Индӧд 34 - Коми Библия 2023

Мӧисейлӧн кулӧм

¹ Мӧисей кайис Моав ласта вывсянь Нево керӧсвывса Фасга йылӧдз, мый Ериконлы воча. Сэтысянь Господь петкӧдліс сылы став мусӧ Галаадсянь Данӧдз,

² ставнас Неффалим, Ефрем да Манассей муяс, став Иуда му рытыввыв саридзӧдз,

³ Негев му да став ковтыссӧ Ериконсянь, мӧд ногӧн кӧ, Пальма карсянь, Цоарӧдз.

⁴ Господь шуис сылы: «Тайӧ му йылысь Ме кыв сетлі Ӧвраамлы, Исааклы да Яковлы, мый сета сійӧс насянь чужысьяслы. Ме петкӧдлі сійӧс тэныд, но сэтчӧ тэ он пыр».

⁵ Мӧисей, Господьлӧн кесйӧг, куліс Моав муын, кыдзи шуис Господь.

⁶ Господь дзебис сійӧс Бет-Пеорлы воча ковтысӧ Моав муын, и весиг ӧнӧдз некод оз тӧд, кӧні сылӧн дзебаніныс.

⁷ Мӧисейлы вӧлі сё кызь арӧс, кор сійӧ куліс. Но синмыс сылӧн вӧлі бур, выныс сылӧн эз чинлы.

⁸ Израиль пиян бӧрдісны Мӧисей вӧсна Моав ласта вылын [Йӧрдан ю дорын, Ериконсянь матын] комын лун чӧж, кытчӧдз эз помасьны Мӧисей вӧсна бӧрдан лунъясыс.

⁹ Навлӧн Исус пиыс вӧлі тырӧма мывкыдлуныслӧн лолӧн, ӧд Мӧисей пуктыліс сы вылӧ кисӧ. Израиль пиян кывзысисны Исуслысь да ставсӧ вӧчисны сідзи, кыдзи Господь тшӧктіс Мӧисейлы.

¹⁰ Тайӧ кадсяньыс Израиль войтыр пӧвстын эз вӧв Мӧисей кодь пророкыс. Господь сёрнитліс сыкӧд воча чужӧмӧн.

¹¹ Господь мӧдӧдіс сійӧс Египетӧ вӧчны индысьпасъяс да шензьӧданаторъяс фараон водзын, сылӧн кесйӧгъясыс водзын да став Египет пасьтала. Мӧисей моз татшӧмторъяссӧ сэсся некод эз вӧчлы.

¹² Вына киыс отсӧгӧн Мӧисей петкӧдліс ыджыд да повзьӧдана уджъяс став Израиль войтырлӧн син водзын.