Индӧд 18 - Коми Библия 2023

Попъяслы да левитъяслы вайӧмторъяс

¹ «Поп-левитъяслы, Левий чужанкотырлы, абу сетӧма Израильын му юкӧнсӧ. Найӧ мед сёясны Господьлы вайӧм висьяс.

² Левий чужанкотырлы вокъясыс пӧвстын мусӧ абу сетӧма. Налӧн пайыс – Господь, кыдзи Сійӧ кӧсйысис налы.

³ Ыж-мӧскӧс вись пыдди вайигӧн Израиль войтыр мед сетас висьлысь пуліпомсӧ, черлысӧ да гырксӧ поплы.

⁴ Сетӧй поплы тшӧтш медводдза вундӧм нянь, выль вина да олив вый, а сідзжӧ нигӧн вурун.

⁵ Ӧд Господь, тіян Енныд, чужанкотыръясныд пӧвстысь бӧрйис Левийӧс да сысянь чужысьясӧс, медым найӧ став олан лунъяс чӧжныс кесъялісны Господьлы [тіян Енлы, да бурсиисны Господь нимӧн].

⁶ Израильса кутшӧмкӧ карын олысь левит кӧ кӧсъяс, вермас овмӧдчыны Господьлӧн бӧрйӧм местаӧ.

⁷ Господь водзын кесъялысь левит вокъясыс моз сійӧ мед кесъялас Господьлы, аслас Енлы.

⁸ Сылы мед ӧтмоза сетасны сёян, весиг кӧ сылӧн эм мыйкӧ батьыслысь эмбурсӧ вузалӧмысь».

Тунасьӧмысь ӧлӧдӧм

⁹ «Кор ті локтанныд сійӧ муас, мый Господь, тіян Енныд, сетас тіянлы, сэтчӧс войтыръяс моз зывӧксӧ энӧ вӧчӧй.

¹⁰ Некод тіян пӧвстысь мед оз сот ассьыс писӧ либӧ нывсӧ вись пыдди. Тіян пӧвстын мед оз ло тунасьысь, кимӧститчысь, тшыкӧдчысь,

¹¹ нимкыв лыддьысь, ловъяс дінӧ шыасьысь да кулӧмаӧс корысь.

¹² Быдӧн, коді тадзи вӧчӧ, зывӧк Господьлы. Татшӧм зывӧксӧ вӧчӧмысь Господь, тіян Енныд, вӧтлас сэтчӧс войтыръяссӧ тіян водзысь.

¹³ Лоӧй Господь Енныд водзын сӧстӧмӧсь.

¹⁴ Ті босьтанныд аслыныд мусӧ войтыръяслысь, кодъяс кывзӧны кимӧститчысьясӧс да тунасьысьясӧс. А тіянлы Господь, тіян Енныд, оз лэдз на моз вӧчны».

Пророк йылысь кӧсйысьӧм

¹⁵ «Господь, тіян Енныд, сувтӧдас вокъяс пӧвстсьыныд ме кодь пророкӧс тіянлы. Сійӧс кывзӧй.

¹⁶ Тадзи збыльмас сійӧ, мый ті коринныд Господьлысь, асланыд Енлысь, кор войтырыс чукӧртчис Хорив керӧс бокын. Ті ӧд шуинныд: ”Водзӧ ми огӧ вермӧй кывзыны асланым Господь Енлысь гӧлӧс шысӧ да видзӧдны тайӧ ыджыд би вылас. Ми полам, мый кулам”.

¹⁷ Сэки Господь шуис меным: ”Найӧ веськыда висьталӧны.

¹⁸ Ме сувтӧда налӧн вокъяс пӧвстысь тэ кодь пророкӧс налы да пукта Ассьым кывъясӧс сылӧн вомӧ. Сійӧ висьталас налы ставсӧ, мый Ме тшӧкта сылы.

¹⁹ Коді оз кывзы Менсьым кывъясӧс, мый тайӧ пророкыс висьталас Менам нимсянь, сійӧс Ме мыжда.

²⁰ Но коді Менам нимсянь висьталас, мый Ме эг тшӧкты висьтавны, либӧ висьталас мукӧд ен нимсянь, татшӧм пророкӧс мед виасны”.

²¹ Ті верманныд юавны асланыд сьӧлӧмын, кыдзи тӧдмавны, Господь-ӧ висьталӧ.

²² Тӧдӧй, Господь нимсянь пророклӧн висьталӧмыс кӧ оз збыльмы, сідзкӧ, эз Господь висьтав, а пророк шуис тайӧс асьсӧ кыпӧдӧм могысь. Энӧ полӧй сыысь».