Индӧд 22 - Коми Библия 2023

¹ Тэ кӧ аддзан кодлыськӧ вошӧм ӧшкӧс либӧ ыжӧс, эн чорзьӧд сьӧлӧмтӧ, вайӧд сійӧс кӧзяиныслы.

² Но он кӧ тӧд, кодлӧн пемӧсыс, либӧ нуӧднысӧ ылӧдз, видзышт пемӧссӧ ас ордад. Кор кӧзяиныс кутас корсьны и локтас тэ дінӧ, сет сылы пемӧссӧ.

³ Тшӧтш тадзи вӧч, вошас кӧ кодлӧнкӧ осёлыс либӧ паськӧмыс. Кӧть кутшӧм воштӧмтор аддзан, эн мун бокиті.

⁴ Аддзан кӧ, мый вокыдлӧн осёлыс либӧ ӧшкыс усьӧма кок йывсьыс да куйлӧ туй бокын, эн мун бокиті, а отсав вокыдлы сувтӧдны пемӧссӧ.

⁵ Аньлы оз позь пасьтавны айловлысь паськӧмсӧ, а айловлы оз позь пасьтавны аньлысь паськӧмсӧ. Быдӧн, коді тадзи вӧчӧ, зывӧк Господьлы, тіян Енлы.

⁶ Туй вывті мунігӧн кӧ аддзан пу вылысь либӧ му вылысь лэбач поз, и позъяс кӧ эмӧсь лэбачпиян либӧ кольк чукӧр мамныскӧд, сэки мамсӧ пияныскӧд эн босьт.

⁷ Мамсӧ лэдз, а пиянсӧ верман босьтны. Тадзи кӧ вӧчан, тэныд бур лоӧ, и олӧмыд лоӧ кузь нэма.

⁸ Выль керка лэптігӧн керка вевт вылад гӧгӧрыс вӧч стен, медым некод оз усь тэнад керка вевт вывсянь, и тэ он ло мыжа вир кисьтӧмысь.

⁹ Виноград йӧрад эн пукты мӧд сикас быдмӧг. Пуктан кӧ, воӧм быдтассӧ ни виноград вотӧссӧ тэныд сёйны оз позь.

¹⁰ Ӧшкӧс да осёлӧс ӧтлаӧ сийӧсалӧмӧн эн гӧр.

¹¹ Кык сикас шӧртысь – вурунысь да шабдіысь – сорлалӧмӧн кыӧм паськӧм эн новлы.

¹² Вевттьӧдад, мый шлапнитан мыш вылад, нёльнан пельӧсас вӧч тугъяс».

Гозъякост олӧм йылысь тшӧктӧмъяс

¹³ «Морт кӧ гӧтрасяс, а гӧтырыскӧд узьӧм бӧрын кутас мустӧмтны

¹⁴ да мыжавны сійӧс, паськӧдны лёк сёрни, мый сыкӧд узигӧн казялӧма, мый сійӧ абу нин ныв вӧлӧма,

¹⁵ сэки гӧтырыслӧн бать-мамыс мед ваясны карса дзиръя дорӧ юрнуӧдысьяслы эскӧдантор – вирӧсь узьлан кӧлуй.

¹⁶ Батьыс мед шуас: ”Ме сеті ассьым нылӧс тайӧ мортыс сайӧ, а ӧні сійӧ мустӧмтӧ нылӧс.

¹⁷ Мыжалӧ, мый сійӧ эз нин вӧв ныв. Но менам эм эскӧдантор, мый сійӧ ныв на вӧлі”. Сэсся карса юрнуӧдысьяслы мед петкӧдлас вирӧсь кӧлуй.

¹⁸ Карса юрнуӧдысьяс мед мыждасны нывлысь верӧссӧ,

¹⁹ тшӧктасны мынтыны сё сикель эзысь да сетасны эзысьсӧ нывлӧн батьыслы. Ӧд израильса ныв йылысь сійӧ мортыс паськӧдіс ылӧг сёрни. Аньыс мед кольччас верӧс ордас, а верӧсыслы став олӧм чӧжыс эновтны сійӧс оз позь.

²⁰ Но верӧсыс кӧ збыльсӧ висьталіс, мый ань эз вӧв ныв,

²¹ сэки аньсӧ мед вайӧдасны бать керка ӧдзӧс дорас, и карса айулов мед изъяласны сійӧс кувтӧдзыс. Ӧд бать керкаын олігас сійӧ кырсалӧмнас шогмытӧмтор вӧчис Израильын. Бырӧдӧй лёксӧ ас пӧвстсьыныд.

²² Айловӧс кӧ суасны мӧдлӧн гӧтыркӧд узигӧн, кыкнаннысӧ колӧ вины. Бырӧдӧй Израильысь лёксӧ.

²³ Карын кӧ айлов паныдалас нылӧс, коді кикутӧма мӧдкӧд, и узяс сыкӧд,

²⁴ тіянлы колӧ кыкнаннысӧ вайӧдны карса дзиръя дорӧ да кувтӧдзныс изъявны – нывсӧ сыысь, мый эз горзы, ӧд карын позьӧ вӧлі корны отсӧг, а айловсӧ сыысь, мый янӧдіс матыссаыслысь гӧтырсӧ. Бырӧдӧй лёксӧ ас пӧвстсьыныд.

²⁵ Видз-му вылын кӧ айлов паныдасяс нывкӧд, коді кикутӧма мӧдкӧд, да мырдӧналӧмӧн узяс сыкӧд, айловсӧ колӧ вины ӧтнассӧ.

²⁶ Нывлы нинӧм энӧ вӧчӧй, сійӧ эз вӧч мыжсӧ, мыйысь колӧ мынтысьны олӧмнас. Тайӧ лоӧ сійӧ жӧ, кор морт уськӧдчӧ мӧд морт вылӧ да виӧ сійӧс.

²⁷ Ӧд айлов паныдасис кикутӧма нывкӧд видз-му вылын, и весиг кӧ ныв горзіс, отсӧг вылӧ некод эз вермы локнысӧ.

²⁸ Айлов кӧ паныдасяс нывкӧд, коді абу кикутӧма, да мырдӧналӧмӧн узяс сыкӧд, и найӧс кыкнаннысӧ суасны,

²⁹ сэки айлов мед мынтысяс нывлӧн батьыслы ветымын сикель эзысь да босьтас нылӧс гӧтырӧ, ӧд янӧдіс сійӧс. Став олӧм чӧжыс сылы гӧтырсӧ эновтны оз позь.

³⁰ Оз позь босьтны гӧтырӧ батьлысь гӧтырсӧ либӧ узьлыны сыкӧд».