁹ Менам Батьӧй, коді сетіс Меным найӧс, ставсьыс медыджыд. Некод оз вермы мырддьыны найӧс Менам Батьлӧн киысь.

³⁰ Ме да Бать – ми ӧти».

³¹ Сэки иудейяс босьтісны изъяс, медым лыйлыны Исусӧс.

³² Сійӧ шуис налы: «Батьлӧн тшӧктӧм серти Ме уна бур удж вӧчи тіян пӧвстын. Кутшӧм уджысь нӧ кӧсъянныд изъявны Менӧ?»

³³ Иудейяс вочавидзисны: «Огӧ бур уджысь Тэнӧ изъялӧй, изъялам Енмӧс омӧльтӧмысь. Тэ морт, а Енмӧ пуксян».

³⁴ Исус вочавидзис: «Абу-ӧ гижӧма тіян Индӧдын: ”Ме шуи, мый ті – енъяс”?

³⁵ Гижӧдыс оз вежсьы. Енмыс кӧ шуис енъясӧн найӧс, кодъяслы сетіс Ассьыс кывсӧ,

³⁶ сідзкӧ, мыйла ті шуанныд Менӧ Енмӧс омӧльтысьӧн, Ме кӧ шуа ачымӧс Ен Пиӧн? Ӧд Менӧ Батьӧй вежӧдіс да мӧдӧдіс муюгыдас.

³⁷ Ме кӧ ог вӧч Батьлысь уджъяссӧ, энӧ эскӧй Меным.

³⁸ А вӧча кӧ, эскӧй кӧть Менам уджъясӧ, Меным онӧ эскӧй да. Сэки ті тӧдмаланныд да эсканныд, мый Батьӧй Ме пытшкын, а Ме – Сы пытшкын».

³⁹ Сэки иудейяс бара кӧсйисны кутны Исусӧс, но Сійӧ эз сетчы налы.

⁴⁰ Исус бара вуджис Йӧрдан ю мӧдлапӧлӧ, кӧні Иоан пыртліс йӧзсӧ, да кольччис сэтчӧ.

⁴¹ Сы дінӧ локтіс уна йӧз. Найӧ шуалісны, Иоан пӧ шензьӧданаторсӧ эз вӧчлы, но мый висьтавліс тайӧ Мортыс йылысь, ставыс збыль.

⁴² Сэні унаӧн эскисны Исуслы.