Индӧд 23 - Коми Библия 2023

Кодлы оз позь лоны Господь войтырлӧн чукӧртчӧмын

¹ «Айловлӧн кӧ тобоньыс лязалӧма-доймӧма либӧ чильгансӧ вундӧма, сійӧ оз вермы лоны Господь войтырлӧн чукӧртчӧмын.

² Господь войтырлӧн чукӧртчӧмын оз вермы лоны кырсалӧмсянь чужӧм пи, весиг дасӧд чужанвужйӧдз сысянь чужысьяс.

³ Аммон да моав войтыръясысь некод оз вермы лоны Господь войтырлӧн чукӧртчӧмын, весиг дасӧд чужанвужйӧдз насянь чужысьяс.

⁴ Ӧд Египетысь петӧм бӧраныд, кор ті матыстчинныд на дінӧ, найӧ эз вочаавны тіянӧс ваӧн да няньӧн, а мӧдарӧ, медалісны месопотамияса Петор карысь Веорлысь Валаам писӧ, мед ёрны тіянӧс.

⁵ Но Господь, тіян Енныд, эз кӧсйы кывзыны Валаамӧс. Господь, тіян Енныд, радейтӧ тіянӧс, та вӧсна Валаамлысь ёрӧмсӧ бергӧдіс бурсиӧмӧ.

⁶ Аммон да Моав войтыръяслы некор энӧ вӧчӧй бурсӧ да энӧ отсасьӧй налы.

⁷ Но энӧ мустӧмтӧй эдомсаясӧс, ӧд найӧ тіянлы вокъяс. Энӧ мустӧмтӧй египетсаясӧс, ӧд налӧн муын ті вӧлінныд локтысь йӧзӧн.

⁸ Налӧн пияныс коймӧд чужанвужсянь вермасны лоны Господь войтырлӧн чукӧртчӧмын».

Тышкайӧзлы тшӧктӧмъяс

⁹ «Кор петанныд тышӧ вӧрӧгныдлы паныд, видзчысьӧй быд пежсьыс.

¹⁰ Кодлӧн войнас петас кӧйдысыс, и сійӧ лоӧ пеж, сылы колӧ петны чомъяс сайӧ да кольччыны сэтчӧ.

¹¹ Рытнас сійӧ мед мыссяс, а шонді лэччигӧн вермас бӧр локны тышкайӧзлӧн сувтанінӧ.

¹² Чомъяс сайӧ тіянлы колӧ лӧсьӧдны асмогасянін.

¹³ Шыпурт кындзи тіянлы колӧ новлӧдлыны тэльӧб, медым чомъяс сайӧ ветліганыд верминныд кодйыны гуран да асмогасьӧм бӧрын тыртны сійӧс.

¹⁴ Ӧд Господь, тіян Енныд, ветлӧ тіян чомъяс костӧд, мездӧ тіянӧс да сетӧ тіян киӧ вӧрӧгнытӧ. Та вӧсна тіян сувтанінныд мед лоӧ вежа, медым Господь эз аддзы тіян пӧвстысь зывӧксӧ да эз вешйы тіян дінысь».

Нӧшта тшӧктӧмъяс

¹⁵ «Кесйӧгӧс, коді пышйис аслас ыджыдыс дорысь тіян дінӧ, ыджыдыслы энӧ сетӧй.

¹⁶ Сійӧ мед олас тіян пӧвстын кутшӧм карын кӧсъяс овны. Энӧ дзескӧдӧй сійӧс.

¹⁷ Израильса аньяс да айулов мед оз кырсавны, тадзи вӧчӧмнас мед оз сины асьнысӧ мукӧд енъяслы.

¹⁸ Энӧ вайӧй асланыд Господь Енлӧн керкаӧ кырсалӧм помысь босьтӧм сьӧм, медым збыльмӧдны кыв сетӧмнытӧ, ӧд кырсалысьяс зывӧкӧсь Господьлы, тіян Енлы.

¹⁹ Кор ас войтырысь мортлы сетанныд уджйӧзӧн сьӧм, сёян-юан либӧ мукӧдтор, бӧрсӧ сылысь содтӧдӧн энӧ босьтӧй.

²⁰ Йӧз муысь локтысьлысь верманныд содтӧдӧн босьтны, но ас войтыр мортлысь энӧ, медым Господь, тіян Енныд, бурсиас тіянӧс быд уджын сійӧ муас, кытчӧ ті мунанныд сійӧс босьтӧм могысь.

²¹ Аслад Господь Енлы кӧ кыв сетан, вӧч ньӧжмасьтӧг, ӧд Господь, тэнад Енмыд, виччысьӧ, мый тэ кыв сетӧмтӧ збыльмӧдан, а он кӧ, тэ мыжа лоан.

²² Но он кӧ кывтӧ сет, тэ он ло мыжа.

²³ Вӧч, мый шуан да мый йылысь ас кӧсйӧм серти кыв сетан Господьлы, аслад Енлы.

²⁴ Кор пыран матыссаыдлӧн виноград йӧрас, виноград вотӧссӧ верман пӧттӧдзыд сёйны, но аслад дозйӧ эн чукӧрт.

²⁵ Кор локтан матыссаыдлӧн вундан му вылас, верман нетшкыны шепсӧ кинад, но чарлаӧн эн вунды».