Иоан 1 - Коми Библия 2023

Кывйыс лоис мортӧн

¹ Медводз Кыв вӧлі. Кывйыс Енкӧд вӧлі. Кывйыс Ен вӧлі.

² Кывйыс водзысяньыс Енкӧд вӧлі.

³ Ставсӧ Сы пыр вӧчӧма. Сытӧг немтор абу лоӧма.

⁴ Сы пытшкын вӧлі олӧм. Олӧмыс йӧзыслы вӧлі югыдӧн.

⁵ Югыдыс пемыдас югдӧдӧ, сійӧс пемыдыс эз пӧдты.

⁶ Ен мӧдӧдіс Иоан нима мортӧс.

⁷ Сійӧ локтіс висьтавны Югыдыс йылысь, медым быдӧн эскис Югыдыслы.

⁸ Ачыс сійӧ эз вӧв югыдыс, сійӧ локтіс висьтавны Югыдыс йылысь.

⁹ Збыль Югыдыс, быд мортӧс югдӧдысь, локтіс муюгыдас.

¹⁰ Сійӧ вӧлі муюгыдас, муюгыдсӧ Сы пыр вӧлі вӧчӧма, но муюгыдыс эз тӧд Сійӧс.

¹¹ Сійӧ локтіс Ас йӧз дінас, но найӧ эз сибӧдны Сійӧс.

¹² Сійӧс сибӧдысьяслы, Сылы эскысьяслы, Сійӧ сетіс лоны Енлӧн ныв-пиӧн.

¹³ Найӧ чужисны эз вирсянь, эз морт кӧсйӧмсянь, эз верӧс кӧсйӧмсянь, а чужисны Енсянь.

¹⁴ Кывйыс лоис мортӧн, Сійӧ оліс миянкӧд буралӧм-збыльнас тыр. Ми аддзылім Сылысь дзирдлунсӧ. Сӧмын ӧтка Пиыслы вуджӧ татшӧм дзирдлуныс Батьсяньыс.

¹⁵ Иоан гораа юӧртліс Сы йылысь: «Тайӧ дзик сійӧ Мортыс, код йылысь ме висьтавлі, мый ме бӧрся Локтысьыс меысь ыджыдджык, ӧд Сійӧ меысь водзджык вӧлӧма».

¹⁶ Миянлы быдӧнлы Сы озырлунысь вичмис буралӧм вылӧ буралӧм.

¹⁷ Индӧдсӧ вӧлі сетӧма Мӧисей пыр, а буралӧмыс да збыльыс воис Исус Кристос пыр.

¹⁸ Йӧзыс Енсӧ эз аддзывлыны, сӧмын ӧтка Пиыс, Бать дінас олысьыс, восьтіс Сійӧс миянлы.

Пыртысь Иоан

¹⁹ Иудейяслӧн веськӧдлысьяс мӧдӧдісны Ерусалимысь попъясӧс да левитъясӧс юавны Иоанлысь, коді сійӧ.

²⁰ Иоан соссьытӧг веськыда шуис: «Ме абу Кристос».

²¹ Сэки сылысь юалісны: «Коді нӧ тэ? Илля?» Сійӧ шуис: «Абу». Найӧ бара юалісны: «Пророк-ӧ тэ?» Сійӧ вочавидзис: «Абу».

²² Сэки сылы шуисны: «Коді нӧ тэ? Мый миянлы вочавидзны миянӧс мӧдӧдысьяслы? Мый шуан ас йывсьыд?»

²³ Иоан вочавидзис налы: «Ме – овтӧминын горзысьлӧн шыыс: ”Веськӧдӧй-шыльӧдӧй туй Господьлы!” Тадзи коркӧ висьталіс Исай пророк».

²⁴ Фарисейяссянь мӧдӧдӧмаяс

²⁵ юалісны Иоанлысь: «Тэ кӧ абу Кристос, абу Илля, абу пророк, мыйла, сідзкӧ, йӧзсӧ пыртан?»

²⁶ Иоан вочавидзис налы: «Ме пырта сӧмын ваӧн, но тіян пӧвстын эм Морт, кодӧс ті онӧ тӧдӧй.

²⁷ Сійӧ ме бӧрын локтӧ, но Сійӧ меысь водзджык нин вӧлӧма. Ме ог шогмы разьны Сылысь кӧмкот кӧвсӧ».

²⁸ Тайӧ вӧлі Вифаварын, Йӧрдан ю сайын, кӧні Иоан пыртліс йӧзсӧ.

Енлӧн Баля

²⁹ Аскинас Иоан аддзис сы дінӧ локтысь Исусӧс да шуис: «Видзӧдлӧй, тайӧ Енлӧн Баля. Сійӧ вештӧ став йӧзлысь мыжъяссӧ.

³⁰ Сы йылысь ме висьтавлі нин, мый ме бӧрся локтӧ Морт, коді меысь ыджыдджык, ӧд Сійӧ меысь водзджык вӧлӧма.

³¹ Сійӧс ме эг тӧдлы, но локті ваӧн пыртны, медым Израиль тӧдмаліс Сійӧс».

³² Иоан веськыда висьталіс: «Ме аддзылі, кыдзи енэжсянь гулю моз лэччис Лов да кольччис Сы вылӧ.

³³ Ме эг тӧдлы Сійӧс, но ваӧн пыртны менӧ Мӧдӧдысь шуис меным: ”Кор Тэ аддзан, мый код вылӧ кӧ лэччас Лов да кольччас Сы вылӧ, буретш Сійӧ кутас пыртны Вежа Лолӧн”.

³⁴ Ме аддзылі тайӧс да эскӧда тіянӧс: Сійӧ – Ен Пи».

Медводдза велӧдчысьяс

³⁵ Мӧд луннас Иоан аслас кык велӧдчыськӧд бара сулаліс ю дорын.

³⁶ Локтысь Исусӧс аддзигӧн сійӧ шуис: «Видзӧдлӧй, тайӧ Енлӧн Баля!»

³⁷ Тайӧс кылӧм бӧрын кыкнан велӧдчысьыс мӧдӧдчисны Исус бӧрся.

³⁸ Исус бергӧдчыліс, аддзис Сы бӧрся локтысьясӧс да юаліс налысь: «Мый тіянлы колӧ?» Найӧ вочавидзисны: «Велӧдысь, кӧні Тэ олан?»

³⁹ Исус шуис: «Локтӧй да видзӧдлӧй». Найӧ мунісны, аддзисны Сылысь оланінсӧ да кольччисны сэтчӧ лунтыр кежлӧ. Вӧлі нёль час гӧгӧр.

⁴⁰ Тайӧ кыксьыс, кодъяс мунісны Исус бӧрся, ӧтиыс вӧлі Ӧндрей, Симон-Петырлӧн вокыс.

⁴¹ Сійӧ медводз корсис Симон воксӧ да висьталіс сылы: «Ми аддзим Мессияӧс!» Мӧд ногӧн кӧ, тайӧ лоӧ Кристос.

⁴² Ӧндрей вайӧдіс воксӧ Исус дінӧ. Исус видзӧдліс сы вылӧ да шуис: «Тэ Симон, Ионалӧн пи. Тэнад нимыд лоас Кифа». Сылӧн вежӧртасыс – из, мӧд ногӧн кӧ – Петыр.

Исус корӧ Филипӧс да Нафанаилӧс

⁴³ Аскинас Исус мӧдӧдчис Галилея муӧ. Сэтысь аддзис Филипӧс да шуис сылы: «Лок Ме бӧрся».

⁴⁴ Ӧндрей да Петыр моз Филип вӧлі Випсаида карысь.

⁴⁵ Филип аддзис Нафанаилӧс да шуис сылы: «Ми аддзим Сійӧс, код йылысь вӧлі висьталӧма Мӧисей Индӧдын да пророк гижӧдъясын. Тайӧ Назаретысь Исус, Ӧсиплӧн пи».

⁴⁶ Нафанаил шуис Филиплы: «Позьӧ-ӧ мыйкӧ бурсӧ виччысьны Назаретысь?» Филип вочавидзис: «Лок да ачыд видзӧдлы».

⁴⁷ Исус аддзис Сы дінӧ локтысь Нафанаилӧс да шуис сы йылысь: «Тайӧ мортыс збыльысь Израиль войтырысь, сійӧ оз ылӧдчы».

⁴⁸ Нафанаил юаліс Сылысь: «Кытысь Тэ тӧдан менӧ?» Исус вочавидзис: «Филип кортӧдз на Ме аддзылі тэнӧ инжир пу улысь».

⁴⁹ Нафанаил шуис: «Велӧдысьӧй, Тэ – Ен Пи, Тэ – Израильлӧн Ӧксы!»

⁵⁰ Исус шуис сылы: «Тэ эскан, ӧд Ме шуи, мый аддзылі тэнӧ инжир пу улысь. Но тэ ыджыдджыкторъяс на аддзан».

⁵¹ Сэсся содтіс: «Веськыда, веськыда висьтала тіянлы: ӧнісянь ті кутанныд аддзыны восьса енэжсӧ да Енлысь анделъяссӧ, кодъяс лэччӧны Морт Пи дінӧ да кыпӧдчӧны енэжас».